Mukanda ya
ZAKI
NKOTOLO
Zaki sonikaka mukanda yayi samu na kupesa malongi ya kudyatila na "bifumba kumi na zole ya kumwangana na yinza nyonso" (1.1). Yandi ke na kuzonzila bankadulu ya yimbi ya baklisto na sika ya bampangi ya bawu baklisto mpe na sika ya bayina kele ve baklisto.
Bantu mingi ke banzaka ti Zaki, kisoniki ya mukanda yayi, vwandaka mpangi ya Yesu (Matayi 13.55; Make 6.3).
Dibuku yayi kele ya kukabuka mutindu yayi:
- 1.1: Bambote
- 1.2-8: Zaki ke na kuzonzila dyambu ya ndwenga.
- 1.9-27: Malongi samu na bumputu, kimvwama, bampasi, bantontolo, mpe buklisto ya tsyelika.
- 2.1-13: Yandi ke na kusemba baklisto yina ke swasikisaka bantu.
- 2.14-26: Yandi ke na kuzonzila dyambu ya ngudi: ni kulakisa kiminu na lusalusu ya bisalu ya mbote.
- 3.1-12: Zaki ke na kusadila bifwani mingi samu na kulakisa yimbi nyonso yina ke katukaka na yinwa.
- 3.13-18: Yandi ke na kuzonzila dyaka ndwenga ya tsyelika.
- 4.1--5.6: Yandi ke na kusemba na ngolo nyonso bayina ke zolaka kuswana mpe kunwana, bayina ke zolaka mambu ya yinza, bayina ke fundisaka bampangi ya bawu, mpe bamvwama yina ke nyokolaka bisadi ya bawu.
- 5.7-20: Zaki ke na kukindisa baklisto na kuvwanda na mvibudulu, na kutatamana na lusambulu, mpe na kusalasana.