16 No-raoogo ne bʋʋga.

Rotã sẽn tar sug-moosã yĩnga,

bãn-poak taba sugrã ne lalgã sʋk wakat fãa.

Daar a yembre,

koambã noga raad la ra-sab n maan saag buudu,

n sɩng roogã gilgr n na n yiis bãn-poaka.

No-raoog sẽn wʋm kibarã pĩndã,

a yeela zakã rũms a taabã tɩ b wa tao-tao n wa ges koambã sẽn maand bũmb ningã tɩ sã n pa rẽ b tõe n wa waa ne yel-wẽn-bɛda,

tɩ b na n wa kʋʋ bãn-poaka.

Pʋg-yãan-bãad meng n da be roog ning koambã sẽn da rat n tɩ yiisẽ bãn-poakã n gãe.

No-raoog yeela bʋʋga :

« Kẽng n tɩ ges koambã sẽn maand bũmb ningã,

tɩ b na n waa ne yel-beedo ».

Bʋʋg yeelame :

« Ayo,

bas koambã .

Pa yell sẽn pak tõnd ye ».

Tɩ no-raoog leoke :

« maan gũusgu,

sẽn pak bãn-poak mosã wã tõeeme n wa lebg tõnd yell n wʋm-d sõmbo ».

Roogã pʋgẽ,

waood n da tar pʋg-yãan-bãadã wʋsgo.

A ra yõgna bugum n wootẽ.

Koambã ra tara kãnkãre,

n dɩk n sẽgemd sugrã ne lalgã sʋk n zoet n gilimd roogã,

sẽn na yɩl n maan bʋʋr tɩ bãn-poakã yi.

Saag n da sẽg sugrã zugu.

Koambã sẽn zoet n gilimd roogã maaname tɩ saagã lʋɩ bugmẽ wã.

Roogã yõka bugum.

Pʋg-yãangã pa tall pang sẽn sek a na paam a meng n yi ye.

Ned sẽn yaa kaseng sã n ki,

b tog :

kõo kũumã no-raoogo.

Wakat-kãnga no-raoog yeela bʋʋga :

« ade,

mos yellã taa tõnd me ».

No-raoog sɩd neeme n yɩɩda :

a ya kʋdre n le ne yɩɩga.

A vɩɩ ne ninsaalba n mi b manesem-dãmba.

La bʋʋgã yẽ sẽn vɩ yɩng la a ya yãagã,

a pa n yel-beed sẽn wat ye.

Sɩd yɩ woto,

tɩ reng n wa yõk no-raoog n looge,

n tɩ wa tall bʋʋg n looge.