Mukanda ya Polo na baklisto ya
EFESO
NKOTOLO
Na kati-kati ya bamvula nkama ya ntete na manima ya mbutukulu ya Yesu, lutangu ya mabuundu ya Nzambi vwandaka kuma mingi na nswalu nyonso na kati ya kizunga ya Aziya. Kasi na kati ya mabuundu ya Nzambi yina, dibuundu ya mbanza Efeso vwandaka na mfunu ya kulutila. Polo zingaka kuna bamvula tatu ntangu yandi salaka nzyetolo ya yandi ya tatu ya kulongisa Nsangu ya Mbote* (Bisalu 19.1--20.1).
Ntangu Polo fidisaka mukanda yayi na bantu ya Efeso, yandi vwandaka na boloko (3.1; 4.1). Ni yawu yina, mukanda yayi kele na kati ya mulonga ya mikanda yina ba ke bokilaka "mikanda ya Polo na kati ya boloko", mutindu mosi mpe mukanda yina yandi fidisaka na bantu ya mbanza Filipe, na bantu ya mbanza Kolose, mpe na Filemoni.
Ndongosolo yina kele na kati ya mukanda yayi ke na kutadila kaka ve baklisto ya dibuundu ya Efeso, kasi mpe mabuundu nyonso ya kizunga yina. Dyambu ya mfunu yina kele na kati ya mukanda yayi, ni mabanza ya seko yina Nzambi kubikaka. Mabanza yango kele samu na kutula kisika mosi nyonso yina kele na mazulu mpe na ntoto na lutumu ya Klisto* yina kele Mfumu* kaka mosi (1.10).
Dibuku yayi kele ya kukabuka mutindu yayi:
- 1.1-2: Bambote
- 1.3--3.21: Polo ke na kuyangalala na mambu yina Nzambi salaka samu na beto na lusalusu ya Yesu-Klisto. Na manima, yandi ke na kuzonzila dyambu ya kintwadi na buklisto.
- 4--6: Polo ke na kulakisa na bantu ya Efeso wapi mutindu bawu lenda kuzinga kintwadi.
Na kulakisa kifwanusu ya kintwadi ya dikanda ya Nzambi, Polo ke na kusadila bifwani tatu: kifwani ya nzutu sika Yesu-Klisto kele yintu to mfumu ya dibuundu ya Nzambi, kifwani ya yinzo sika Yesu-Klisto kele ditadi ya ntete ya ntungulu-yinzo, mpe kifwani ya kento na bakala sika dibuundu ya Nzambi kele kento ya Klisto.