Ned pa tog n yeele,

tɩ yẽ yam yɩɩda a to ye

M ba soaamb yetame tɩ yẽnda yam n yɩɩd weoogã rũms fãa.

Sɩd me,

a tara sɩlem wʋsgo,

ba t'a pãngã pa yɩɩd we-rũms a taabã.

Daar a yembre,

rayʋʋga,

a paa a bokã pʋga,

n yãk yam n na n gese soaamb sɩd tara yam n yɩɩd a taab wa a sẽn bilgdã bɩ.

A tʋg n bʋʋga soaamb n yeel-a t'a wa tɩ b tɩ bao gɛla.

B yiibã tũu taab n kẽng gɛlã baoobo.

Sẽn wa n beẽ,

rayʋʋg yãa gɛl n yeele :

« Ad m gɛla » !

La Soaamb sokame :

«Yaa gɛl a wãna »?

«Yaa piiga » !

« Õhõo,

yaa mam pag a Pok gɛla :

yẽ n deng n yã-b pipi n togs maam t'a yã-b lame » !

La woto wã,

a reega galã n yeel tɩ yaa yẽ n so.

B sẽn yi n kẽnã fãa,

rayʋʋg sã n wa yã gɛla,

yaa m ba soaamb n deegde,

tɩ bala wakat fãa a yãta yam n wilg tɩ gɛlã yaa yẽ n so.

B wa n lebg n kuiisame,

tl,

m ba rayʋʋg ra nan pa paam bũmb ye.

Sorã kɩrenga,

rayʋʋg yãa gell a ye,

n yeele :

« Ad m gelle » !

Sẽn yaa gel-yend la a paoodẽ wã,

soaamb tãsame 'n yeele :

« Ay,

yaa mam pagã n konge.

A pa yã gel-kãngã ye » !

Ned kam fãa sẽn wa n lebg n ta a yiri,

rayʋʋg tagsdame n baood a sẽn tõe n maaneg n deeg gɛlã zãnga,

A kẽe a bokã pʋg n pag a menga,

n sõs ne a pag n wilg-a yam buud toay-toay a sẽn tog n dɩke.

N yaool n sɩng yãbr n yetẽ tɩ pʋ-zab-toaag n tar-a.

A pa keem ye,

a gãeeme,

a yãbdame n maand nimbãanega.

A pagã yii roogẽ wã n ning no-beongo :

« bʋk n paam maam !

bʋk n paam maam !

mam sɩdã ra rɩka gell a ye bala tɩ gel-kãng kʋ-a !

Rɩlla d lob-ba » !

M ba soaamb sẽn wʋm dẽ,

rabeem kẽ-a-la sõma t'a yeel a pagã :

«Ha,

Poko !

d ra rɩ gel-kãensã ye !

Bala gel-yendã rayʋʋg sẽn dɩkã kʋ-a lame.

Rɩk n tɩ lobe »!

Rayʋʋg sẽn da gũusd soaamb memesmã,

yãame t’a yi yʋn-sʋk ne a paga,

n na n tɩ lob gɛlã.

Rayʋʋg ne a pagã lamsame n pʋg-ba,

n tɩ wʋk gɛlã zãnga.

Soaamb yeelame tɩ yẽ la yam soaba,

la rayʋʋg wilgame tɩ,

yẽnda yam n yɩɩd-a.