Mukanda ya Zole ya
PYELE
NKOTOLO
Pyele fidisaka mukanda ya yandi ya zole na baklisto nyonso. Yandi fidisaka yawu samu na kukanga nzila na bantu yina kotaka na mansweki na dibuundu samu na kulongisa malongi ya kuswaswana na Nsangu ya Mbote* ya tsyelika.
Na mukanda yayi, Pyele ke na kulakisa ti na kukanga nzila na bantu yina, ya me lunga na kuvwanda ya kukangama na luzabu ya tsyelika ya Nzambi mpe ya Yesu-Klisto*.
Dibuku yayi kele ya kukabuka mutindu yayi:
- 1.1-2: Bambote
- 1.3-21: Pyele ke na kuzabisa bifu ya mbote yina kele mfunu na luzingu ya buklisto. Yandi ke na kutuba ti bifu yina kele mfunu samu na kuvwanda ya kukwikama na mbokolo yina beto ndimaka na sika ya Nzambi, mutindu ya kele ya kufwanana na kimbangi yina tubaka bayina talaka Mfumu*.
- 2: Yandi ke na kuzabisa na ngolo nyonso yimbi ya kisalu mpe ya nkadulu ya bayina ke longisaka malongi ya luvunu.
- 3: Pyele ke na kukebisa baklisto samu na bantu yina ke sekaka bandimi yina ke vingilaka nkwizulu ya Klisto.
Mambu yina kele na kati ya mukanda ya zole ya Pyele kele ya bantangu nyonso, samu ti bantu yina ke longisaka malongi ya luvunu ke kondwaka ve na yinza.