24 Rao a ye ne a biiga.

Rao a ye ne a biig n da rabd b pʋʋgẽ n na n tɩ ko.

B sẽn kẽndã,

b wa n sɩnga sõasga.

Rao wã yeelame tɩ ned ning sẽn tar-a poorẽ sẽn wogem n yɩɩd ned sẽn tar-a taoor sẽn wogme.

Tɩ biigã yet tɩ ned ning sẽn tar-a taoor sẽn wogem n yɩɩd ned ning sẽn tar-a poorẽ sẽn wogme.

Roa wã sũur yikame t'a rig a biigã la a gɩdg-a t'a pa ko pʋʋgã ye.

Biigã loogame,

la nin-kẽemã sẽn wa n yaa a ye pʋʋgẽ wã sasa,

zĩn-wẽeng n wa.

« Yibeoogo,

nin-kẽema ».

« Yibeoogo »,

rao wã sẽn leok la a rigda.

« Mam waa n na n bõos-f lame tɩ f põng m zugã »

Rao wã pa yet bũmbu,

a maana a sẽn yeelã.

La a sẽn wa n põng a zugã n sa,

zĩnã yeelame :

« Aoo,

saame ?

Yaa sõma,

m datame mosã tɩ f lebs n ning m zoobdã m zugẽ wã.

M data ne m daab tɛkẽ tɩ f lebs n ning-b b zĩigẽ ».

Nin-kẽemã ra sɩd bee yel-bedr pʋgẽ :

nin-kẽem ra pa mi lae a sẽn na n maaneg n lebs zoobdã zĩn-masɩɩbã zugẽ ye.

A sɩnga yãbr sũ-sãang yĩnga,

t'a biigã wẽneg n yã a ba ne nintãm.

« Fo nee rao ning sẽn zĩ-a kasẽ wã ?

Yaa zĩna.

A yeela maam mosmosã tɩ m põng a zugã.

Mam sẽn tʋm a sẽn yeelã n sa,

la a sẽn yeel-m tɩ m lebs a zoobd b zĩigẽ.

M na n maan a wãna »?

Bi-bɩɩgã leokame :

« Rẽ pa yell ye.

Rẽ pa sek yãbr ye »!

A goma ne zĩnã n yeel-a :

« Fo ratame tɩ b lebs f zoobdã b zĩigẽ wã.

Rẽ tõeeme,

a yaa f sẽn na n tõog n yẽes f noa wã vũgs fo sẽn kẽn n wa tãag ka wã ».

Zĩnã sɩnga kẽn la a yẽesd a nao wã vũgs ne nugu.

Rẽ poore a wẽnemdame n bʋʋg nebã a yiibã sẽn da gũud-a wã.

A sẽn ta b sɛɛgẽ,

a le neeme tɩ yẽ nao wã vũgs le rɛgame :

nao wã vũgs pa tõe n yẽes ye,

zoobdã sẽn wõrsã pa tõe n tong ye.

Zĩna sẽn kong pãngã a loogame.

Wakat ninga,

yãag tõe n yiisa a ba yɛl pʋgẽ.

« Yãag nin peelame la b pa ne yɩɩg ye.

Nin-kẽem nin pa peel ye la a nee ne a yam ».

La wakat ning me,

yãas nee nin-kẽemb sẽn pa ne.

.