Mukanda ya Polo na baklisto ya
FILIPI
NKOTOLO
Mbanza ya ntete ya Elopa sika Polo longisaka Nsangu ya Mbote* kele mbanza Filipi. Ntangu Polo sonikaka mukanda yayi na baklisto ya Filipi, yandi vwandaka na boloko. Ndambu ya bantu ke tubaka ti yandi vwandaka na boloko na mbanza Efeso. Kasi ndambu ya nkaka ke tubaka ti yandi vwandaka na boloko na mbanza Sezale to mbanza Loma.
Na mukanda yayi, Polo zolaka vutula matondo na baklisto ya Filipi samu na makabu yina bawu fidisaka yandi na maboko ya Epafodite. Polo zolaka mpe kukindisa bawu na kuvwanda ya kukwikama na Klisto*, mpe na kundima ve malongi ya luvunu.
Dibuku yayi kele ya kukabuka mutindu yayi:
- 1.1-2: Bambote
- 1.3-11: Polo ke na kulakisa kilengi ya yandi, mpe ke na kuvutula matondo konso ntangu yandi ke banzaka na baklisto ya Filipi.
- 1.12-26: Polo ke na kuzabisa bansangu ya yandi. Na ntwala ya mambu yina ke na kuvingila yandi, yandi kele ya kufuluka na kivuvu, samu ti yandi kele na bundiku na Yesu-Klisto.
- 1.27--2.18: Polo ke na kukindisa baklisto ya Filipi na kuvwanda ya kukubama na kiminu. Yandi ke na kuzabisa bawu na kuvwanda na dibanza mosi mpe na kukuluka mutindu Klisto kulukaka.
- 2.19-30: Polo ke na kuzabisa bansangu ya Timote mpe Epafodite.
- 3: Polo ke na kukebisa bampangi ya yandi na ngolo nyonso na bantu yina kele ve ya kukwikama na Nsangu ya Mbote, bayina ke salaka kaka lunangu ya bawu na nzengosolo ya bubakala. Yandi ke na kulomba na baklisto ya Filipi na kulanda nkadulu ya yandi, mpe na kusosa na kufwanana na Yesu-Klisto.
- 4: Polo ke na kupesa bankindusulu ya mutindu na mutindu. Yandi ke na kutonda bampangi ya Filipi samu na makabu ya bawu, mpe ke na kufidisa bawu bambote yina me katuka na bampangi ya nkaka.
Bantu ke bokilaka mukanda yayi "mukanda ya kilengi", samu ti Polo zonzilaka dyambu ya kilengi na mukanda nyonso.