Loma 9

Nzambi soolaka bantu ya Isayeli

Mambu yina mu ke na kuzonza kele ya tsyelika. Mu ke na kuvuna ve, samu ti mu kele kintwadi na Klisto*. Ndinga yina ke zonzaka na ntima ya munu ke na kuzabisa munu na lusalusu ya Mpeve ya Longo ti ya ke ya tsyelika ntangu mu ke na kutuba ti 2 ntima ya munu kele ya kufuluka na manyongo, mpe na mpasi ya kulutila yina ke na kumanisa ve. 3 Mu vwandaka zola ti munu mosi vwanda muntu yina Nzambi singaka*, mpe ya kukabuka na Klisto samu na mbote ya bampangi ya munu, bayina beto kele yinsi mosi. 4 Bawu kele bantu ya yinsi ya Isayeli: Nzambi me sala ti bawu vwanda bana ya yandi. Yandi me lakisa bawu nkembo ya yandi, mpe me sala ngwisani na bawu. Yandi me pesaka bawu misiku, lusambulu, mpe bansilulu. 5 Bawu kele mitekolo ya bankoko ya ntama. Ni na sika ya bawu Klisto yina ke na kuyala bima nyonso butukaka mutindu muntu. Bika Nzambi kuzwa masiika tii seko. Ameni*!

Nzambi mpe dikanda yina yandi soolaka

6 Ya zola kutuba ve ti nsilulu ya Nzambi ke dyaka ve na mfunu. Ya tsyelika, bantu nyonso yina butukaka na Isayeli, kele ve bawu nyonso bantu ya dikanda ya tsyelika ya Isayeli, 7 mpe mitekolo ya Abalami kele ve bawu nyonso bana ya yandi ya tsyelika, samu ti Nzambi tubaka na Abalami: "Ni bana ya Izaki ba ke bokila mitekolo ya nge." 8 Ya zola kutuba ti ni bana yina me butuka na luzolo ya kento na bakala kele ve bana ya Nzambi, kasi kaka ni bana yina me butuka na nsilulu ya Nzambi kele mitekolo ya tsyelika. 9 Ya tsyelika, Nzambi pesaka nsilulu ya yandi na mambu yayi: "Na mvula yina ke kwiza, mu ke vutuka kaka na ntangu yayi, mpe Saala ke buta mwana ya bakala."

10 Kaka ni mambu yina ve. Ya kele mpe na Lebeka. Bana nyonso zole ya yandi butukaka na tata mosi, Izaki yina kele nkoko ya beto. 11-12 Bana yina butukaka ntete ve, mpe vwandaka me sala ntete ve dyambu ya mbote to ya yimbi, kasi Nzambi tubaka na Lebeka: "Mwana ya nge ya kuluntu ke vwanda kisadi ya leki ya yandi." Nzambi salaka mutindu yina, samu ti luzolo ya yandi salama: Nsololo ya yandi kele ve samu na mavanga ya bawu, kasi na mbokolo ya yandi. 13 Mutindu Dibuku ya Nzambi ke tubaka: "Mu me zola Yakobi, mpe mu me yina Esawu."

14 Yinki beto lenda kutuba? Nzambi kele ve na ludedomo? Ve! 15 Ya tsyelika, yandi tubaka na Moyize: "Mu ke tala kyadi na muntu yina mu zola kutala kyadi, mpe mu ke sala mambu ya mbote na muntu yina mu zola kusala mambu ya mbote." 16 Na yina, bumbote ya Nzambi kele ve samu na mambu yina bantu ke zolaka to ke salaka, kasi kaka samu na Nzambi yina ke talaka bantu kyadi. 17 Na Dibuku ya Nzambi, Nzambi tubaka na ntinu ya yinsi ya Ngipiti: "Mu tulaka nge ntinu, samu ti mu sadila nge na kulakisa lulendo ya munu, mpe samu ti nkumbu ya munu mwangana na yinza nyonso." 18 Na yina, Nzambi ke talaka kyadi na muntu yina yandi zola kutala kyadi, mpe ke kumisaka ntima ngolo na muntu yina yandi zola kukumisa ntima ngolo.

Nzambi ke soolaka bantu na kimpwanza nyonso

19 Ya lenda kuvwanda ti muntu yufula munu: "Na yina, samu na yinki Nzambi ke sembaka dyaka beto? Nani lenda kumanga mambu yina Nzambi ke zolaka?" 20 Kasi nge, nani nge kele samu na kusala ntembe na Nzambi? Nzungu ya ntoto lenda kuyufula na kiyidiki ya yandi: "Samu na yinki nge me yidika munu mutindu yayi?" 21 Kiyidiki ya banzungu ya ntoto kele mfumu ya ntoto yina yandi ke sadilaka samu na kuyidika nzungu ya mfunu mingi mpe nzungu ya mfunu mingi ve.

22 Nzambi zolaka lakisa nkele mpe lulendo ya yandi. Kasi na mvibudulu mingi, yandi vibidilaka bayina vwandaka pesa yandi nkele mpe lungaka na kuzwa lufwa. 23 Yandi zolaka mpe na kulakisa kimvwama ya nkembo ya yandi na sika ya bayina yandi talaka kyadi, bayina yandi kubikaka katuka ntama samu na nkembo ya yandi. 24 Bantu yango ni beto. Yandi bokilaka beto kaka ve na kati ya ba-Zwife, kasi mpe na kati ya bayina kele ve ba-Zwife. 25 Ni mambu yina Nzambi tubaka na dibuku ya mumbikudi* Oze:

"Bayina vwandaka ve dikanda ya munu,

mu ke bokila bawu dikanda ya munu,

mpe yinsi yina mu vwandaka zola ve,

mu ke bokila yawu yinsi yina mu zolaka mingi.

26 Na bisika yina ba zabisaka bawu:

'Beno kele ve dikanda ya munu',

ba ke bokila bawu bana ya Nzambi ya moyo."

27 Na yina me tadila bantu ya Isayeli, Ezayi tubaka mpe: "Ata ti bantu ya Isayeli kuma mingi mutindu zyelo ya kumu ya mubu, kaka bantu fyoti na kati ya bawu ke kuzwa mpulusu. 28 Mambu yina Mfumu* tubaka, yandi ke sala yawu nyonso mpe na nswalu awa na ntoto." 29 Katuka ntama, Ezayi tubaka mpe:

"Kana Mfumu ya yinza ya muvimba bikilaka ve

beto mwa mitekolo,

beto zolaka kuma mutindu Sodomi,

mpe beto zolaka fwanana na Ngomole."

Nzambi ke kumisaka ya kudedama bantu yina ke kwikilaka Yesu-Klisto

30 Yinki beto lenda kutuba dyaka? Nzambi kumisaka ya kudedama* na ntwala ya yandi bantu ya bayinsi ya nkaka yina vwandaka na kiminu, bayina vwandaka sosa ve na kukuma bantu ya kudedama. 31 Kasi bantu ya Isayeli yina vwandaka sosa na kukuma bantu ya kudedama na lusalusu ya Misiku*, lembanaka na kukuma bantu ya kudedama. 32 Yawu salamaka ve, samu ti bawu vwandaka sosa ve na kukuma bantu ya kudedama na luve ya kiminu, kasi na luve ya bisalu ya bawu. Bawu me bula dibaku na "ditadi yina ke bwisaka bantu", 33 mutindu yawu kele ya kusonama na Dibuku ya Nzambi:

"Mu ke na kutula na mbanza Siyoni,

ditadi yina ke sala ti bantu bula dibaku,

ditadi yango ke bwisaka bantu.

Kasi muntu yina ke sala kiminu na yandi

ke tala nsoni ve."