23 Kasem yam yɩɩda yãaga.

Yãag a ye n yeel a manga :

« B yetame tɩ nin-kẽem yam yuda yãag wakat buud fãa ».

Rẽ yĩnga,

a kẽngame n tɩ seg nin-kẽem n na n sõs ne-a la a bõos-a t'a sagl-a.

A taa nin-kẽemã nengẽ n yeele :

« Mam waame tɩ f sõng-m ne yam tɩɩm baoobo.

M waame tɩ f kõ maam yẽ soabã ».

Nin-kẽemã yeelame t'a tõe segla tɩɩmã n kõ-a,

la bũmb n dengd maanego :

Bi-pokã ra togame n kẽng weoogẽ n tɩ bao we-naaf bĩisim n wa kõ-a t'a yaool n tõog n segl yamã tɩɩm.

Nin-kẽemã yikame n kẽ a roogẽ n yi ne lɩng n kõ-a.

Bi-pokã ra miime t'a ra tõeeme n yã we-naafã weoogẽ,

bãk sẽn beẽ.

Be,

a na bao yam ning a sẽn na n maaneg n yãk bĩismã.

A kẽnga weoogẽ wã n tɩ yã zĩig ning sẽn da tõe n yɩ rũngã soaag zĩiga.

T'a lebg n kuil a yiri,

n tɩ bao yamsem n tɩ rɩgl we-naafã sẽn da tõe n tɩ gãandẽ zĩig ningã.

We-naafã sẽn wa wã,

a mikame yamsmã,

t'a rɩ.

Mosã,

bi-pokã mii zĩig ning takɩ a sẽn tõe n tɩ yãẽ rũngã,

bala a ra lebgdame n wat n baood yamsmã a sẽn nong sõma wã.

A segla a menga,

n dɩk a lɩng n loog weoogẽ wã.

We-naafã sẽn yã-a wã,

a tees-a lame n dabd n na n tɩ kõs-a ne a yɩɩlã.

Bi-pokã solga a meng toe-kẽeng poorẽ.

We-naafã baoome n na n kõs-a t'a yɩɩlã sud toɛɛgã.

Bi-pokã rɩka a lɩngã,

n pẽ bĩismã n tall n tɩ kõ nin-kẽemã.

A sẽn ta ne we-naafã bĩisim,

nin-kẽemã sok-a lame :

« Fo maana a wãn n paam bĩismã n yãke »?

Bi-pokã togsa yam ning a sẽn tall n paam n yãk we-naafã bĩismã.

Tɩ nin-kẽemã yeele :

« Yaa yam-kãngã buud la mam tɩɩmã tõe n kõ-fo.

Bĩismã fo sẽn yãk we-naafã nengẽ wã,

yaa rẽ la f tog n yũ.

Yell ning sẽn wa-a fãa,

fo na n tõogame n paam a tɩɩm.

Fo sã n tall yam n tõog n paam bĩis-kãngã,

fo na yã yam wakat buud fãa n weel f zu-loeese ».

.