14 Rao ne a pagba a yiibu.
Rao a ye n da tar pagb a yiibu.
B roagdbã yiy ra zãra haɩ wʋsgo.
Yɩl n tɩ ges-b b tẽngẽ wã,
pagbã ra pɩʋʋgda kãgre.
La kãgrã pʋg me,
rũm-bees n da be be n tõe n yõk neda.
Pag a ye n wa n yik t'a na n tɩ gesa a roagdba.
A sɩdã mee tãnd teoog sẽn wõnd bao-bila,
sẽn tõe n tus tɩ bilmi,
n ning kʋɩleng sẽn ya bilf sẽn na yɩl t'a pagã tõog n kẽ n pag a meng pʋgẽ,
la võy vʋʋsgã yĩnga.
Yaa ne bao-bil-kãng la pagã ra tõe n tɩ ges a roagdbã.
Baag sẽn tõe n tus baoorã tɩ bilim n da na n yãag-a t'a paam n ta a roagdbã nengẽ ne bãane.
A sẽn wa n kẽn n ta zĩig a ye,
kãgrã sũ-nifẽ,
we-rũms n seg-a n na n gɩdg a sorã.
Pagã sẽn da põg bao-bilã pʋgẽ wã boola baagã t'a rig we-rũmsã,
la talla woto tɩ b wa ta a roagdbã tẽngẽ.
B sẽn ta,
b laka kʋɩlen-bilã tɩ pagã paam n yi n na n vʋʋs n le gũud a lebgr daare.
Pagã ra mii vẽeneg tɩ ra yaa wẽnd maag baagã t'a paam n yi a sorã n pa paam zu-beed ye :
yẽ sã n dag pa beẽ,
a rag n da pa tõe n ta a roagdbã tẽngẽ ye.
Rẽ wã,
b sã n da segl rɩɩb n kõ pagã,
pipi,
a ra yãkda a rɩɩbã pedg n kõ baagã.
Wakat fãa,
baagã ra rɩta a yam.
B sã n da kõ-a ko-yũudum,
a ra rengdame n yãk n kõ baagã,
kɩtame tɩ ko-yũud pa tol n yõk baagã ye.
A sẽn wa n zĩnd a roagdbẽ wã n ta a daare,
a leba a tẽngẽ.
A sẽn lebã,
a pʋg-to wã yeelame t'a ratame n kẽng n tɩ ges a roagdbã.
La sorã woglem gill sẽn da pid ne we-rũm-bees yĩnga,
rẽnd t'a ra paam bũmb sẽn na sõng-a t'a paam n ta ne bãane.
A sɩdã maana a sẽn da maan bũmb ning n kõ pag a ye wã n ko-a.
Teoog sẽn wõnd bao-bila,
tɩ tõe n tus tɩ bilmi,
n tar kʋɩleng sẽn ya bilfu,
sẽn na yɩl t'a pagã tõog n kẽ n pag a meng pʋgẽ,
la tar võy vʋʋsgã yĩnga.
A kɩtame tɩ baag ning sẽn da yãag a ye wã yãag-a.
B sẽn ta wã,
b sã n kõ pagã rnb fãa,
a ra pa kõt baagã baa fʋɩ.
B sã n da kõ-a ko-yũudum,
a ra pa kõt baagã bũmb ye.
Baagã yaool n da yãag-a-la sõmb n maan a sẽn datã fãa !
B sẽn wa lebgdẽ wã,
n wa ta kãgrã pʋga,
we-rũmsã pẽnega bao-bilã n na n gɩdg a sore.
Pagã sẽn da põg bao-bilã pʋgẽ wã boola baagã,
n bool-a n konge :
baagã pa wa fãag-a ye.
A ra bas-a lame la yẽ me rɩk a sor n looge.
We-rũmsã wãaga bao-bilã,
n sak pagã n wãbe,
bala a ra pa sak n pʋɩ a rɩɩbã ne a baagã ye,
tɩ rẽ kɩt tɩ baagã ra lʋɩ,
taoor n na n bao bũmb n dɩ.
F sã n dut f ye,
f kiida f ye.
Dɩt m ye kiida m ye.