22 Rao-kʋɩɩm sẽn pa rat tʋʋma.

Rao-kʋɩɩm sẽn pa rat tʋʋma,

n kẽng n tɩ yã nin-kẽem n dat t'a kõ-a tɩɩm sẽn tõe n ko a pʋʋga.

Nin-kẽemã yeel-a lame t'a tõe n segla tɩɩm rẽ yĩnga,

la te-zẽngds n be t'a sã n pa paam rẽ bɩ a pa tõe n pids a raabã ye.

A wĩnig-a-la sẽn be fãa la a yeel-a :

« Rɩk lɩngã,

kẽng pʋtẽ wã,

rɩgl lɩngã f sɛɛgẽ n sɩng koobo.

F tʋʋlgã sã n yit fãa bɩ f kok n ning lɩngã pʋga.

A sã n wa pidi,

f na tall n wa ko m tɩ m maan tɩɩmã n kõ-fo ».

Tɩ rao wã sɩd kẽng pʋtẽ wã n tɩ sɩng pit fiuubu,

sẽn na yɩl n paam n kok tʋʋlgã n kõ nin-kẽemã.

A tʋʋlgã sã n yi bala,

a rɩkda lɩngã,

n yẽes tɩ tʋʋl-gɩrs kẽ lɩngã pʋga.

Sigr a ye loogame tɩ lɩngã nan pa pid ye.

La,

a yaool n koo pʋtã fãa,

a bʋda nanguri,

a koo fãa,

a koo fãa n sa.

La lɩngã rag n ket n pa pid ye.

tɩ mosã,

yaa modgr ne-a t'a tɩ sõng neb a taabã sẽn na yɩɩl n paam tɩ lɩngã pidi.

Sigrã saame,

saagã yõkame,

la lɩngã pa pid ye.

A rɩka lɩn-sãoogã n tɩ wĩnig nin-kẽemã:

« Sɩd yĩngã,

mam maana m sẽn tõe fãa sigrã tõre,

la m pa tõog n pids lɩngã ye ».

Nin-kẽemã reega lɩngã,

n ges sẽn na yɩl n kɩs sɩd tɩ rao wã sɩd koka a tʋʋlgã,

la a yeele :

« Mosã bɩ f kẽng n tɩ tigs fsẽn bʋdã fãa.

M na n pʋg-f lame n wa gese,

la m miime tɩ tʋʋlg ning f sẽn na n kokã na n seka tɩɩmã maanego ».

B tũu taab n kẽng pʋtẽ wã,

rao wã tigsa a sẽn bʋdã fãa tɩ nin-kẽemã sok-a :

« Wakat a wãn pʋgẽ la fo tõe n dɩ woto fãa ?

Bala fo sẽn tigsã yaa wʋsgo »!

Rao wã leokame tɩ,

a sã n da tog n dɩ a sẽn tigsã fãa a yembre,

a pa tõe tɩ sa ye.

Nin-kẽemã lebs-a-la lɩngã la a yeel-a :

« Ade,

kokd f tʋʋlgã wakat fãa.

Yaa mam tɩɩmã la woto ».

.