Mukanda ya Ntete ya Polo na baklisto ya
KOLINTO
NKOTOLO
Ntangu Polo salaka nzyetolo ya yandi ya zole, yandi lutisaka mvula mosi na bangonda sambanu na mbanza Kolinto, mpe yidikaka dibuundu ya Nzambi ya mbanza yina (Bisalu 18.1-11).
Kolinto vwandaka mbanza ya mfunu, samu ti yawu vwandaka na mabungu zole. Bantu mingi vwandaka sala mumbungu, mpe vwandaka landa mingi mambu ya yinza yayi. Mambu nyonso yayi vwandaka sala ti dibuundu ya malu-malu ya Nzambi ya Kolinto kula mbote ve.
Ntangu Polo vwandaka na mbanza Efeso, yandi kuzwaka bambala mingi bansangu ya yimbi ya dibuundu ya Kolinto, mpe yawu vwandaka talisa yandi kyadi. Ni yawu yina, yandi fidisaka mikanda na dibuundu ya Kolinto. Na kati ya mikanda yina yandi sonikaka, zole kele na kati ya dibuku ya Ngwisani ya Malu-Malu*. Kasi ba ke na kuzonzila mikanda ya nkaka yina na kati ya 1 Kolinto 5.9-13, mpe 2 Kolinto 2.3; 7.8.
Dibuku yayi kele ya kukabuka mutindu yayi:
- 1.1-3: Bambote
- 1.4-9: Polo ke na kusala lusambulu ya kuvutula matondo.
- 1.10--4.21: Polo ke na kulomba na baklisto ya Kolinto na kusala ngolo samu na kuvutula kiwisa na kati ya bawu.
- 5: Polo ke na kuzabisa bawu na kubingisa na kati ya dibuundu bantu yina ke sadilaka busafu.
- 6.1-11: Polo ke na kuyimina bawu na kufundisa mambu ya bawu na sika ya bayina kele ve baklisto.
- 6.12-20: Polo ke na kuzabisa bawu wapi mutindu muklisto fwana kusadila nzutu ya yandi.
- 7: Mvutu na dyambu ya makwela mpe ya bumpumpa.
- 8--11.1: Mvutu na dyambu ya kudya bibulu yina bantu ke pesaka mutindu munkayulu na banzambi ya biteki, mpe mvutu na dyambu ya kimpwanza ya muklisto.
- 11.2-34: Mvutu na dyambu yina me tadila nkadulu ya baklisto ntangu bawu ke vukanaka mpe ke kudyaka madya ya Mfumu*.
- 12--14: Mvutu na dyambu ya makabu ya kimpeve, mpe mutindu ya kusadila yawu.
- 15: Mvutu na dyambu ya mvumbukulu ya bantu na lufwa.
- 16: Polo ke na kupesa malongi ya mutindu na mutindu, mpe bambote na baklisto ya Kolinto.