Mukanda ya
LUZABUSU
Mbandukulu
1
Dibuku yayi ke na kuzabisa mambu ya kubumbama yina Nzambi lakisaka na Yesu-Klisto*,
samu ti yandi lakisa na bisadi ya yandi mambu yina ke salama na bilumbu ke na kukwiza.
Klisto fidisaka mbazi* ya yandi samu na kulakisa yawu na sika ya kisadi ya yandi Za.
2 Mutindu mbangi,
Za ke na kuzabisa mambu ya Nzambi mpe kimbangi ya Yesu-Klisto na mambu nyonso yina yandi talaka.
3 Kyese na muntu yina ke na kutanga yawu.
Kyese na bayina ke na kuwa mambu ya bambikululu,
mpe ke na kubumba mambu yina kele ya kusonama na kati ya dibuku yayi.
Ya tsyelika,
ntangu ya mambu yayi me kuma pene-pene.
Bambote na mabuundu sambwadi ya Nzambi
4 Munu Za,
mu ke na kuzabisa mambu yayi na sika ya mabuundu sambwadi ya kizunga ya Aziya.
Bika ti Nzambi yina kele,
vwandaka,
mpe ke kwiza,
kusakumuna beno mpe kupesa beno kizunu.
Bika mpe ti bampeve sambwadi yina kele na ntwala ya kiti ya yandi ya kintinu kupesa beno yawu,
5 mpe ti Yesu-Klisto*,
mbangi ya kukwikama,
kupesa mpe beno yawu.
Ni yandi kele muntu ya ntete yina vumbukaka na lufwa.
Yandi kele mpe mfumu ya bantinu ya yinza.
Yesu-Klisto ke zolaka beto mpe kuulaka beto na masumu ya beto na menga ya yandi.
6 Yandi kumisaka beto bantu ya yinsi ya ntinu mosi,
dikanda ya banganga-Nzambi* samu na kusadila Tata ya yandi Nzambi.
Nkembo mpe lulendo kuvwanda na yandi tii seko!
Ameni*.
7 Beno tala!
Yandi ke na kukwiza na kati ya matuti.
Bantu nyonso ke tala yandi,
ata bayina tobolaka yandi bambanzi.
Bifumba nyonso ya ntoto ya muvimba ke looka mpe ke dila samu na yandi.
Ya tsyelika,
yawu ke vwanda mutindu yina!
Ameni.
8 Mfumu* Nzambi ke na kutuba:
"Mu kele Alafa mpe Omengaa.
Ni munu kele,
vwandaka,
mpe ke kwiza.
Mu kele Nzambi-Mpungu."
Za talaka Klisto na lumoni
9 Munu Za,
mu kele mpangi ya beno.
Mu ke na kukabula bampasi,
Kimfumu ya Nzambi*,
mpe mvibudulu kintwadi na beno na kuvwanda ya kukangama na Yesu.
Mu vwandaka na kisanga ya Patemose,
samu ti mu zabisaka mambu ya Nzambi mpe kimbangi ya Yesu.
10 Na kilumbu ya Mfumub,
mu kuzwaka Mpeve ya Nzambi mpe mu kuwaka na manima ya munu ndinga ya ngolo yina wakanaka mutindu kulumenta*.
11 Yawu tubaka:
"Sonika na kati ya dibuku mambu nyonso yina nge ke na kuwa,
mpe fidisa dibuku yango na mabuundu sambwadi yayi:
dibuundu ya Efeso,
ya Simine,
ya Pengame,
ya Tyatile,
ya Sade,
ya Filadefi,
mpe ya Lawodise."
12 Mu balukaka samu na kutala nani vwandaka zonza,
mpe mu talaka minda sambwadi ya wolo.
13 Na kati-kati ya minda sambwadi yina mu talaka mutindu kifwani ya muntu.
Yandi vwandaka ya kulwata dizwela ya yinda,
mpe kangaka na ntulu singa ya luketo ya wolo.
14 Bansuki ya yandi ya yintu vwandaka mpembe mutindu mika ya dimeme to mpembe ya kulutila,
mpe meso ya yandi vwandaka lezima mutindu tiya.
15 Makulu ya yandi vwandaka lezima mutindu kisengo ya mbwaki yina ba me tula na tiya,
mpe ndinga ya yandi vwandaka wakana mutindu makelele ya bimpo ya maza ya mubu.
16 Yandi vwandaka ya kusimba bambwetete sambwadi na diboko ya yandi ya bakala,
mpe mbele ya yinda yina kele na meno balweka nyonso zole vwandaka basika na yinwa ya yandi.
Kizizi ya yandi vwandaka lezima mutindu ke lezimaka ntangu na ngunga ya midi.
17 Ntangu mu talaka yandi,
mu kubwaka na ntwala ya makulu ya yandi mutindu muntu ya kufwa.
Yandi tentikaka munu diboko ya yandi ya bakala,
mpe zabisaka munu:
"Kuvwanda na boma ve!
Mu kele muntu ya ntete mpe ya nsuka.
18 Mu kele muntu ya moyo.
Mu vwandaka ya kufwa,
kasi ntangu yayi mu kele moyo tii seko.
Mu kele na lulendo na lufwa mpe na yinza ya bantu ya kufwa.
19 Na yina,
sonika mambu yina nge ke na kutala:
mambu yina ke na kusalama ntangu yayi,
mpe yina ke salama na bilumbu ke kwiza.
20 Nsasa ya mansweki ya bambwetete sambwadi yina nge me tala na diboko ya munu ya bakala,
mpe minda sambwadi ya wolo kele mutindu yayi:
Bambwetete sambwadi ni bambazi* ya mabuundu sambwadi,
mpe minda sambwadi ya wolo ni mabuundu sambwadi yina."