17 f maanda neer tɩ b rol-f beem.
Wakat ninga f maanda neer tɩ b rol-f beem.
Daar a yembre,
weoog bug-kẽeng n da na n dɩẽ gomtɩɔɔgo.
Sɩd me,
gomtɩʋʋg pa tʋʋl ye,
tɩ weoogã bugum yaool n da rɩt n wat tao-tao.
Ninsaaɩ sẽn yã tɩ gomtɩʋʋg ra bee yell pʋgẽ wã,
a rɩk a raoog n dɩgl tẽnga,
la gomtɩʋʋgã rʋʋ raoogã tɩ ninsaaɩ rɩk-a n tɩ ning ɩɩgg yokẽ.
Gomtɩʋʋg yeela ninsaala :
« M pʋʋsd-f-la bark wʋsg f sẽn yiis-m yel-to-kãngã pʋgẽ wã.
Sigr saag sã n Iʋɩ,
f sã n wa loogd ka n na n tɩ bʋde,
m na bãng n pʋʋs-f bark f sẽn maan-mã yĩnga».
Sɩd me sigr saag sẽn lʋɩ bala,
rao wã kẽnga ne a pag weoogẽ n na n tɩ bʋd ki.
A sẽn wa n ta tɩɩg ning a sẽn da saglẽ gomtɩʋʋgã sɛɛga a yeelame :
« Hey,
m zoa !
m waame».
Tɩ gomtɩʋʋg leoke :
« Pẽnege ».
Ninsaaɩ sẽn pẽneg yokã,
gomtɩʋʋg sẽnesa a ninẽ wã.
Rao wã nin muma woto t'a pa le tõog n ta weoogẽ wã ye.
Ad a sẽn pʋʋs-a bark to-to Ne sũ-sãanga,
rao wã yeela a pagã :
« D lebg n kuili.
Fo yãame ?
A wẽe mam ninã.
M na n tɩ,
maana bõe weoogẽ wã tɩ m sã n pa le neẽ ?
Wa,
d leb yiri ».
Sorã zugu,
b sega nameoongo.
Nameoong sok-b lame :
« Yaa bõe n paam yãmba »?
Rao wa ,
leokame n yeele :
« Yaa gomtɩʋʋg n sãam m nini ».
La yẽ sẽn maanã ne gomtɩʋʋg sẽn lebs-a wã kibare a wilgame.
Tɩ nameoong yeele :
« Aoo,
sã n yaa woto,
mam tõe n kõ-f-la tɩto,
mam tõeeme tɩ f ninã puki.
La mam sã n puk fo ninã,
yaa bõe la fo me na n rol-ma »?
« Sɩdã,
mam na n maan-f-la neere,
fo sã n na n puka mam ninã.
Sẽn na yɩl tɩ f yam gãande »,
rao wa sẽn Ieok n paase,
« ad mam sẽn na n togs foom :
maam,
m gʋʋnda noose.
Fo sã n puk mam ninã,
mam na n kõo foo m no-bi wã.
Kom sẽn tar foo wakat ning fãa,
mam na n kõ-f-la no-bi,
rẽ f paamdame n dɩ ».
Woto wã,
nameoong yeela rao wã t'a gãand zãmbɛɛla.
A zomba rao wã n na n tɩp-a :
a tʋbsa kolkood rao wã ninẽ la a pib a pɛgsã.
Rao wã nin pukame t'a pagã yas yɛɛ n pa mi a sẽn maand a soab ye.
Rao wã nin sẽn puk bala,
la a sẽn gãd nameoong karse :
« M na n maan-f-la wala gomtɩʋʋg sẽn maan ne maamã,
» rao wã sẽn yeele.
« Fo sã n maan ned sõm a soab rond-f-la beem ».
A wẽooga nameoong n gʋs a pɛgsã kõbd fãa gilli.
tɩ nameoong ra pa leb n tõe meng n mams yɩkr ye.
A pa kʋ-a yaa sɩda,
la a bas-a-la beell weoogẽ wã.
Wakat kãnga,
nameoong ra pa leb n mi a sẽn da na n maan to-to ning n dɩ ye :
sã n yaa ne sẽn segdã,
a ra yɩgdame n tʋgd n baood a rɩɩo,
la mosã wã a pɛgsã pa leb n tar kõbd ye,
t'a pa le tõe meng n yɩk ye.
A sɩd ra kẽngame n na n tɩ bao bũmb n dɩ la a ra ka yã ye.
Sẽn pa zãr wʋsg ne a sẽn beẽ wã,
kʋɩlg n da be be,
t'a kẽng kʋɩlgã noor n na n tɩ bao n dɩ.
A yãa kuri,
tɩ kurã yeel-a :
« Bõe yĩnga,
tɩ pĩnda,
mam sã n da yã foo f ra yɩkdame,
tɩ mosã fo pa leb n tõe n yɩke »?
« Mam maana rao sõm la rao-kãng rola maam a woto :
a gʋsa m pɛgsã kõbd zãnga.
Yaa rao wã n maan-m woto ».
Tɩ kur leoke :
« Kaanẽ,
bũmb kae n dɩtẽ ye,
la kʋɩlgã poore,
rɩɩb bee be nebã fãa yĩnga.
Wa zomb maam.
M na n dugame n tall-f n dʋʋg kʋɩlgã tɩ f tɩ paam n dɩ ».
Nameoong zomba kuri.
Kur kẽe koomã n dug ne nameoong a poorã zug a na n tall-a n dʋʋg kʋɩlgã.
A sẽn ta,
nameoong sɩd paama rɩɩbo ;
rɩɩbã ra bee sõma.
Rasem a yopoe bal pʋgẽ,
a kõbdã zãng le pusame.
Nameoong sẽn paam a pɛgsã yɛsã,
a boola kuri :
« Bõ,
fo maana maam neere.
Mam pa mi m sẽn na n maan bũmb ning n dol-f ye,
la mam tara zaka:
m na n dɩk-f lame n tɩ wĩnig-f m zakã rãmba,
f sẽn maan-m neerã yĩnga».
Kur sokame:
«Bõe la m tog n maane» ?
Nameoong gãandame,
kur zomba a poorã zug tɩ b yɩke.
Nameoong yukame n kaoose,
n zãag zĩig sõma.
A sẽn wa n yã zĩig sẽn yaa pĩig kugr gilli,
a bãnegame,
n lebg a meng n bas kur t'a lʋɩ pĩigã zugu.
Yãmb sẽn ne tɩ kur paokã tara sẽnesmã,
yaa nameoong sẽn maan-a wã n wa ne rẽ.
Wakat ninga,
f maanda neer tɩ b lebs-f wẽenga.