6
Appíng pagbo buluk ruːtumkídíːdém appíːloi ménggésunamém léngkanpé lagidag, odo bulu Ruːnéké aminémnaː bík luyírnamkídíːdok tayéːlo anyisumoma:yé. 2 Séːkobuluk ruːtumkídíːdé méngkésunnén, bulu Ruːtumkolo bírrangé émna ménggésuma:pé ipélagimang. Émpigeːla bulu aiyaːné asin kala ager gerpénammé, kapilaːné buluk gerbinamdém méngkésun taniyélaː méːbomsunam taniyé paːdung. Séː luyírkídíːsém bulum ibomdopé no luyírbipénammé.Murkong Méːbonam
3 Séːkoi angun luyírko luyírmílo odokké édé ngoluk Ruːtum Jisu Kiristoké aroné luyírdoːla ngoluk yelam luyírro lékomaːmílo, 4 bí pugdasudag, émpigeːla bí okkomsin kinmaːnéko. Bí lumínsunamki émmumpésin lukerkaːmínsudag; odogbulukkoki dígmínsunamém, lumínsunamé, geːmunsunamé, luka:nammé, yaːné-agom lunamé, aimaːné méːmomonamém lenmodag. 5 Édé taniːkídíːdé lo:dísém ngasotko laːlenruːdag. Buluk asinkídíːdé aimang, odokké arodokké bulu lamkupé gíladamkang. Bulukképé yelam agersé mirémnan lambékopag.
6 Émpigeːla yelam lédílo kanamdo méːtísunamdé bojéruːngko paːnamé. 7 Kapéné ngolu okkomsin moːpísoːpé bomna gímang, odokké ngolu okkomsin soːkkém bomnangkumang. 8 Émpigeːla ngolukké donamélaː génambomnamé kaːmíloi ngolu méːtísupé lagidag. 9 Émpigeːla séːkobulu mirémníːdagji bulu ankaːlo okelepsudag odokké bojéko makkornéla sinané méːbonam agerrok keteleblo pandag, okodé bulum okkosin kagémaːdopé momíkpagdag. 10 Kapéné murkongém méːbonamdéi appíng imurrok léppírdé. Ake taniyé murkongém méːbola, aro méːjígdokké gíyodla buluk aíké asiném épukki níksula kila dung.
Polké Lutér Luyírbinam
11 Émpigeːla no, Ruːnék taniːa, séː appíːsokké duggélang. Odokké arolok-duːnam, yelam-ager, méːjíksunam, ayang, oijosula duːnam, odokké ajjisula duːnamém mamínnang. 12 Méːjíksunamdo kínggípé mimagém molang; odokké turyarné turnamdém sogabla léːlang okodoːpé nom goktu:ji édílo no nok aro ludedém bojéru:ngko lukanbikunékídíːdok kanggaːlo lusukan. 13 Ruːnéké kanggaːlo, séːko appíngém turnamém bidang, odokké Kiristo Jisu séːkobí Pontias Pilatké kanggaːlo tatpoːpé lukaném lubikan, 14 édíloːpé ngoluk Ruːtum Jisu Kiristobí gílatkumaːyéji, odoloːpé séː luyírnamsém lugéng kamaːdopélaː napínaréngoːpé léːlang émna ngo lulígdung. 15 Odokké séːkobí migomnok Migomdé, ruːtumnok Ruːtumdé, ayang-paːnélaː Atéro:dé Kínggí-tariːnédé, bík ayírrado sémbulum léngkanamyé. 16 Séːkobí atéroːdé édíloːsin simang odokké séːkosin gíaːlaːmangko píaːdo duːdang, séːkom séːkosin kangkímang odokké kaːlaːsinmang. Ménggésunamélaː tornamé bíkkoloːpé loːdílongkípéǃ Amen.
17 Séː moːpísok mirémnékídíːdém bottépé méːsuma:dopélaː buluk mirémnamdém méːtinsula duːmaːdopé luyírrang, kapilaːné édébulu duːyarmang. Émpigeːla bulum Ruːnémé méːtinsudopé lulang, séːko ngoluk méːponam légaːpé appíngém okkomsin píːrammaːdopé bidang. 18 Ainém gerdopé, ainé ager gernamno mirémdopé, makkebmaːpé bilíːnépélaː akoném bisulíːdopé bulum lulíglang. 19 Séː agerkídíːsém ila bulu buluk aíké légaːpé bojérungko kanamsíːnamém éngunmaːné dungkoko aːpéné ayírdok légaːpé mokumsuyé, odokké bulu aro aro turnamdém kinyépé.
20 Timotiːa, Ruːnébí nom okkom tolíktang édémbulum kaːsí:lang. Ruːnék-katéman aré kamaːné agomkídíːdokkélaː kindag émnam okodé angu méːloddén odokké gíyodlang. 21 Taniːékké édémpin makkorné luyír lédulo gímínna méːjíksunamdokké gíyotkang.
Ruːnéké aséngé noluk appíngké lédílo dungkaːlangka.