Zulu ya malu-malu mpe ntoto ya malu-malu
21
Na yina,
mu talaka zulu ya malu-malu mpe ntoto ya malu-malu.
Zulu ya ntete mpe ntoto ya ntete vwandaka me zimbana,
mpe mubu vwandaka dyaka ve.
2 Mu talaka mpe mbanza ya longo*,
Yelusalemi ya malu-malu,
yina katukaka na zulu na sika ya Nzambi mpe kulumukaka na ntoto.
Yawu vwandaka ya kukubama mutindu kento yina me bongisa nzutu samu na bakala ya yandi.
3 Na manima,
mu kuwaka ndinga ya ngolo yina wakanaka sika vwandaka kiti ya kintinu.
Yawu tubaka:
"Ntangu yayi,
Nzambi ke zinga na kati-kati ya bantu!
Yandi ke zinga na bawu,
mpe bawu ke vwanda bantu ya yandi.
Yandi mosi Nzambi ke vwanda Nzambi ya bawu,
mpe ke vwanda kintwadi na bawu.
4 Yandi ke kusuna mansangasa nyonso yina kele na meso ya bawu.
Bantu ke kufwa dyaka ve,
ke vwanda dyaka ve na mawa,
ke dila dyaka ve,
to ke tala dyaka ve mpasi,
samu ti mambu nyonso ya yinza ya ntama ke zimbana."
5 Na yina,
muntu yina vwandaka ya kuvwanda na zulu ya kiti ya kintinu tubaka:
"Ntangu yayi,
mu ke sala ti bima nyonso kuma ya malu-malu."
Na manima,
yandi zabisaka munu:
"Sonika mambu yayi,
samu ti mambu ya munu kele ya tsyelika mpe ya kudedama*."
6 Yandi bwelaka dyaka:
"Nyonso me salama!
Mu kele Alafa mpe Omengaa,
mbandukulu mpe nsuka.
Kana muntu kele na nsatu ya maza,
mu ke pesa yandi maza ya mpamba na mukelo ya maza yina ke pesaka luzingu.
7 Mu ke pesa difwa yina na muntu yina ke nunga.
Mu ke vwanda Nzambi ya yandi,
mpe yandi ke vwanda mwana ya munu.
8 Samu na bayina kele na boma,
bayina kele ve ya kukwikama,
bayina kele na bifu ya yimbi,
bayina ke kufwaka bampangi,
ke salaka busafu,
ke salaka bunganga,
ke sambilaka banzambi ya biteki,
mpe bayina nyonso ke vunaka,
kisika ya bawu kele na kati ya dyanga ya tiya mpe ya sufe*.
Yawu kele lufwa ya zole samu na bawu."
Yelusalemi ya malu-malu
9 Na yina,
mosi na kati ya bambazi* sambwadi yina simbaka bambungu sambwadi ya kufuluka na bampasi sambwadi ya nsuka zabisaka munu:
"Kwiza mpe mu ke lakisa nge kento yina Dimeme ke kwela."
10 Mbazi nataka munu na kimpeve na zulu ya mongo ya nene mpe yinda.
Yandi lakisaka munu mbanza ya longo*,
Yelusalemi,
yina katukaka na zulu na sika ya Nzambi,
mpe kulumukaka na ntoto.
11 Yawu vwandaka lezima na nkembo ya Nzambi.
Yawu vwandaka lezima mutindu ditadi ya ntalu,
ditadi ya zape yina vwandaka lezima mutindu kitala-tala.
12 Mbanza yango vwandaka na bibaka ya yinda mingi.
Yawu vwandaka na myelo kumi na zole,
mpe bambazi kumi na zole vwandaka keba myelo yina.
Bankumbu ya bifumba kumi na zole ya Isayeli vwandaka ya kusonama na myelo yina.
13 Konso lweka vwandaka na myelo tatu:
myelo tatu na esete,
myelo tatu na node,
myelo tatu na sude,
mpe myelo tatu na wesete.
14 Bibaka ya mbanza vwandaka ya kutunga na zulu ya balufulu kumi na zole,
mpe na zulu ya yawu ba sonikaka bankumbu ya bantumwa* kumi na zole ya Dimeme.
15 Mbazi yina vwandaka zonza na munu simbaka kima ya kuteza yinda:
Ya vwandaka didyadya ya wolo samu na kuteza yinda ya mbanza,
ya myelo,
mpe ya bibaka ya mbanza.
16 Balweka nyonso yiya ya mbanza vwandaka yinda mutindu mosi.
Mbazi tezaka mbanza na didyadya ya yandi,
mpe kuzwaka basitade mafunda kumi na zoleb na yinda.
Yinda ya mbanza na balweka nyonso yiya mpe yinda ya ntela ya yawu vwandaka mutindu mosi.
17 Yandi tezaka mpe yinda ya bibaka kubanda na yinsi tii na zulu,
mpe kuzwaka bakude nkama mosi makumi yiya na yiyac.
Mbazi sadilaka mutindu ya kutanga yina bantu nyonso ke sadilaka na kutanga yinda.
18 Bibaka ya mbanza vwandaka ya kutunga na matadi ya ntalu ya zape,
mpe mbanza vwandaka ya kutunga na wolo ya kuvedila yina vwandaka talana mutindu kitala-tala.
19 Matadi yina ba tungaka balufulu ya bibaka ya mbanza vwandaka ya kubongisa na matadi ya ntalu ya konso mutindu.
Lufulu ya ntete vwandaka na ditadi ya zape,
ya zole na safile,
ya tatu na angate,
ya yiya na emelode,
20 ya tanu na onise,
ya sambanu na sandwani,
ya sambwadi na kizolite,
ya nana na belile,
ya yivwa na topaze,
ya kumi na kizopase,
ya kumi na mosi na tikwase,
mpe ya kumi na zole na ametite.
21 Myelo kumi na zole ya mbanza vwandaka bapalata kumi na zole,
mpe konso mwelo vwandaka ya kuyidika na palata mosi.
Kisika ya mfunu ya mbanza vwandaka ya kubongisa na wolo ya kuvedila yina vwandaka talana mutindu kitala-tala.
22 Mu talaka ve Yinzo ya Nene ya Nzambi na kati ya mbanza yina,
samu ti ni Mfumu* Nzambi-Mpungu mpe Dimeme kele Yinzo ya Nene ya Nzambi ya mbanza yina.
23 Mbanza vwandaka ve na nsatu ya nsemo ya ntangu to ya ngonda,
samu ti nkembo ya Nzambi vwandaka pesa yawu nsemo,
mpe Dimeme kele mwinda ya mbanza yina.
24 Bantu nyonso ya yinza ke tambula na nsemo ya yandi,
mpe bantinu ya yinza ke nata bimvwama ya bawu kuna.
25 Myelo ya mbanza ke vwanda kaka ya kufunguka,
samu ti mpimpa ke vwanda dyaka ve na kati ya mbanza yina.
26 Bawu ke nata kuna nkembo mpe bimvwama ya bayinsi nyonso.
27 Ata kima ya busafu ke kota na mbanza yina,
mutindu mosi mpe,
bantu yina ke salaka mambu ya busafu mingi,
mpe bantu ya luvunu.
Kasi kaka bantu yina kele na bankumbu ya bawu ya kusonama na dibuku ya luzingu yina kele dibuku ya Dimeme,
ke kota na mbanza yina.