Mukanda ya Ntete ya
PYELE
NKOTOLO
Pyele fidisaka mukanda yayi ya ntete na sika ya baklisto ya kumwangana na bizunga tanu yayi: Ponte, Ngalatiya, Kapadose, Aziya, mpe Bitini. Bantu yina vwandaka kwikila na Klisto* ve ya bizunga yina vwandaka safula mpe funda baklisto na mambu ya konso mutindu, mpe vwandaka sosa na kutalisa bawu mpasi. Ni yawu yina, Pyele fidisaka bawu mukanda yayi samu na kupesa dyaka bawu kibakala na kusikika meso ya bawu na Yesu-Klisto yina talaka mpasi yina bawu vwandaka tala.
Dibuku yayi kele ya kukabuka mutindu yayi:
- 1.1-2: Bambote
- 1.3-12: Pyele ke na kubambula moyo na baklisto wapi mutindu Nzambi vuukisaka bawu mpe pesaka bawu kivuvu ya tsyelika na lufwa mpe mvumbukulu ya Yesu-Klisto.
- 1.13--2.10: Pyele ke na kukindisa bawu na kuvwanda ya kukubama, na kufungula meso mpe na kuzinga na kati ya bulongo* na bundiku na Klisto.
- 2.11--4.19: Pyele ke na kukindisa bawu na kubaka kifwanusu ya Klisto. Yandi ke na kupesa bawu malongi ya kusadila na yina me tadila bisalu ya yinsi, kintwadi na kati ya bisadi mpe bamfumu, buzitu na makwela na kati ya kento na bakala, luzingu ya kintwadi, mpe mutindu ya kudyatila na ntwala ya bayina zaba ve Nzambi.
- 5.1-11: Pyele ke na kukindisa bakuluntu to bantwadisi ya dibuundu, bantwenya mpe minkwikisi nyonso na kutatamana na kutula kivuvu ya bawu na bansilulu ya Nzambi ata ti bampasi kele.
- 5.12-14: Bambote ya nsuka.