41
Muntu yango nataka munu kati ya kivinga ya nene ya Yinzo ya Yave. Yandi tezaka makunzi, nene ya yawu vwandaka keba ve bametele tatu na lweka mosi mpe bametele tatu na lweka ya nkaka. Ni yina vwandaka nene mutindu nene ya Yinzo.2 Nene ya mwelo vwandaka keba ve bametele tanu, lweka mosi vwandaka na bametele zole na ndambu, lweka ya nkaka mpe vwandaka keba ve bametele zole na ndambu. Yandi tezaka yinda ya kivinga ya nene yawu vwandaka keba ve makumi zole ya bametele mpe nene ya yawu vwandaka keba ve bametele kumi.3 Na manima, yandi kotaka na kivinga ya kati, yandi tezaka makunzi yina vwandaka na nkotolo, ya vwandaka keba ve metele mosi, mpe mwelo vwandaka keba ve bametele tatu mpe bibaka na konso lweka ya mwelo vwandaka keba ve bametele tatu na ndambu.4 Yandi tezaka yinda ya kivinga, ya vwandaka keba ve bametele kumi mpe nene ya yawu vwandaka keba ve bametele kumi mpe yandi tubaka na munu: Yayi ni kisika ya kulutila longo.
5 Yandi tezaka kibaka ya kati ya Yinzo, ya vwandaka keba ve bametele tatu, ya vwandaka mpe na bivinga ya nkaka na balweka nyonso mpe nene ya yawu vwandaka keba ve bametele zole. 6 Ya vwandaka na bayinzo ya bibandu tatu, konso kibandu vwandaka na bivinga makumi tatu mpe yawu vwandaka ya kuvukana ve na bibaka ya Yinzo. Yawu vwandaka ve ya kuvukana na kibaka ya lupangu ya Yinzo ya Yave. Kasi yawu vwandaka na bisimbulu yina vwandaka simba bayinzo. 7 Na konso kibandu, bivinga vwandaka lutila nene mpe bantu vwandaka yuluka na kwendaka baluka. Samu ti bantu vwandaka yuluka na kuzungaka bivinga, na kikada. Na kukuma na kibandu ya zulu, ba vwandaka lutila na kibandu ya yisi, na kulutila na kibandu ya kati-kati samu na kukuma na kibandu ya zulu. 8 Mu talaka na balweka nyonso ya Yinzo ya Yave, Yinzo na bivinga nyonso vwanda kaka na lufulu mosi, yawu vwandaka keba ve bametele tatu. 9 Nene ya kibaka ya ngaanda ya bivinga ya bibandu vwandaka keba ve bametele zole na ndambu. Ni yawu vwandaka bisika ya mpamba na kati-kati ya bivinga mpe Yinzo, 10 mpe bivinga yina vwandaka nene keba ve bametele kumi na balweka nyonso ya yinzo. 11 Na nkotolo ya bivinga vwandaka na kisika ya mpamba, nkotolo mosi na lweka ya node mpe nkotolo ya nkaka na lweka ya sude. Mpe nene ya kisika ya mpamba vwandaka keba ve bametele zole na ndambu na balweka nyonso. 12 Na lweka ya wesete, ya vwandaka na yinzo yina vwandaka tala na kisika ya mpamba, nene ya yawu vwandaka keba ve bametele makumi tatu na tanu, nene ya kibaka ya yinzo vwandaka keba ve bametele zole na ndambu na balweka nyonso mpe yinda ya yawu vwandaka keba ve bametele makumi yiya na tanu. 13 Muntu yango tezaka yinda ya Yinzo, yawu vwandaka keba ve bametele makumi tanu, kisika ya mpamba, yinzo mpe kibaka vwandaka yinda keba ve bametele makumi tanu. 14 Ntwala ya Yinzo yina vwandaka tala na lweka ya esete, kisika ya mpamba vwandaka keba ve bametele makumi tanu. 15 Yandi tezaka mpe Yinzo na kisika yina kele ngaanda ya manima ya Yinzo mpe bisika ya mpamba yina vwandaka na konso lweka. Yawu vwandaka yinda keba ve bametele makumi tanu.
Kati ya Yinzo
Kivinga ya nkotolo, kivinga ya nene, mpe kivinga ya nsuka, 16 Bankotolo, banela yina vwandaka na bangiliyaze, bisika ya mpamba ya balweka nyonso, na bisika nyonso tatu ya Yinzo, nyonso vwandaka ya mabaya na balweka nyonso tii na zulu ya banela. Mpe banela nyonso vwandaka ya kukangama. 17 Na zulu ya nkotolo ya Yinzo, tii na kati ya Yinzo, na ngaanda mpe na kati, na bibaka ya ngaanda mpe ya kati, ba bongisaka bisika. 18 Ba fikulaka bakeluba na maba, diba mosi na kati-kati ya konso keluba. Mpe konso keluba vwandaka na bizizi zole. 19 Kizizi ya muntu vwandaka tala na lweka ya diba mosi mpe kizizi ya nkosi vwandaka tala na lweka ya diba ya nkaka. Bima yina ba fikulaka vwandaka na balweka nyonso ya bibaka ya Yinzo. 20 Kubanda na yisi tii ya zulu ya mwelo, ba fikulaka bakeluba na maba mpe na bibaka ya Yinzo. 21 Makunzi ya mwelo ya Yinzo vwandaka yiya mpe nyonso vwandaka yinda mutindu mosi. Na ntwala ya kisika ya kulutila longo vwandaka na kima mosi yina vwandaka mutindu, 22 kiyokolo ya minkayulu, yina ba yidikaka na bayinti, kubanda na yisi tii na zulu yawu vwandaka keba ve, metele mosi na ndambu mpe yinda ya yawu, vwandaka keba ve metele mosi. Balweka ya yawu mpe yinti yina vwandaka simba yawu vwandaka ya mabaya. Muntu yina tubaka na munu: Yayi ni mesa yina kele na ntwala ya Yave. 23 Yinzo ya Yave na kisika yina ya kulutila longo vwandaka na myelo zole. 24 Myelo zole yayi vwandaka na mabaya zole yina ke kangaka mwelo, yawu vwandaka funguka mpe vwandaka kangama. 25 Ba fikulaka bakeluba na maba na myelo ya Yinzo ya Yave mutindu ba salaka yawu na bibaka. Ba tulaka mwa muludi na ntwala ya kivinga ya nkotolo ya Yinzo. 26 Ya vwandaka na banela yina vwandaka na bangiliyaze, ya vwandaka mpe na maba na balweka nyonso ya bibaka ya kivinga ya nkotolo ya Yinzo, mpe na zulu ya bibandu ya vwandaka na mwa muludi na ntwala ya yawu.