Ezekyele 40

YINZO YA YAVE YA MALU-MALU

Nkotolo

Ntangu ba nataka beto na ngolo na yinsi ya nzenza, na mvula ya makumi zole na tanu, na kilumbu ya ntete na ngonda ya kumi. Ya vwandaka na mvula ya kumi na yiya, ntangu yina ba botolaka mbanza ya Yelusalemi. Kaka na kilumbu yina diboko ya Yave vwandaka na munu mpe yawu nataka munu kuna. 2 Na balumoni ya Nzambi, yandi nataka munu na yinsi ya Isayeli, yandi tulaka munu na zulu ya mongo ya nene yina vwandaka na lweka ya sude. Ya vwandaka na bayinzo mutindu ya mbanza. 3 Yandi nataka munu kuna mpe ya vwandaka na muntu mosi yina vwandaka talana mutindu kisengo ya mbwaki. Yandi vwandaka na singa ya lino mpe na mukawa ya kutezila na diboko ya yandi. Mpe yandi vwandaka ya kutelama na mwelo. 4 Muntu yina tubaka na munu: Nge mwana ya muntu, tala mbote na meso ya nge mpe kuwa mbote na makutu ya nge. Tala mbote-mbote mambu nyonso yina mu ke lakisa nge, samu ti ba me nata nge awa samu na kutala. Na yina, nge ke zabisa dikanda ya Isayeli mambu yina nge ke ke tala.

Lupangu na myelo yina ke talaka na ngaanda

5 Yayi ni mambu yina mu talaka: Bibaka ya lupangu vwandaka zunga Yinzo nyonso ya Yave. Muntu yango vwandaka ya kusimba mukawa yina ba ke tezilaka, mukawa yina vwandaka keba ve na bametele tatu. Yandi tezaka nene ya bibaka, yawu vwandaka bametele tatu. Yandi tezaka yinda ya bibaka, yawu vwandaka bametele tatu. 6 Yandi belamaka na mwelo yina kele na wesete, mpe yandi yulukaka bikada. Yandi tezaka nene ya nkotolo ya lupangu mpe yawu vwandaka yinda mutindu mosi na mukawa ya yandi. 7 Konso kivinga vwandaka yinda mutindu mukawa, nene ya yawu mpe vwandaka mutindu mukawa. Bivinga vwandaka ya kukabuka keba ve na bametele zole na ndambu. Nkotolo ya mwelo, pene-pene ya kivinga ya nkotolo, na kati ya yawu vwandaka na bametele tatu. 8 Yandi tezaka kati ya kivinga ya nkotolo, yinda ya yawu vwandaka mutindu mukawa. 9 Yandi tezaka kivinga ya nkotolo, yinda ya yawu vwandaka keba ve bametele yiya. Na kati, ya vwandaka na makunzi zole mpe nene ya konso dikunzi vwandaka keba ve na metele mosi. Ni kivinga yina ya nkotolo vwandaka pene-pene na Yinzo ya Yave. 10 Na lweka ya esete, na nkotolo ya mwelo, ya vwandaka na bivinga ya nkotolo sambanu, samu na kukengaka tatu na lweka mosi mpe tatu na lweka ya nkaka. Bivinga nyonso sambanu vwandaka yinda mutindu mosi, mpe makunzi ya konso lweka ya bivinga ya nkotolo vwandaka yinda mutindu mosi. 11 Muntu yango tezaka nkotolo ya mwelo, yawu vwanda keba ve bametele tanu. Yinda ya yawu vwandaka keba ve bametele sambanu na ndambu. 12 Na ntwala ya bivinga ya nkotolo, ya vwandaka na bibaka ya fyoti, mutela ya yawu vwandaka basentimetele makumi tanu. Konso kivinga vwandaka keba ve bametele tatu na balweka nyonso. 13 Yandi tezaka nene ya mwelo katuka na zulu ya muludi ya kivinga ya nkotolo tii na muludi ya kivinga ya nkaka yina vwandaka talasana na mwelo. Nene ya yawu vwandaka keba ve bametele kumi na zole na ndambu. 14 Yandi tezaka mpe nene ya makunzi, yawu vwandaka keba ve bametele makumi tatu. Makunzi vwandaka pene-pene ya mwelo ya ngaada ya kati. 15 Kubanda na ntwala ya mwelo ya nkotolo tii na kivinga ya nkotolo, ya vwandaka keba ve makumi zole na tanu ya bametele. 16 Bivinga yango, na banela ya yawu na makunzi vwandaka na bangileyaze yina vwandaka zunga yawu tii na kati ya mwelo. Ntwala ya yinzo mpe vwandaka na banela yina vwandaka zunga yawu. Yawu bandaka na kati ya yinzo. Ba fikulaka maba na zulu ya konso dikunzi. 17 Na manima, muntu yango nataka munu na ngaanda ya lupangu, bisika yina vwandaka na bivinga. Ba yidikaka dale yina vwandaka zunga ngaanda ya lupangu. Na dale yina vwandaka na bivinga makumi tatu. 18 Dale yina vwandaka na balweka ya mwelo, yawu vwandaka yinda mutindu mosi na mwelo. Yina ni dale ya yisi. 19 Yandi tezaka yinda ya ntwala ya mwelo, na kisika ya yisi ya mwelo yina vwandaka talasana ya yawu, tii na ngaanda ya kati ya lupangu. Yinda ya yawu vwandaka na bametele makumi tanu. Nyonso yina vwandaka na lweka ya esete. Yayi ni bima yina me tadila lweka ya node. 20 Yandi tezaka yinda mpe nene ya mwelo ya lupangu yina ke talaka na node. 21 Bivinga tatu na lweka mosi mpe bivinga tatu na lweka ya nkaka, ntwala ya Yinzo mpe makunzi ya yawu vwandaka yinda mutindu mosi na mwelo ya ntete. Yawu vwandaka keba ve makumi zole na tanu ya bametele na yinda ya yawu mpe nene ya yawu vwandaka bametele kumi na zole na ndambu. 22 Ntwala ya Yinzo, na banela, na maba yina ba fikulaka, nyonso vwandaka yinda mutindu mosi na mwelo yina vwandaka tala na lweka ya esete. Ba vwandaka yuluka bikada nsambwadi, bikada yina vwandaka kwenda tii na ntwala ya bivinga ya nkotolo. 23 Ya vwandaka na mwelo na ngaanda ya kati ya lupangu, yawu vwandaka na lweka ya mwelo ya node, ya vwandaka mutindu mosi mpe na mwelo ya esete. Muntu yango tezaka kubanda mwelo mosi tii na mwelo ya nkaka, yawu vwandaka keba ve makumi tanu ya bametele. 24 Na manima, yandi nataka munu na lweka ya sude, mpe mu talaka mwelo yina vwandaka tala na sude. Yandi tezaka makunzi mpe bivinga ya nkotolo, yawu vwandaka yinda mutindu mosi. 25 Na balweka nyonso ya banela na ntwala ya bivinga ya nkotolo, ya vwandaka na banela mutindu mosi. Banela yango vwandaka yinda keba ve bametele makumi zole na tanu mpe nene ya yawu keba ve kumi na zole na ndambu. 26 Ba vwandaka yuluka bikada nsambwadi, bikada yina vwandaka kwenda tii na ntwala ya bivinga ya nkotolo. Ba fikulaka maba na balweka nyonso ya makunzi. 27 Ngaanda ya kati ya lupangu vwandaka na mwelo yina vwandaka kwenda na sude. Muntu yango tezaka mwelo mosi tii na mwelo ya nkaka yina kele na lweka ya sude, yawu vwandaka keba ve bametele makumi tanu. 28 Yandi nataka munu, na ngaanda ya kati ya yinzo na kulutilaka na mwelo yina ya sude. Yandi tezaka mwelo ya sude, yinda ya yawu vwandaka mutindu mosi myelo ya nkaka. 29 Bivinga ya bankebi, makunzi, bivinga ya nkotolo, nyonso vwandaka yinda mutindu mosi na bivinga nyonso ya nkaka, mwelo na bivinga ya nkotolo vwandaka na banela na balweka nyonso. Yinda ya nyonso vwandaka keba ve makumi zole na tanu ya bametele mpe nene ya yawu vwandaka keba ve bametele kumi na zole na ndambu. 30 Na ntwala ya bivinga ya nkotolo mpe balweka nyonso ya vwandaka yinda keba ve bametele kumi na zole na ndambu mpe nene ya yawu vwandaka keba ve bametele zole na ndambu. 31 Ntwala ya bivinga ya nkotolo vwandaka kuma tii na ngaanda ya lupangu, ba fikulaka maba na makunzi mpe na kuyuluka na yawu ya vwandaka na bikada nana. 32 Yandi nataka munu na ngaanda ya kati ya Yinzo na lweka ya esete. Yandi tezaka mwelo mpe yawu vwandaka yinda mutindu myelo nyonso. 33 Bivinga ya bankebi, makunzi, na bivinga ya nkotolo, nyonso vwandaka yinda mutindu mosi na bivinga ya nkaka. Mwelo, na kivinga ya nkotolo vwandaka na banela na balweka nyonso. Yinda ya yawu nyonso vwandaka keba ve bametele makumi zole na tanu, mpe nene ya yawu vwandaka keba ve bametele kumi na zole na ndambu. 34 Bivinga ya nkotolo vwandaka talasana na ngaanda ya lupangu, ba fikulaka maba na makunzi na balweka nyonso, ba vwandaka yuluka na bikada nana. 35 Muntu yango nataka munu na mwelo yina kele na node, yandi tezaka mwelo, yawu vwandaka yinda mutindu mosi na myelo ya nkaka. 36 Bivinga ya bankebi, makunzi, na bivinga ya nkotolo vwandaka na banela na balweka nyonso. Yawu vwandaka yinda keba ve makumi zole na tanu ya bametele, nene ya yawu vwandaka keba ve bametele kumi na zole na ndambu. 37 Bivinga ya nkotolo ya yawu vwandaka kuma tii na ngaanda ya lupangu. Ba fikulaka maba na makunzi na balweka nyonso, ba vwandaka yuluka na bikada nana. 38 Na konso nkotolo ya ngaanda ya kati ya Yinzo, ya vwandaka na kivinga, kisika yina banganga-Nzambi vwandaka sukula minkayulu ya kuyoka. 39 Na kati ya kivinga ya nkotolo, ya vwandaka na bamesa zole na lweka mosi mpe na lweka ya nkaka. Ni na zulu ya bamesa yina ba vwandaka kufwa bibulu samu na munkayulu ya kuyoka. Minkayulu samu na masumu mpe munkayulu ya kikodi. 40 Na ngaanda ya kivinga ya nkotolo, na kisika yina kele pene-pene ya mwelo ya node. Ya vwandaka na bamesa zole na lweka mosi mpe bamesa zole na lweka ya nkaka. 41 Ya vwandaka na bamesa yiya na lweka mosi ya mwelo mpe bamesa yiya na lweka ya nkaka. Bamesa nana yina ba vwandaka sadila samu na kufwa minkayulu ya kuyoka. 42 Ya vwandaka mpe na bamesa yiya ya matadi yina ba pasulaka samu na minkayulu ya kuyoka, yinda na yawu vwandaka keba ve makumi nsambwadi na tanu ya basentimetele mpe nene ya yawu vwandaka keba ve makumi nsambwadi na tanu ya basentimetele. Yinda ya yawu kubanda na yisi tii na zulu vwandaka keba ve makumi tanu ya basentimetele. Na zulu ya bamesa yina, ba vwandaka tula bisalulu yina ba vwandaka sadila samu na minkayulu mpe minkayulu ya kuyoka. 43 Na balweka ya bamesa nyonso, ya vwandaka na mwa banzila ya basentimetele nana. Misuni ya bibulu yina ba vwandaka pesa mutindu minkayulu, ba vwandaka tula yawu na zulu ya bamesa. 44 Na ngaanda ya kati ya Yinzo, ya vwandaka na bivinga zole ya miyimbidi, na ngaanda ya kati ya Yinzo. Kivinga mosi na lweka ya mwelo na node mpe yawu vwandaka tala na sude. Mwelo ya nkaka vwandaka na lweka ya nkaka mpe yawu vwandaka tala na node. 45 Muntu yango tubaka na munu: Kivinga yina ke na kutala na sude, yawu kele ya banganga-Nzambi yina ke salaka na Yinzo ya Yave. 46 Kivinga yina ke talaka na node, yawu kele ya banganga-Nzambi yina ke salaka na kiyokolo ya minkayulu. Bawu kele bana ya Sadoke, bayina kele na lutangu ya bana ya Levi. Bawu vwandaka belama na mantwala ya Yave samu na kusadila yandi.

Mutindu Yinzo ke vwandila

47 Yandi tezaka ngaanda ya lupangu, yawu vwandaka yinda keba ve makumi tanu ya bametele mpe nene ya yawu vwandaka keba ve makumi tanu ya bametele. Balweka nyonso yiya vwandaka mutindu mosi. Kiyokolo ya minkayulu vwandaka na nkotolo, na mantwala ya Yinzo. 48 Yandi nataka munu na mantwala ya kivinga ya nkotolo na Yinzo, yandi tezaka makunzi ya ntwala ya Yinzo. Ya vwandaka yinda keba ve bametele zole na ndambu na lweka mosi mpe lweka ya nkaka vwandaka keba ve bametele zole na ndambu. Yinda ya mwelo vwandaka keba ve metele mosi na ndambu na lweka mosi mpe metele mosi na ndambu na lweka ya lweka. 49 Kivinga ya nkotolo na Yinzo, yinda ya yawu vwandaka keba ve kumi ya bametele mpe nene ya yawu vwandaka keba ve bametele tanu na ndambu. Ba vwanda kwenda kuna na kuyulukaka na bikada, na konso lweka ya makunzi, ya vwandaka mpe na makunzi yina ke simbaka mwelo.