Bifumba ya yinsi ya Isayeli
7
Na manima ya mambu nyonso yina,
mu talaka bambazi* yiya ya kutelama na bansongi yiya ya ntoto.
Bawu vwandaka kanga bitembo nyonso yiya,
samu ti ata kitembo kufula na ntoto,
na mubu,
to na bayinti.
2 Mu talaka dyaka mbazi ya nkaka yina vwandaka basika na lweka yina ke basikaka ntangu,
mpe vwandaka ya kusimba kinyemo ya Nzambi ya moyo.
Na ndinga ya ngolo,
yandi lookaka na sika ya bambazi yiya yina Nzambi pesaka lulendo ya kusala yimbi na bima nyonso yina kele na ntoto mpe na mubu:
3 "Beno bebisa ve ntoto,
mubu to bayinti,
ntete beto tula binyemo na mbunzu ya bisadi ya Nzambi ya beto."
4 Na yina,
ba zabisaka munu lutangu ya bayina ba tulaka kinyemo ya Nzambi na mbunzu:
nkama na makumi yiya na yiya ya mafunda ya bantu ya bifumba nyonso ya yinsi ya Isayeli.
5 Na kati ya lutangu yina,
ya vwandaka na
bantu mafunda kumi na zole ya kifumba* ya Yuda,
bantu mafunda kumi na zole ya kifumba ya Lubeni,
bantu mafunda kumi na zole ya kifumba ya Ngade,
6 bantu mafunda kumi na zole ya kifumba ya Asele,
bantu mafunda kumi na zole ya kifumba ya Nefetali,
bantu mafunda kumi na zole ya kifumba ya Manase,
7 bantu mafunda kumi na zole ya kifumba ya Simeyoni,
bantu mafunda kumi na zole ya kifumba ya Levi,
bantu mafunda kumi na zole ya kifumba ya Isakale,
8 bantu mafunda kumi na zole ya kifumba ya Zabuloni,
bantu mafunda kumi na zole ya kifumba ya Yosefi,
mpe bantu mafunda kumi na zole ya kifumba ya Bezame.
Bantu ya bayinsi nyonso
9 Na manima ya mambu nyonso yina,
mu talaka nkonga ya nene ya bantu yina ata muntu lendaka pesa lutangu.
Ya vwandaka bantu ya bayinsi nyonso,
ya bifumba nyonso,
ya makanda nyonso,
mpe ya bandinga nyonso.
Bawu vwandaka ya kutelama na ntwala ya kiti ya kintinu mpe Dimeme.
Bawu lwataka mazwela ya mpembe ya yinda,
mpe simbaka mandala na maboko.
10 Bawu vwandaka looka na ngolo nyonso:
"Mpulusu kele na Nzambi ya beto
yina kele ya kuvwanda na kiti ya kintinu,
mpe na Dimeme!"
11 Bambazi* nyonso zungaka kiti ya kintinu,
bakuluntu,
mpe bima yiya ya moyo.
Bawu fukamaka kizizi na ntoto na ntwala ya kiti ya kintinu mpe sambilaka Nzambi
12 na kutuba:
"Ameni*!
Masiika,
nkembo,
ndwenga,
matondo,
buzitu,
lulendo,
mpe ngolo
kele seko na Nzambi ya beto!
Ameni."
13 Na yina,
mosi na kati ya bakuluntu yufulaka munu:
"Bantu yina me lwata mazwela ya yinda ya mpembe kele banani,
mpe wapi sika bawu me katuka?"
14 Mu vutulaka:
"Mfumu*,
ni nge zaba yawu".
Na yina,
yandi zabisaka munu:
"Ya kele bayina ba talisa mpasi mingi.
Bawu me sukula mazwela ya bawu,
mpe me kumisa yawu mpembe na menga ya Dimeme.
15 Ni yawu yina,
bawu kele na ntwala ya kiti ya Nzambi,
mpe ke na kusadila yandi mpimpa na ntangu na kati ya yinzo ya yandi.
Muntu yina kele ya kuvwanda na kiti ya kintinu ke keba bawu mpe ke sala nyonso samu na mbote ya bawu.
16 Bawu ke vwanda dyaka ve na nsatu ya kudya mpe ya kunwa.
Ntangu mpe tiya ya ngolo ke yoka dyaka ve bawu.
17 Ya tsyelika,
Dimeme yina kele na kati-kati ya kiti ya kintinu ke keba bawu mutindu muvungi.
Yandi ke nata bawu sika kele mikelo ya maza yina ke pesaka luzingu,
mpe Nzambi ke kusuna mansangasa nyonso ya bawu."