Lumoni ya yiya: Zozuwe mfumu ya banganga-Nzambi
3
Yave lakisaka munu Zozuwe, mfumu ya banganga-Nzambi, yina vwandaka ya kutelama na mantwala ya mbazi ya Yave, mpe Satana vwandaka ya kutelama na lubakala ya Zozuwe samu na kufunda yandi. 2 Mpe Yave tubaka na Satana: «Satana, bika Yave kangisa nge yinwa. Ee ni Yave me soola Yelusalemi, bika yandi kangisa nge yinwa. Zozuwe kele ve mutindu kisisi yina ba me katula na tiya?»3 Zozuwe vwandaka ya kutelama na mantwala ya mbazi, yandi vwandaka ya kulwata binkuti ya mvindu. 4 Mbazi zabisaka na bayina vwandaka na yandi na kukatula Zozuwe binkuti yina. Mpe yandi tubaka na Zozuwe: «Tala, mu me katula masumu ya nge mpe mu ke lwatisa nge binkuti ya feti.»
5 Mbazi tubaka dyaka: «Beno tula Zozuwe yimpu ya bunganga-Nzambi na yintu.» Bawu tulaka yandi yawu mpe lwatisaka yandi binkuti. Mbazi ya Yave vwandaka ya kutelama kuna. 6 Mbazi ya Yave singisaka Zozuwe na kutuba: 7 Yave, Nzambi ya binwani
ke na kutuba:
«kana nge landa banzila ya munu,
kana nge sadila misiku ya munu,
nge ke kuma ntwadisi ya Yinzo ya munu,
nge ke kengidila lupangu ya munu,
mpe mu ke tula nge na mulonga ya bayina
ke na kusadilaka munu awa.»
kisyelo ya Yave
8 «Kuwa Nge Zozuwe mfumu ya
banganga-Nzambi, mutindu mosi
mpe beno banganga-Nzambi
yina kele na yandi,
beno kele kidimbu ya mambu
yina ke kwiza.
Mu ke fidisa kisyelo ya munu,
ba ke bokila yandi “Mutwikila”.
9 Tala, ditadi yayi mu me tula
na mantwala ya Zozuwe,
na ditadi yango kele na meso sambwadi.
Munu mosi ke sonika
mambu na zulu ya yawu, mpe
mu ke katula masumu ya yinsi yayi
na kilumbu mosi. Ni Yave, Nzambi
ya binwani me tuba yawu.
10 Yave, Nzambi ya binwani
ke na kutuba, na kilumbu yina,
Konso muntu na kati ya beno ke
bokila bampangi ya yandi,
samu na kwiza kuvukana na kyese
na yisi ya yinti ya vinu
mpe na yisi ya yinti ya fike.