Mukanda ya
LUZABUSU
NKOTOLO
Kisoniki ya dibuku yayi ke na nkumbu ya Za. Yandi ke na kulakisa wapi mutindu ke na kulandana mazabusu ya Yesu-Klisto*. Yandi ke na kuzabisa mambu yina yandi talaka ntangu Mpeve ya Longo kuzwaka yandi. Ntangu Za ke na kusonika dibuku yayi, yandi kele na kisanga ya Patemose sika yandi ke na kuzinga mutindu nkole, samu ti yandi longisaka Nsangu ya Mbote* na ntangu ntinu ya mbanza Loma vwandaka talisa baklisto mpasi. Ba vwandaka talisa bawu mpasi, samu ti bawu vwandaka kwikila kaka na Mfumu* mosi, Yesu-Klisto.
Na kati ya dibuku yayi, kele na mikanda sambwadi yina Yesu tumisaka Za na kufidisa na mabuundu sambwadi ya Nzambi, yina kele na kizunga ya Aziya yina ba ke na kubokila ntangu yayi Tiliki.
Dibuku yayi kele mpe ya kufuluka na balumoni mpe mazabusu yina ba ke na kuzonzila na bidimbu mpe bifwanusu mingi. Bantu lenda kubakula na mutindu ya kuswaswana mambu ya fyoti-fyoti yina kele na kati ya dibuku yayi. Kasi dyambu ya ngudi ya dibuku yayi kele pwelele: Yesu-Klisto yina kele kaka Mfumu mosi ke nungaka seko mambu nyonso.
Dibuku yayi kele ya kukabuka mutindu yayi:
- 1--3: Za ke na kuzabisa wapi mutindu yandi kuzwaka lumoni ya yandi ya ntete. Na kati ya lumoni yango, Yesu ke na kupesa yandi kisalu ya kusonika mikanda na mabuundu sambwadi ya Nzambi.
- 4--5: Za ke na kutala na balumoni nkembo ya Nzambi mpe ya Yesu-Klisto na mazulu.
- 6--8: Za ke na kuzonzila dibuku mpe bikangulu sambwadi.
- 8--11: Za ke na kuzonzila bakulumenta* sambwadi.
- 12--13: Za ke na kuzonzila Dalango mpe bibulu zole ya ngitukulu.
- 14: Za ke na kuzonzila Dimeme ya Nzambi* mpe nkama na makumi yiya na yiya ya mafunda (144.000) ya bantu yina ke kuzwa mpulusu, mpe lufundusu yina bambazi* zabisaka.
- 15--16: Za ke na kuzonzila bambungu sambwadi ya nkele ya Nzambi.
- 17--20: Za ke na kuzonzila wapi mutindu ke mwangana mbanza Babiloni, mpe wapi mutindu kibulu, mumbikudi* ya luvunu mpe Satana ke lembana na kununga.
- 21.1--22.5: Za ke na kuzonzila zulu ya malu-malu, ntoto ya malu-malu, mpe mbanza Yelusalemi ya malu-malu.
- 22.6-21: Za ke na kukebisa bantu na pwelele nyonso na mambu nyonso yina yandi me zonzila. Yandi ke na kuzonzila mpe nsilulu ya Klisto yina vumbukaka na lufwa: "Kaka ntangu fyoti me bikana, mpe mu ke kwiza!"