Lumoni ya sambanu: Dibuku ya kuzingama
5
Na kati ya lumoni mu talaka dyaka, dibuku mosi vwandaka kwenda na zulu.2 Mbazi yufulaka munu: «Yinki nge ke na kutala?» Mu vutulaka: «Mu ke na kutala dibuku mosi ke na kukwenda na zulu, yinda ya yawu kele bametele kumi mpe nene ya yawu kele bametele tanu.» 3 Na yina, mbazi tubaka: «Ya kele ni nsingulu yina ke na kumwangana na yinsi nyonso, na lweka mosi ya dibuku yango ba sonikaka: «Ba ke bingisa bantu nyonso yina ke labaka na yinsi, na lweka ya nkaka mpe ba sonikaka: Ba ke bingisa mpe bantu nyonso yina ke kudyaka bandefi ya luvunu na yinsi.» 4 Yave, Nzambi ya binwani ke fidisa yawu, samu ti yawu kota na yinzo ya konso muyibi mpe na yinzo ya konso muntu yina ke kudyaka bandefi ya luvunu na nkumbu ya yandi. Singulu yango ke kota na kati ya yinzo mpe yawu ke nyengisa bima nyonso, ya vwanda mabaya to matadi.»
Lumoni ya sambwadi: Kento yina kele na kati ya kitunga
5 Mbazi yina vwandaka zonza na munu tubaka: «Tala na zulu, yinki nge ke na kutala kuna?» 6 Mu yufulaka mbazi: «Ya kele yinki?» Yandi vutulaka: «Ya kele kitunga yina ke na kubelama mpe yawu kele ya kufuluka na masumu ya bantu nyonso ya yinsi.»
7 Na mpamukunu, kitapu ya kokote yina vwandaka na zulu ya kitunga fungukaka mpe mu talaka kento mosi ya kuvwanda na kati ya kitunga yango. 8 Mbazi tubaka na munu: «Kento yayi kele kidimbu ya mambu nyonso ya yimbi.»
Mbazi vutulaka kento yango na kati ya kitunga, yandi bakaka kitapu ya kokote mpe kangaka kitunga yango. 9 Na manima, mu talaka dyaka na zulu, mu talaka bakento zole yina vwandaka belama mpe bawu vwandaka pumbuka, mupepe vwandaka fula na mapapu ya bawu. Mapapu yango vwandaka mutindu mapapu ya ndeke yina ba ke bokilaka singonye.a Bakento yango nangunaka kitunga mpe bawu nataka yawu na kati-kati ya zulu. 10 Na yina, mu yufulaka mbazi: «Wapi kisika bawu ke na kunata yawu?» 11 Mbazi vutulaka: «Bawu ke na kunata yawu na Babilone, bawu ke tungila yawu yinzo mpe ni kuna ba ke tula kitunga yango samu ti yawu vwanda kuna.»