Mukanda ya Polo na baklisto ya
NGALATIYA
NKOTOLO
Polo fidisaka mukanda yayi na mabuundu ya Nzambi ya kizunga Ngalatiya. Mabuundu yina vwandaka zinga na londe ya yinsi yina ba ke bokilala na ntangu yayi Tiliki. Ya kele bantu yina kwikilaka na Nsangu ya Mbote* ntangu Polo kwendaka tala mabuundu ya Nzambi na nzyetolo ya yandi ya zole mpe ya tatu (Bisalu 16.6; 18.23).
Kasi na manima ya Polo, bantu ya nkaka kwendaka longisa na kizunga ya Ngalatiya ti baklisto yina kele ve ba-Zwife fwanaka tumama na misiku ya ba-Zwife. Bantu yina vwandaka na luzolo ya kulutila na kulongisa dyambu ya kuzengisa bubakala. Kasi samu na Polo, dyambu yina bawu vwandaka tumisa baklisto ya Ngalatiya vwandaka ya kuswaswana na Nsangu ya Mbote ya tsyelika ya Yesu-Klisto*. Dyambu yina vwandaka tula baklisto ya Ngalatiya na kati ya luzingu ya bundongo ya kimpeve. Ntangu Polo kuwaka ti baklisto ya mabuundu ya Ngalatiya vwandaka zola kundima mambu yina vwandaka zabisa bawu bambeni ya yandi, yandi vwandaka na nsatu ya kulutila ya kufidisa bawu mukanda yayi samu na kuvutula bawu na nzila ya kudedama* ya Nsangu ya Mbote.
Dibuku yayi kele ya kukabuka mutindu yayi:
- 1.1-5: Bambote
- 1.6--2.21: Polo ke na kuzabisa mambu ya luzingu ya yandi, mpe ya kisalu yina Mfumu* pesaka yandi.
- 3--4: Polo ke na kusadila mambu ya dibuku ya Ngwisani ya Ntama* samu na kuzabisa mpulusu yina beto lenda kuzwa na Yesu Klisto.
- 5--6: Na kumanisa mukanda ya yandi, Polo ke na kubokila bantu na kuzinga na kimpwanza nyonso na lutumu ya Mpeve ya Nzambi.