27 Pag a ye ne a koamb a yiib kibare.
M na n goma pag a ye ne a koamb a yiib kibare.
Koambã yʋy la a Pok la a Raoogo.
Tɩ ra yaa kĩnkĩrsi.
A Raoog n da ya bi-ribla t’a Pok ra yaa bi-pugla.
Sẽn beẽ n beẽ,
pagã wa n nonga a bi-pugl a Poko,
n kisg a bi-riblã.
A Raoog sẽn da maan bũmb ning fãa,
ba t'a ra maan.
bũmb sẽn ya sõma,
a ma wã ra pẽsgd-a-la ne nug n lalle,
tɩ bala sã n yaa ne yẽ,
a Pok bal n da tõe n maan bũmb sẽn sõmbe.
La ne rẽ fãa,
Wẽnnaam beoog sẽn vẽeg daar fãa,
a Raoog ra paamda pãng tẽngã pʋgẽ n paasdẽ.
Nebã fãa ra nong-a-la a tʋʋmã yĩnga,
a sẽn nong n sõng a to wã yĩnga.
Sɩd yĩngã,
nebã fãa ra nong-a lame.
Daar a ye,
a kengame n tɩ wʋr mood n na n kõ a zak rãmba.
A sẽn wa n kuiisẽ,
nin-kẽem a ye n kos-a t'a kõ-a mood bilf t'a yõgen a bugum.
Zĩig pʋgẽ,
a raoog kõ-a-la moodã.
Nin-kẽemã sẽn da pa mi a sẽn da na n dol a maan-neerã to-to ningã,
a rɩka noaag n kõ-a.
A Raoog pʋʋs-a-la bark la a tall noaagã n kuili.
Sẽn wa n beẽ noaagã loba gɛla,
tɩ no-bi-neeb weke.
Noaagã ra lebga arzak bũmb n kõ a Raoogo.
A ma wã ra pa rat arzag-kãng lae-lae ye,
bala a rata a Raoog ne wẽenga.
Rẽnd a yeela a Raoog t'a kʋ a noaagã n tɩ koos raagẽ.
A Raoog sɩd maana woto,
tɩ bala a ra pa kɩɩsd b sẽn yet t'a maan bũmb ning ye,
sẽn yɩɩd fãa,
a ma wã sẽn da yet a maane.
A ma sã n da yeel-a :
« Tʋm f nug bog-kãngã pʋgẽ n yõk bũmb n kõ-ma » a ra maandame,
ba a ra mi tɩ bũmb n tõe n maan-a.
Rẽnd a Raoog kʋʋ a noaagã n tɩ koos raagẽ.
Rao a ye n wa n kos noaagã lɛnga.
A sẽn lembe a mikame tɩ ra yaa noogo.
A sẽebã ra yɩ sõma.
T'a kos a Raoog a noaagã sẽn sẽ wã.
A ra yeel-a lame tɩ badaarã a ra pa tar ligd ye,
tɩ la a vẽk-n-beoogo a ra na n yaoome tɩ Wẽnd sã n sake.
A Raoog sẽn da pa tõdgd ned bũmb kũunã yĩnga,
a kõ-a-la a noaagã la a lebg n kuilif A ma wã zab-a-la sõma tɩ bala sã n yaa ne yẽnda,
ned pa tõe n tɩ koos noaaga (rẽ me no-yɛng bala !)
n kẽ be n dɩk n kõ samd ye :
« Rẽ pa tõe ye !
Fo tõog n maana wãn woto »?
A vẽnega fãa n togse,
la a ma ra pa rat n wʋm ye.
A vẽk-n-beoogo,
rao wã sẽn da rɩk noaagã lebgame n wa kõ-a wed-mo-neere,
bala a Raoog nin-nonglmã ra sãag-a lame.
T'a Raoog reeg wed-mo-kãnga.
A ma wã ra yãka yam n na n sɩbg wed-moaagã vɩɩm tɩ rẽ yɩ sabab n keng a Raoog vɩɩmã.
A yeelame tɩ b karg naan-gilg sẽn pa tar noore,
tl,
bala b na n mee ro-gilga,
sẽn ka kʋɩlenga,
n pag wed-moaagã be.
Rẽ,
wed-moaagã yĩnga,
b pa le baood zãnd a to bɩ mood yas ye.
Rẽ la a Raoog maan yã.
A mee ro-gilga,
tɩ wed-moaagã be pʋgẽ,
kʋɩleng kae,
gãag zĩig kae.
La,
ne Wẽnd sõngre,
tɩ Wẽnd n kõ-a rɩɩb n nobs-a,
rasem a wae pʋgẽ wed-moaagã nobame n pusg roogã lalse.
Yɩɩ woto tɩ daar a ye yibeoogo,
b mikame tɩ wed-moaagã ra bee yɩɩga,
tɩ roogã lalg a ye wã.
Ma wã yeelame :
« Tall weefã n kẽng Gãmbaaga,
naabã sẽn beẽ wã n tɩ kõ-a weefã ».
A Raoog ra pa kɩɩsd b sẽn yet t'a maan lae-lae ye,
sẽn yɩɩde,
a ma sẽn yeel-a.
A yikame.
A yõka a weefã n dɩk Gãmbaag sore.
A ma ra yãka yam n na n yãag-a bilfu,
la sorã zugu a yãa neb sẽn loogd ne mo-kil n na n tɩ pil suga.
Ma wã yeelame :
« Fo pa le baood n na n kẽng ne wed-moaagã be ye.
Sẽn sõmb n yɩɩd yaa f rɩk wed-moaagã n tek ne mo-kill a ye n tʋk mo-killã n kẽng Gãmbaaga.
« Sɩd me,
a Raoog sã n da kẽng ne wed-moaagã a ra tõeeme n zomb-a,
la ne mo-killã,
rɩlla a mengã tuke.
A Raoog sẽn sakd nana wakat fãa wã,
a maana wala a ma wã sẽn yet a maan bũmb ningã :
a teka a wed-moaagã ne mo-killi n zɩ n loog Gãmbaaga.
A sẽn ta Gãmbaaga,
a tɩ yãa naabã.
Naabã ra yaa zoanga,
a pʋg-kẽemã ra yaa zoanga,
b ra pa tar koamb me ye.
A Raoog kosame n na n yã náabã.
Naabã kɩtame t'a kẽ la a kos-a t'a kõ-a a moodã bilf t'a yõgen bugum.
A Raoog maana a sẽn yeelã.
Bugmã sẽn yõgne,
naab nin pukame.
Naab sũur yɩɩ noogo,
t'a kos a Raoog t'a yãk moodã bilf n kõ a pʋg-kẽemã me tɩ yẽ me ra yaa zoanga,
la pagã me nin pukame.
Kɩtame tɩ naab reeg a Raoog tɩ lebg a biiga,
t'a Raoog vɩɩmd vɩ-noog be.
La daar a ye,
a Raoog yeelame t’a rat n leba a ma nengẽ.
A lebgrã yĩnga,
naab kõ-a-la sẽn tõe n kõ buudã fãa :
rap la pagb sẽn na n yãag-a ne rũms wʋsgo.
Rẽ ra yaa a Raoog keoor sẽn da segde t'a rag n zɩ n maan ned wẽeng ye.
A ra maanda neer bala.
A sẽn ta a yirã – ne sõgen damba sẽn dag n yaag a wa :
pagb ra bee be,
rap ra bee be n paas rũms wʋsgo - a Raoog ra lebga rakãagre.
A ra pa rɩk a ma wã sɩbg-zaalã a sẽn da yãtã n ning a yamẽ ye.
A ra ket n date lame n ges a ma wã yelle,
ba ne nebã sẽn da sagend a t'a bas a ma t'a ya a nifẽ wã,
a ra pa kelgd sagl-kãens ye.
Yɩɩ woto t'a ra rat t'a ma wã ra leb n seglg rɩɩb ye,
t'a ra leb n tʋm zakã tʋʋm ye.
La a yeel pagba sẽn yaag b yẽ wã tɩ b reeg a ma zĩig n tʋm tʋʋm-bɛdã.
Rẽ maaneg yɩ tao-tao :
a Raoog sẽn da yeel fãa ra maandame tɩ sãmbg kaẽ ye.
La ne rẽ fãa,
pagã sũur ra ket n pa noom ba bilf ye.
A sẽn yi daar a ye,
sẽn pa zãr ne zaka,
a ra yãa waaf sẽn kẽ bok pʋga.
Tao-tao t'a kɩtame tɩ b bool a bi-ribl a Raoogo :
t'a wa tʋʋll la a ra rɩk bũmb lae ye,
t'a wa nug-zaala.
A Raoog yɩ tao-tao n ta.
A yeel-a lame t'a tʋm a nugã bokã pʋga :
a ra yãa bũmb be n dat bũmbã.
A Raoog tʋma a rɩʋtg nug bokã pʋga,
la yɩɩ yaeesg tɛkẽ ne pagã a biigã sẽn wa n yiis a nuga :
a nuga ra zera ne kĩn la wanzuri n tãag bãgdo.
A rɩka goabg nugã n tʋme.
Kell n yɩɩ bũn-yɛnga :
le yɩɩ wanzuri n tɩ tãag bãoko.
« Wã sɩd yaa rakãaglem »!
pagã sẽn yeel a menga.
T'a bool a bi-puglã - a sẽn da nong-a wʋsgã - n yeel-a tɩ yẽ me tʋm a nug bokã pʋga.
La a sẽn ta,
a rag n pa yã n tʋm a nug bokã pʋg la waafã ke-a ye.
Zu-beedo,
rũmbã kʋ-a lame.
Sɩd yĩngã,
bi-puglã ra nonga a ma-bi-raoogã.
Wakat fãa,
a ra yeta a ma t'a ra kɩtdẽ t’a Raoog tʋmd tʋʋm-yaals ye.
A ra kogenda a ma-bi-raoogã,
la a rag n zɩ n tõog n gom n fãag a Raoog a ma taoor ye.
Yɩɩ woto tɩ pagã wẽnem yĩnga,
bi-puglã ki.
A bi-puglã kũum poore,
a ma wã toeema zʋg n dɩk zʋg-sõngo :
a bãngame tɩ ned togame n nong a koamb fãa n wõneg taaba.
.