Kikangulu ya sambwadi
8
Ntangu Dimeme fungulaka kikangulu ya sambwadi,
zulu nyonso kumaka swi,
mpe yawu vwandaka mutindu yina miniti makumi tatu.
2 Na manima,
mu talaka bambazi* sambwadi yina ke vwandaka na ntwala ya Nzambi.
Ba pesaka bawu bakulumenta* sambwadi.
3 Mbazi ya nkaka kwizaka telama pene-pene ya kisika ya kuyoka minkayulu,
mpe vwandaka ya kusimba ndonga ya wolo yina ba ke yokaka mananasi.
Ba pesaka yandi mananasi mingi samu ti yandi yoka yawu samu na Nzambi,
kintwadi na balusambulu ya bantu nyonso ya longo*,
na kisika ya wolo ya kuyoka minkayulu yina kele na ntwala ya kiti ya kintinu.
4 Mulinga ya mananasi vwandaka katuka na maboko ya mbazi mpe vwandaka kwenda na ntwala ya Nzambi,
kintwadi na balusambulu ya bantu ya longo.
5 Na manima,
mbazi bakaka ndonga yina ba ke yokaka mananasi.
Yandi fulusaka yawu na tiya ya kisika ya kuyoka minkayulu,
mpe losaka yawu na ntoto.
Kaka na ntangu yina,
bidumu mpe ndinga wakanaka,
bansemo basikaka,
mpe ntoto ninganaka.
Bakulumenta yiya ya ntete
6 Na yina,
bambazi* sambwadi yina simbaka bakulumenta* sambwadi kubamaka samu na kusika yawu.
7 Mbazi ya ntete sikaka kulumenta.
Mvula ya matadi mpe tiya ya kuvukana na menga kubwaka na ntoto.
Na yina,
mwa ndambu ya ntoto mpe ya bayinti kuyaka,
mutindu mosi mpe matiti nyonso yina ke ntete ve ya kuyuma.
8 Na manima,
mbazi ya zole sikaka kulumenta.
Kifwani ya mongo ya nene yina ke na kuya tiya kubwaka na kati ya mubu,
mpe mwa ndambu ya mubu kumaka menga.
9 Mwa ndambu ya bambisi nyonso ya mubu kufwaka,
mpe mwa ndambu ya masuwa mwanganaka.
10 Mbazi ya tatu sikaka kulumenta.
Mbwetete ya nene yina vwandaka kuya tiya mutindu kisisi ya tiya,
katukaka na zulu mpe kubwaka.
Yawu kubwaka na zulu ya mwa ndambu ya banzadi mpe ya mikelo ya maza.
11 Nkumbu ya mbwetete yango "Ndudi".
Na yina,
mwa ndambu ya maza kumaka ndudi,
mpe bantu mingi kufwaka,
samu ti bawu kunwaka maza yina ya ndudi.
12 Mbazi ya yiya sikaka kulumenta.
Mwa ndambu ya ntangu,
ya ngonda,
mpe ya bambwetete vwandaka dyaka ve na nsemo,
mutindu mosi mpe,
mwa ndambu ya kilumbu mpe ya mpimpa vwandaka mpe dyaka ve na nsemo.
13 Mu talaka mbemba yina vwandaka dumuka na kati-kati ya zulu.
Yandi vwandaka looka na ndinga ya ngolo:
"Kyadi!
Kyadi!
Kyadi mingi na bantu yina ke na kuzinga na ntoto ntangu bambazi tatu yina me bikana ke sika bakulumenta ya bawu!"