5 Koadeng ne soaamba.
Pĩnd wẽndẽ,
soaamb ne koadeng ra yaa zoodo.
B gõob a ye wakato,
b tõogame n yõk naafo,
n yãk yam tɩ b na n kʋɩ-a lame n pʋɩ a nemdã.
« N-ye » ,
b sẽn yeele,
« d na n maana woto :
d na n sẽb-a lame tɩ beoog yibeoog bɩ d ku-a ».
B loee naafã.
Koadeng rʋʋ gadre,
tɩ soaamb kuil a yiri.
A tɩ yeela a zakã rãmba :
«Beoogo,
koadeng ne maam,
d na n kʋʋ naafo,
la mam datame tɩ y pɩʋʋg be n paam n wʋk nem-sõmsã n da bas bũmb n kõ koadeng ye ».
A vẽk-n-beoogã yibeoog sẽn ta,
soaamb ne koadeng kʋʋ naafã n sɩng a pasbo,
sorã noor bala.
B sẽn wa n yãk a gãongã n sa n pas nemdã,
ad m ba soaamb zakẽ ned sẽn wa.
« Ha,
koadenga,
yaa mam pagã la sẽn loogdã.
D pa na n kõ-a bũmbu »?
Tɩ koadeng yeele :
« Aoo,
m sakame,
fo sẽn yeel yaa sõma » .
Tɩ soaamb rɩk ger n kõ a paga,
sẽn na yɩl tɩ yẽ me paam bũmbu.
Minit a yiib loogr poore,
ad soaamb a to sẽn wate.
« Ha,
yaa mam pagã baaba la sẽn watã.
D na n maana wãna »?
Tɩ koadeng yeele :
« Maan fo sẽn tagsd tɩ yaa soma ».
B rɩka taoor nao a yiibã n kõ soom-sãangã,
tɩ yẽ me loog t'a sũur noomẽ.
Sẽn yɩ bilfu,
ad soaamb reem-poak sẽn wate.
«Ad m reem-poak sẽn wate.
D na n maana wãna »?
Tɩ koadeng yeele :
« Ay,
fo sẽn date.
D na n kõ-a-la bũmbu ».
B pʋɩɩ naafã woto tɩ wa kell Zug la yãado.
tɩ ra ket n nan pa sa ye.
Zĩig pʋgẽ,
ad soaamb baaba meng sẽn wate.
« Ha,
ad m baaba sẽn wate !
d na n maana wãna ?
Sẽn ket d nugẽ yaa zugã la yãadã bala».
Rẽ sẽn loogã,
naafã zãng pʋɩɩme tɩ sa.
Sãoorã bal n da kell bãmb b yiib rẽnda.
B yãka yam n na n pʋɩ-a.
La,
rẽ ra pa ta soaamb yam ye,
t'a yeele :
« Foo,
fo yaa kɩdg n pa ta maam ye.
Fo pʋɩɩrã na n yɩɩ kɩdga ».
Koadeng pa yet tɩ bũmb ye.
A goka a neong ne a noor n yɩk n kuil saasẽ.
La,
ad a sẽn leeb n lʋɩ a poor zug soaamb taoore,
n yãbd n yetẽ tɩ naafã ra zẽname.
A lʋɩɩme n ki.
Soaamb zoe n kuilame n tɩ yeel a zak rãmba :
" Lebg-y n wa-y-yã,
lebg-y n wa-y ne y nemdã fãa !
Yaa nemd sẽn zẽne !
Koadeng kiime » !
Soomsã fãa sẽn wa n lebg n wa ne b nemdã n bas n looge,
koadeng sẽn da ket n gãe tẽng a poorã zugã,
a yikame n bool a zak rãmb tɩ b rɩk naafã nemd zãng n kuil b yiri.
So-kãngã,
koadeng sɩlem yɩɩga soaamba.