1 Timoti
Timotikoloːpé Polké Adgotpoːnam Doːjíg
1
Ngoluk Moturbiné Ruːnék lulígnamnoːla Kiristo Jisu séːko ngoluk akaːla duːnamdén, ngo Polbí, Kiristo Jisuk mélígnamko.2 Séː doːjíksém méːjíglo ngok aro ao Timotikoloːpé adlígdungː
Ayangé, aséngé odokké asin-ansíngé Abu Ruːnékolokélaː ngoluk Ruːtum Kiristo Jisukolokké nokkolo dungkaːlangka.
Aroman Luyírnékídíːdok Kekonpé Lupang
3 Ngo Mesodoniaːpé gídodo, no Ipisiaːdo duːla, aromaːném luyírnékídíːdém luyírtímaːdopé lutumdopé ngo nom lumolumola luka. 4 Kapilaːné bulu ainém laːlenbomang. Aroman doːyingkídíːdoːla kítérkamaːné ope-doːyingkídíːdo asiném bimoyok. Édébulu lukerkaːmínsunamém laːlendag odokké Ruːnék agerém gerdumsumang. Ruːnék agerém méːjíkki gerdo. 5 Sém lulígnamdok légaːdé aya:dé, okodé naréné asinnokkélaː ainé méːlodlokké odokké aro-méːjíksunamnokké lendag. 6 Akke odokké gíyodla aré kaman do:yingém kíngaksula yogla dung. 7 Bulu luroːém luyírnépé ilíːdag, bulu buluk lunamém dakidanna ludaggom; bulu okkom ludoji édémsin aíkídíːdé kinmang.
8 Ngolu kindag Luroːdém kabodopé ibommílo luroːdé aidag. 9 Luroːdé arolok-duːnékídíːdok légaːpémang édém ngolu kindag. Émpigeːla luroːkamaːné, agom-tadmaːné, Ruːnémé kinmaːné, imurné, yelam agerém ménggémaːné, narémaːné odokké arolok-duːmaːné, ané-abu mokené, odokké taniːmokené, 10 benggoné, néːnéng milboːmilbong laːmínsuné, monraji, arrom-lumaːné odokké lusugeːla ikumaːnékídíng odokké aroné luyírdok kekonpé inékidíːdok légaːpé bitagai. 11 Édé luyírdém unjígnélaː ayang-paːné Ruːnék tatpon lutaddo paːdag, odokké édém lugoːbidopé ngom tolíktag.
Ruːnék Aséːdok Légaːpé Aipai Binam
12 Ngo ngoluk Ruːtum Kiristo Jisumé aipai bidung, séːkobí ngom bík agerém gerradoːpé tornamém bitang. Bí ngom méːtinsulaːnampé sabla bík agerém gerdopé tolíktag. 13 Lekkem ngo:sin Jisumé lukangka, ipusireka, odokké airuːpé makkeresiaːnékkai. Émpigeːla Ruːnébí ngom ayangém léngkanto, kapilaːné ngo kinmaːpéla méngkésumaːpé édémbulum ito. 14 Odokké ayaːlogla méːjíglog lédílo okko Kiristo Jisukkolo dun, ngoluk Ruːtumbí ngok tayéːlo bojéruːngko aséngém pílenníbitag. 15 Séː aropé lunamko okodém appíngé méːtinsulaːdagː Kiristo Jisubí imurném moturbikolo séː moːpísoːpé gíka, odok araːdo ngoːar aiːyapagmaːnédé. 16 Émpigeːla odogarké légaːpé ngo aséngém paːto, édémpila ngokkolo, imurnékídíːdok imurpagyaːnédokkolo, séːkobulu yampo:ro méngkésugeːla turyarné turnamém paːyéji bulum Kiristo Jisuké arai-araipé oijosula duːnamdém kaːyisunam kísapé léngkanto. 17 Suːpag Migompé doyarné, édíloːsin simaːné, kaːbegmaːnam, Atér Ruːnékoloːpé, ménggésunamélaː luyitsunamé loːdílongkípé dungkaːlangka. Amen.
18 Ngok ao Timotia, nok légaːpé poːpélo:bo lungor-lunoːla léːnam kísapé ngo séː luyírnamsém nom tolígdung, sémbulum ibommílo no Ruːtumké légaːpé ainé momínsunamko momínsulaːyé. 19 Méːjíksunam odokké ainé méːloddém sogabla léːlang. Akke édémbulum mépagnammé buluk méːjíksunamdé ollung kísapé jíːbuddung. 20 Buluk araːdo Aimeniaːbíːla Alegjenderbí, séːkobulum, ngo lékoda Ruːnémé lukaːmaːdopé uiːké alaglo bipakto.