26 Rao a ye ne bõaasa.

Bõaas a ye n da me a roog sor noore.

Bõaasã ra yaa zoanga.

A ra gʋlsa yɩɩll sẽn yete :

« Sẽn maan-a neer maana a meng neere,

sẽn maan-a wẽeng maana a meng wẽenga ».

A sẽn da yaa bõaas yĩnga,

n yaa zoang la a ra yɩɩnd yɩɩn-kãngã wã yĩnga,

sẽn da loogd-bã fãa ra kõt-a-la bũmbu.

Rao a ye n ne rẽnda tɩ zabd-a,

t'a maan maas sẽn zẽne,

n tũud sorã n loogdẽ n dɩk-a n kõ zoangã,

sẽn na yɩl ta wãb n ki tɩ sa.

Rẽ a pa lebd n tõog n yɩɩl yɩɩllã la a bõos ye.

A sẽn deeg maasã,

zoangã rɩgl-a-la kɛɛnga n wa rɩk n zã n kuili.

Rao ning sẽn kɩɩm-a maasã sẽn zẽnã koamb ra karemda lekolle.

Daar a ye,

b sẽn yi Iekollã n kuiisẽ,

saagã sɩnga niib wʋsgo,

tɩ b kẽ zoangã roogẽ n na n sool saagã.

« Bõaasa »,

b sẽn yeel-a,

« tõnd pa tar bũmb sẽn na rɩ ye ».

Zoangã rɩka maasã kom-kãensã baaba wã sẽn da kõ-a wã n kõ koambã tɩ b na n yiis b kom.

Koambã sẽn wa n ta yiri,

b pʋsã yikame n zabd zabr menga.

B baaba sok-b lame :

« Yaa bõe n maane »?

B yãbdame la b gomd n yetẽ tɩ b sẽn wa n yit lekollã n watẽ wã,

saag n ling-b tɩ b tɩ sool zoangã roogẽ la,

kom sẽn da tar bãmb yĩnga,

zoangã kõo bãmb maasa.

B ba wã bãnga zĩig pʋgẽ tɩ ra yaa maas ning a sẽn da kõ zoangã la a rɩk n kõ koambã.

T'a na n yãbe,

la a bãngame tɩ zoangã yɩɩllã yaa sɩda :

« Fo sã n maan neere,

f maana f menga.

F maan wẽenga,

f maana f menga ».

.