Mukanda ya Polo na baklisto ya
NGALATIYA
Bambote
1
Ni munu Polo yina kele ntumwa* na luve ya bantu ve to na lusalusu ya muntu ve,
kasi na luve ya Yesu-Klisto* mpe ya Tata Nzambi yina vumbulaka yandi na lufwa.
2 Kintwadi na bampangi nyonso yina kele awa,
mu ke na kufidisa mukanda yayi na sika ya mabuundu ya Nzambi ya Ngalatiya.
3 Bika ti Tata ya beto Nzambi mpe Mfumu*ya beto Yesu-Klisto kusakumunu beno mpe kupesa beno kizunu.
4 Klisto ndimaka na kupesa luzingu ya yandi samu na kuvuukisa beto na masumu ya beto,
samu ti yandi katula beto na yinza yayi ya yimbi mutindu Tata ya beto Nzambi zolaka.
5 Bika ti nkembo kuvwanda na Nzambi tii seko.
Ameni*.
Nsangu ya Mbote kele kaka mosi
6 Mu ke na kuyituka na mutindu beno me bika na nswalu nyonso Nzambi yina bokilaka beno na bumbote ya Klisto*,
mpe beno ke na kulanda nsangu ya mbote ya nkaka.
7 Ya tsyelika,
ya kele ve na nsangu ya mbote ya nkaka.
Ya kele kaka na bantu yina ke na kusala muvusu na kati ya beno,
mpe ke na zola kusoba Nsangu ya Mbote* ya Klisto.
8 Kana beto to mbazi* yina me katuka na mazulu,
zabisa beno nsangu ya kuswaswana na Nsangu ya Mbote yina beto zabisaka beno,
bika ti Nzambi kusinga* yandi.
9 Beto zabisaka beno yawu,
mpe mu ke na kuzabisa dyaka yawu ntangu yayi:
Kana muntu zabisa beno nsangu ya kuswaswana na Nsangu ya Mbote yina beno kuwaka,
bika ti Nzambi kusinga yandi.
10 Ntangu yayi,
beno ke na kubanza ti mu ke na kusosa ti bantu siika munu?
Ve,
mu ke na kusosa ve ti bantu siika munu,
kasi Nzambi.
Beno banza ve ti mu ke na kusosa dyaka na kuyangidika bantu,
samu ti kana mu vwandaka sosa yawu,
mu zolaka vwanda ve mundongo ya Klisto.
Nzambi soolaka Polo samu na kuzabisa Nsangu ya Mbote
11 Bampangi,
mu ke na kutubila beno ti Nsangu ya Mbote* yina mu zabisaka,
katukaka ve na muntu.
12 Mu kuzwaka yawu to longokaka yawu na muntu ve.
Kasi ni Yesu-Klisto* zabisaka munu yawu.
13 Beno kuwaka wapi mutindu vwandaka nkadulu ya munu na ntama ntangu mu vwandaka ntete ya kukwikama na misiku ya ba-Zwife.
Beno zaba wapi mutindu mu vwandaka lutila na kutalisa mpasi dibuundu ya Nzambi,
mpe mu vwandaka sala samu na kumwangisa yawu.
14 Mu vwandaka lutila ba-Zwife mingi ya bamvula mosi na munu na nsalulu ya misiku ya ba-Zwife.
Mu vwandaka lutila bawu na kunwanina mambu ya kinkulu ya bankoko ya beto.
15 Kasi Nzambi soolaka munu ntete mu butuka,
mpe bokilaka munu na bumbote ya yandi.
16 Ntangu yandi bakaka lukanu ya kulakisa munu Mwana ya yandi,
samu ti mu zabisa nkumbu ya yandi na sika ya bayina kele ve ba-Zwife,
mu lombaka malongi na muntu ve.
17 Mu kwendaka mpe na Yelusalemi ve na sika ya bayina tekilaka munu na kuvwanda bantumwa*.
Kasi mu kwendaka na yinsi ya Alabi,
mpe na manima,
mu vutukaka na mbanza Damase.
18 Na manima ya bamvula tatu,
mu kwendaka na Yelusalemi samu na kuzabasana na Sefase*,
mpe mu lutisaka balumingu zole kintwadi na yandi.
19 Mu talaka ve bantumwa ya nkaka,
kasi kaka Zaki,
mpangi ya Mfumu.
20 Ya tsyelika na ntwala ya Nzambi,
mambu yina mu ke na kusonikina beno kele ve ya luvunu.
21 Na manima,
mu kwendaka na kizunga ya Sili mpe ya Silisi.
22 Kasi bantu ya mabuundu ya Nzambi ya kizunga ya Zude vwandaka me tala munu ntete ve.
23 Bawu vwandaka kuwa kaka mutindu yayi:
"Muntu yina vwandaka talisa beto mpasi na ntama,
ke na kulongisa ntangu yayi mambu ya kiminu yina yandi vwandaka nwanisa."
24 Na yina,
bawu vwandaka kembila Nzambi samu na munu.