Daar a yembre,

m ba soaamb kẽnga me n tɩ yã tẽngã naab n na n kos-a pag a yiib-n-soaba.

Ad a sẽn yeele :

« Naaba,

mam pag yaa a yembr tãa,

foom,

fo tara pagb pisi bɩ pis-tã.

La mam miime ;

tɩ fo sa n yet tɩ b moe sagbo,

bɩ b kõg rãam,

fo pagbã sẽn lagem taab pa na n deng mam pʋg-yendã n sa ye »!

« Re sẽ pa tõe n yɩ sɩd ye !.

Naab sẽn yeele.

« Fo yeelame tɩ pa tõe n yɩ sɩd ye,

maam yẽ yetame tɩ yaa sɩda.

Sẽn ket mosa yaa d mak wɛ.

Mam paga sã n yɩ pipi n deng n kõg rãamã n sa,

fo na n kõo maam pag tɩ m paas tɩ lebg a yiibu ».

Naab sakame tɩ b kɩs rãamã kõgb daare.

Daarã sẽn ta,

soaamb pag sẽn da ya a ye wã,

a yika tõdbeoog pĩnda,

n tɩ bao koom n wa sɩng toobo.

Rẽ tɩ naab pagbã ra nan pa kẽng kuɩlg ye.

Naab pagbã sẽn wa n ta kʋɩlgẽ wã,

soaamb sɩnga yɩɩla :

« M kot-y lame tɩ y tall m kʋndã n wa

kõ-m tɩ m yɩɩl yɩɩl-noog n kõ-yã.»

A yɩɩlã ra nooma wʋsgo la a wogem wʋsgo :

pagbã,

yɩɩllã yirb-b lame,

tɩ b rɩgl b yuyã n sɩng saooga.

Tɩ soaamb ket n tar yɩɩl la a tar saooga.

« Ad naab pagbã sẽn be ka.

Tall-y m kʋndã n wa kõ-m tɩ m yɩɩl yɩɩl-noog n kõ-ba».

Naabã pagb paa be,

n kelgdẽ la b saoodẽ,

tɩ wa ta lɛɛr a yiibu.

Rẽ yĩnga,

naabã sẽn da pa ne-b tɩ b watẽ wã,

a tʋma a sõgen-dãmb tɩ b kẽng n tɩ gese,

yaa bõe n kɩt t’a pagbã kẽng kʋɩlgẽ hal yibeoogẽ n ket n nan pa wa.

Sõgen-dãmbã sẽn ta kʋɩɩlgẽ wã m ba soaamb toeema yɩɩlle,

n lebs n yɩɩnd yɩɩlɩ a to :

« Ad naabã sõgen-dãmb sẽn wate, ad

naabã sõgen-dãmb sẽn wate !

Wa-y-yã la y tall m kʋndã n wa kõ-m tɩ m tõog n saoolg-yã».

Tɩ sõgen-dãmbã pa be n kelgd-a la b saoodẽ.

Tɩ wakatã tar loogre :

lɛɛr a ye,

lɛɛr a yi,

lɛɛr a tã tɩ naab zĩ n gũudẽ tɩ ned na lebg n wa tɩ ned pa watẽ ye.

Rẽ yĩnga,

a meng yãka yam n na n tɩ ges a toore,

bũmb ning sẽn da be kʋɩlgẽ wã.

Hal yibeoogẽ,

a pagbã kẽngame,

t'a lebs n kɩt ta sõgen-dãmb kẽnge tɩ ned ba a ye pa lebg n wa ye.

Rẽnd naabã zomba a weef n kẽng kuɩlgẽ wã.

Soaamb sẽn yã a sẽn watã,

a le toee ma a yɩɩllã :

« Ad naab meng sẽn wat a toore.

Ad naab a toore !

Wa,

tall m kʋndã n wa kõ-m tɩ m tõog n yɩɩl n kõ f la m saoolg-fo » !

Yɩɩllã kẽe naaba,

t'a sig n bas weefã,

la sɩd yɩɩ gesg tɛkẽ.

Naab ne a zakã rãmb fãa kẽe saoogẽ wã.

La,

m ba soaamb ra miime t'a pagã ra tʋmdame,

n tʋmd n pa yaadẽ ye.

A sẽn wa n tags tɩ wã t'a saame wã,

a basa yɩɩlã.

Nand tɩ pagbã yãk koomã tɩ naab meng lebg n zoe n kulã,

rẽ tɩ soaamb pag ra zoe n tedga a rʋgd sẽn pid ne rãam.

Tɩ naab yeele :

«Rũndã tɛka,

mam mengã ne m zak rãmb fãa yaa m ba soaamb n so-do !

Yɩɩ woto tɩ soaamb na n lebg tẽn-kãng naaba.