ESETELE
Mukembo ya ntinu Zelezese
1
Mambu yayi salamaka na ntangu yina ntinu Zelezese vwandaka yala bizunga nkama na makumi zole na nsambwadi (127), kubanda na Inde tii na Nubi. 2 Na kilumbu yina, yandi kwizaka vwanda na kiti ya kintinu na mbanza Suze. 3 Na mvula ya tatu ya kintinu ya yandi, yandi salaka mukembo ya nene samu na bamfumu ya luyalu yina ke salaka na yandi, samu na bisadi ya yandi mpe samu na bamfumu ya bambulu-mbulu ya Pelese, ya Medi mpe samu na bantwadisi, na bamfumu ya bizunga. Bawu nyonso kwizaka vukana na mantwala ya ntinu. 4 Yandi lakisaka bawu bimvwama nyonso ya kitoko yina vwandaka sala bunene mpe nkembo ya kimfumu ya yandi. Mukembo yango salaka bangonda sambanu. 5 Na manima, ntinu salaka mpe mukembo samu na bantu nyonso yina ke zingaka na mbanza Suze, kubanda na bamvwama tii na bantu ya mpamba. Mukembo yango salamaka na kati ya lupangu ya ntinu mpe yawu salaka bilumbu nsambwadi. 6 Ba tulaka na makunzi ya maabe balele yina ba yidikilaka na basinga ya kitoko ya pembe na ya bleu. Ba vukisaka yawu na milunga mpe basinga ya lino ya mbwaki mpe ba kangaka yawu na makunzi ya wolo na ya palata. Ba tulaka bakiti ya nene ya wolo mpe ya palata na kisika yina ba tandaka matadi ya mbwaki yina ba ke bokilaka badale, ya mpembe, ya mpembe ya kulezima mpe ya ndombe. 7 Ba vwandaka kabula malafu na babungu ya wolo ya mutindu na mutindu. Malafu vwandaka mingi mpe bantu nyonso vwandaka kunwa yawu na kati ya kimpwanza yina ntinu pesaka bawu. 8 Konso muntu kunwaka malafu na kimpwanza nyonso samu ti ntinu pesaka muswa na bisadi ya yandi nyonso na kuyukutisa bansatu ya bantu nyonso yina yandi bokilaka na mukembo. 9 Vasiti kento ya ntinu, salaka mpe mukembo ya nene na bakento kuna na yinzo ya kintinu ya ntinu Zelezese.Vasiti mangaka na kutumama na ntinu
10 Na kilumbu ya nsambwadi ya mukembo, mutindu ntinu vwandaka na kyese mingi samu na malafu yina yandi kunwaka, yandi bokilaka bakalaka ansambwadi yina ke salaka na yandi. Bankumbu ya bawu kele: Mewumane, Bizeta, Alabona, Bingeta, Avangeta, Zetale mpe Kaakase. 11 Yandi tumisaka bawu na kunatina yandi kento ya yandi Vasiti na yimpu ya yandi ya kintinu ya kento. Ntinu salaka mutindu yina samu na kulakisa kitoko ya kento ya yandi na mantwala ya bantu nyonso yina vwandaka kuna mpe na bamfumu ya luyalu yina ke salaka na yandi, samu ti kento yango vwandaka kitoko mingi. 12 Bakalaka yina ke salaka na ntinu kwendaka pesa nsangu na sika ya Vasiti kento ya ntinu, kasi yandi tumamaka ve. Na yina, ntinu dasukaka mpe nkele ya yandi kumaka ya kulutila. 13 Yandi zabisaka na bantu ya ndwenga mpe na bantu yina zaba misiku mpe mfundusu na kuyidika dyambu yayi, samu ti, ni bawu vwandaka na muswa ya kuyidikaka mambu ya ntinu. 14 Bayina vwandaka pene-pene ya ntinu samu na kupesaka yandi malongi, ya vwandaka: Kaasena, Setale, Ademata, Taasise, Melese, Maasena, Memukane, bamfumu nsambwadi ya luyalu ya bayinsi ya Pelese mpe ya Medi bayina vwandaka na mulonga ya ntete na kati ya kimfumu. 15 Na yina, ntinu tubaka na bawu: «Mutindu Vasiti me tumama ve na lutumu yina mu pesaka yandi ntangu mu fidisaka bakalaka ya munu, yinki beto fwana kusala na yina me tadila musiku?»
16 Na mantwala ya ntinu mpe ya bamfumu ya luyalu yina ke salaka na ntinu, Memukane tubaka: «Vasiti kento ya ntinu me sala yimbi kaka na sika ya ntinu ve, kasi yandi me safula mpe bamfumu ya luyalu yina ke salaka na ntinu mpe bantu nyonso ya bizunga yina kele na lutumu ya ntinu Zelezese. 17 Na yina, nkadulu ya kento ya ntinu ke sala ti bakento nyonso tumama ve na babakala ya bawu na kutubaka na bawu ti: “Ntinu Zelezese tumisaka ti ba natina yandi Vasiti na mantwala ya yandi kasi Vasiti mangaka na kukwiza!” 18 Kubanda bubu yayi, bakento ya bamfumu ya luyalu ya Pelese mpe ya Medi, bayina me kuwa nsangu ya nkadulu ya yimbi ya kento ya ntinu, ke zitisa dyaka ve babakala ya bawu mpe yawu ke sala ti babakala ya bawu kudasuka. 19 Ni yawu yina, kana ntinu zola, yandi zonza dyambu mpe ba ke sonika yawu na kati ya dibuku ya misiku ya Pelese mpe ya Medi mpe ata muntu ke manga yawu. Musiku yango fwana kutuba ti Vasiti ke talana dyaka ata fyoti ve na mantwala ya ntinu Zelezese. Mpe ntinu ke pesa kimfumu ya kintinu ya kento na sika ya kento ya nkaka yina me lutila Vasiti na nkadulu ya mbote. 20 Ntangu musiku yango ke zabana na kati ya kimfumu nyonso, bakento nyonso ke pesa babakala ya bawu buzitu, ya vwanda bamvwama to bamputu.»
21 Ntinu mpe bamfumu ya luyalu yina ke salaka na ntinu ndimaka mambu yina Memukane tubaka mpe bawu sadilaka yawu. 22 Ntinu fidisaka mikanda na bizunga nyonso, mpe na konso kizunga, yandi sonikinaka bawu na bisono ya bawu mpe na bandinga ya bawu ya bwala, samu ti konso muntu kuvwanda mfumu ya yinzo ya yandi mpe ti yandi zonza ndinga ya yandi ya bwala.