18 Soaamba ne katre.

Daar a yembre,

m ba soaamb ne m ba katr ra gõoda weoogẽ.

B gõobã pʋgẽ,

b yãa bõnyẽeg koamba,

kom-neeba,

sẽn da gãe n gõe.

B ra yaa b yiibu.

M ba soaamb yeela katre :

« Fo yãa rũm-kãensã?

yaa m ba bõnyẽeg koamba.

Wa,

d na n kʋ-b lame!

D na n dɩk-b lame n kʋ »!

Bõnyẽ-bi wã ra bee tɩ-kẽeng tẽngre.

Soaamb vilimda tɩɩgã kudg n sul bõnyẽegã biig a korgẽ.

M ba katr yɛl sẽn pa tũud tɩrgã,

a sẽn dɩk bíigã,

a maaname t'a zugã wẽ tɩɩgã sɛɛga.

Bõnyẽegã biig kiime t'a rɩk-a kɩɩng n sul a korgẽ.

B yiibã loogame,

la b sẽn ta taoor bilf bala,

b sega bõnyẽ-yãangã.

B sẽn yã bõnyẽ-yãangã,

soaamb n yɩ pipi n yeele :

« Ha,

bõnyẽega !

tõnd da baooda foom !

Tõnd da gõodame n yã f koambã ka B ra yãbdame.

Tõnd nog-b lame n na n wa kõ-fo».

Bõnyẽeg pʋʋs-b-la barka la a yeele :

« Yiis-y-ba ».

M ba soaamb yiisa a rẽnda.

Bõnyẽ-bilã ra pa yi n sa la a wudg n na n bʋʋg a ma ye.

M ba katr ra pa yet tɩ bũmbu a ra pa yẽrgde.

Yẽ n pa yiisd a bõnyẽ-bíla,

yẽ n pa yet bũmb me.

Tɩ soaamb yeele :

« Haya.

Fo tog n yiisa bõnyẽeg biigã n kõ a ma ».

Tɩ katr yaa sɩɩ.

Sẽn yɩ bílfu,

a sẽn bãng tɩ yellã rat n lebga kɛgengã,

a suii a nug a korgã pʋga.

A yiisa biigã,

n lob-a zĩig zãorg la a sɩng zoeese.

Hal rũndã a ket n zoetame.