21 Kɩɩba.

Daar a yembre,

Wẽnnaam kɩtame tɩ biig a ye ma la a ba ki,

la,

sẽn na yɩl t'a tõog n vɩɩnde,

Wẽnnaam kõo biigã ra-sabr sẽn na yɩl t'a tãoosd n dɩtẽ.

Biigã yiime n na n kẽng tãoosgo.

A sẽn wa n dat n lobg bũmb ne a ra-sabrã,

ra-sabrã kula yĩngr n tɩ yaglg tu-kẽeng zugu,

la ra yaa zãndg wʋsg tɩ biigã ra pa tõe n paam-a n yak ye.

T'a yeel tuugã :

« Ra-sab-kãngã yaa mam dẽnda.

Yaa Wẽnd n kõ-a maam a sẽn wa n kɩt tɩ m ma la m ba ki wã sasa.

Rẽnd,

yaa modgr tɩ fo kõ maam bũmb n lebs ra-sabrã zĩigẽ.

Tuugã mikame tɩ sɩd ra yaa modgr ne-a t'a kõ biigã kũuni,

t'a kõ-a sʋʋre.

A sẽn kuili,

noaag n tɩ rɩ a sʋʋrã.

Tɩ biigã na n yãbe.

« Ha,

sʋ-kãngã yaa maam n so !

Wẽnnaam sẽn kɩt tɩ mam ma la m ba ki wã a kõo maam ra-sabr tɩ m tõog n tãoose.

Tuugã reeg-a lame n kõ-m su-kãngã.

Mosã,

fo segdame n kõ maam bũmb n lebs a zĩigẽ wã tɩlae ».

Yɩɩ modgr ne noaag t'a lob gell n kõ-a.

Biiga kenga weoogẽ ne a gellã,

la maaname t'a lʋɩ ra-koɛɛng zug n wãage.

« Ha,

gel-kãngã yaa maam n so !

Wẽnnaam sẽn kɩt tɩ mam ma la m ba ki wã a kõo maam ra-sabr tɩ m tõog n tãoose.

Tuugã reeg-a lame n kõ-m sʋʋre.

Noaagã rɩɩ m sʋʋrã la a kõ-m gelle.

Fo reega m gellã la mosã fo segdame n kõ maam bũmb n lebs a zĩigẽ wã tɩlae ».

Yɩɩ modgr ne ra-koɛɛnga t'a toeem a meng n lebg saala,

t'a rɩk n kõ biigã.

Biigã tʋg dɩka a saalã n kõ sãya.

Sãyã rɩk-a lame n yõog n maan ne a tʋʋm teedo.

Biigã yeel-a lame :

« Wẽnnaam sẽn kɩt tɩ mam ma la m ba ki wã a kõo maam ra-sabr tɩ m tõog n tãoose.

Tuugã reeg-a lame n kõ-m sʋʋre.

Noaagã rɩɩ m sʋʋrã la a kõ-m gelle.

Ra-koɛɛngã wãaga m gellã,

la sẽn na yɩl n keo-ma a toeema a meng n lebg saala.

Mam waa fo nengẽ n wa kõ-f m saalã,

la fo yõog-a-la zãng n maan f kutoose.

Mosã fo segdame n kõ maam bũmb n lebs a zĩigẽ wã tɩlae ».

Yɩɩ modgr ne sãyã t'a kõ-a kutoaaga.

Yɩɩ woto,

tɩ biigã zãms koobo,

n paam n vɩɩmd la a rɩlgd a menga.