Kimfumu yina ke zinga bamvula funda
20
Na manima ya mambu yina,
mu talaka mbazi* mosi yina katukaka na mazulu mpe kulumukaka na ntoto.
Yandi vwandaka ya kusimba fungula ya dibenga ya yindaa mpe singa ya nene ya kisengo.
2 Yandi nataka dalangob,
nyoka ya ntama,
yina kele Dyabulu mpe Satana,
mpe kangaka yandi bamvula funda.
3 Mbazi losaka dalango na kati ya dibenga ya yinda.
Yandi kangaka yawu na fungula mpe tulaka bisengo samu na kanga yawu mbote,
samu ti dalango vuna dyaka ve bantu tii ntangu ke lunga bamvula funda.
Na manima ya bamvula funda yina,
ba fwana kupesa yandi mwa ntangu ya kimpwanza.
4 Na manima,
mu talaka bakiti ya bantinu.
Bayina vwandaka na zulu ya yawu,
kuzwaka lutumu ya kufundisa.
Mu talaka mpe myela ya bayina ba kufwaka,
samu ti bawu vwandaka bambangi ya Yesu mpe zabisaka mambu ya Nzambi.
Bawu sambilaka ve kibulu ya ngitukulu to kifwiti ya yandi,
mpe bawu kuzwaka ve kidimbu ya yandi na mbunzu to na diboko.
Bawu vutukaka na luzingu,
mpe vwandaka yala na Klisto* na bamvula funda.
5 Bantu ya nkaka yina kufwaka vutukaka ve na luzingu ntete bamvula funda lunga.
Yayi ni mvumbukulu ya ntete ya bantu na lufwa.
6 Kyese na bayina kele na kati ya nkonga ya mvumbukulu ya ntete yayi!
Bawu kele bantu ya longo*,
mpe lufwa ya zole lenda kuzwa bawu ve.
Bawu ke vwanda banganga-Nzambi yina ke sadila Nzambi mpe Klisto,
mpe bawu ke yala na Klisto na bamvula funda.
Muzingu ya nsuka
7 Ntangu bamvula funda ke lunga,
ba ke basisa Satana na boloko.
8 Yandi ke kwenda kuvuna banyinsi yina kele na yinza nyonso,
yina zola kutuba Ngonge mpe Mangongec.
Yandi ke vukisa bawu sika mosi samu na muzingu,
mpe bawu ke vwanda mingi mutindu matadi ya zyelo ya kumu ya mubu.
9 Bawu vwandaka ya kumwangana na bisika nyonso na kati ya yinza,
mpe zungaka sika yina vwandaka bantu ya longo* mpe mbanza yina Nzambi ke zolaka mingi.
Kasi tiya katukaka na zulu,
mpe yokaka bawu.
10 Na yina,
ba losaka na kati ya dyanga ya tiya mpe ya sufe*,
Satana yina vwandaka vuna bawu.
Kibulu mpe mumbikudi* ya luvunu vwandaka mpe kuna na kati ya dyanga yina ya tiya.
Kuna bawu ke tala mpasi ya seko mpimpa na ntangu.
Lufundusu ya nsuka
11 Na yina,
mu talaka kiti ya nene ya mpembe ya kintinu.
Muntu vwandaka na zulu ya yawu.
Zulu na ntoto kimaka ntama na ntwala ya yandi,
mpe yawu talanaka dyaka ve.
12 Na manima,
mu talaka bantu ya kufwa,
bakuluntu mpe bana ya fyoti ya kutelama na ntwala ya kiti ya kintinu.
Mu talaka mpe mabuku ya kufunguka.
Dibuku mosi dyaka ya nkaka zibukaka,
ya kele dibuku ya luzingu.
Bantu ya kufwa kuzwaka lufundusu na mambu yina bawu salaka mutindu yawu vwandaka ya kusonama na mabuku.
13 Mubu basisaka bantu yina kufwaka na kati ya mubu.
Lufwa mpe yinza ya bantu ya kufwa basisaka mpe bantu ya bawu ya kufwa,
mpe bawu nyonso kuzwaka lufundusu na yina me tadila mambu yina bawu salaka.
14 Na manima,
ba losaka lufwa mpe yinza ya bantu ya kufwa na kati ya dyanga ya tiya.
Dyanga yina ya tiya,
ni lufwa ya zole.
15 Ba losaka mpe na kati ya dyanga ya tiya konso muntu yina nkumbu vwandaka ve ya kusonama na dibuku ya luzingu.