Neyemi 12

Banganga-Nzambi mpe ba-Levite

Yayi ni bankumbu ya banganga-Nzambi na ba-Levite, bayina katukaka na bundongo mpe kwizaka na Zolobabele, mwana ya Saletyele, na Zozuwe: Selaya, Yilemeya, Ezela, 2 Amalya, Maluke, Atuse, 3 Sekanya, Lewume, Melemote, 4 Ido, Nginetoyi, Aviya, 5 Miyamine, Maadya, Bilenga, 6 Semaya, Yoyalive, Yedaya, 7 Salu, Amoke, Ilekiya, Yedaya. Ni bawu vwandaka bamfumu ya banganga-Nzambi mpe ya bampangi ya bawu, na ntangu ya Zozuwe. 8 Ba-Levite: Yesuwa, Binwi, Kademyele, Selevya, Yewuda, Matanya, yandi na bampangi ya yandi vwandaka yimbila mikunga ya nzitusu. 9 Bakebukya mpe Uni, na bampangi ya bawu, vwandaka na mantwala ya bawu, samu na kusadisa bawu.

10 Zozuwe butaka Yoyakime, Yoyakime butaka Elyasive, mpe Elyasive butaka Yoyada. 11 Yoyada butaka Yonatane, Yonatane butaka Yaduwa.

12 Yayi ni banganga-Nzambi yina vwandaka bamfumu ya makanda na ntangu ya Yoyakime: Melaya samu na dikanda ya Selaya, Ananya samu na dikanda ya Yilemeya, 13 Mesulame samu na dikanda ya Ezela, Yewoyanane samu na dikanda ya Amalya, 14 Yonatane samu na dikanda ya Meliku, Yosefi samu na dikanda ya Sevanya, 15 Adena samu na dikanda ya Alime, Elekayi samu na dikanda ya Melayote, 16 Zakali samu na dikanda ya Ido, Mesulame samu na dikanda ya Nginetone, 17 Zikeli samu na dikanda ya Aviya, ... samu na dikanda ya Minyamine, Piletayi samu na dikanda ya Mowadya, 18 Samuwa samu na dikanda ya Bilenga, Yonatane samu na dikanda ya Semaya, 19 Matenayi samu na dikanda ya Yoyalive, Uzi samu na dikanda ya Yedaya, 20 Kalayi samu na dikanda ya Salayi, Ebele samu na dikanda ya Amoke, 21 Asavya samu na dikanda ya Ilekiya, Netanele samu na dikanda ya Yedaya.

22 Na ntangu ya Elyasive, na Yoyada, na Yoyanane, na Yaduwa, bankumbu ya ba-Levite na banganga-Nzambi, bayina vwandaka bamfumu ya makanda, vwandaka ya kusonama tii na ntangu yina Dalyuse vwandaka ntinu ya Pelese.

23 Bankumbu ya bana ya Levi, bayina vwandaka bamfumu ya makanda, yawu vwandaka ya kusonama na kati ya dibuku ya kinkulu, tii na ntangu ya Yoyanane, mwana ya Elyasive.

24 Yayi ni bankumbu ya bamfumu ya ba-Levite: Asavya, Selevya mpe Yesuwa, mwana ya Kademyele na bampangi ya bawu, yina vwandaka yimbila na mantwala ya bawu mutindu Davidi, muntu ya Nzambi, tumisaka yawu. Konso nkonga, na ntangu ya yandi, vwandaka yimbila mikunga ya nzitusu mpe ya matondo.

25 Minkebi ya myelo Matanya, Bakebukya, Obadya, Mesulame, Talemone, mpe Akuve, bawu vwandaka keba myelo ya bayinzo ya bibumbulu, yina vwandaka pene-pene na myelo ya Yinzo ya Nzambi. 26 Bantu yayi, vwandaka sala kisalu ya bawu na ntangu ya Yoyakime, mwana ya Zozuwe, mwana ya Yosadake, mpe na ntangu ya Neyemi, mfumu ya kizunga, mpe ya nganga-Nzambi Ezela, mulongisi ya misiku.

Mukembo ya mbyekolo ya kibaka ya Yelusalemi

27 Na ntangu ya mukembo ya mbyekolo ya kibaka ya lupangu ya Yelusalemi, ba kwendaka bokila ba-Levite na bisika nyonso yina bawu vwandaka zinga, samu ti, bawu kwiza na Yelusalemi, samu na kukembila mukembo ya mbyekolo na kyese nyonso. Bawu zolaka kembila yawu na kuvutulaka matondo mpe na kuyimbilaka mikunga, na basembale, na bansambi. 28 Bana ya miyimbidi kwizaka vukana kukatuka na mwa kizunga yina kele pene-pene ya Yelusalemi, na babwala ya ba-Netofate, 29 na bwala Bete-Ngilengale, na bilanga ya Ngeva mpe ya Azemawete, samu ti, miyimbidi tungaka babwala ya bawu pene-pene na Yelusalemi. 30 Banganga-Nzambi na ba-Levite vedisaka banzutu ya bawu. Bawu vedisaka bantu, na myelo, na kibaka ya lupangu.

31 Mu yulukisaka bamfumu ya Yuda na zulu ya kibaka ya lupangu. Mu yidikaka bimvuka zole ya nene ya miyimbidi. Kimvuka ya ntete vwandaka kwenda na lweka ya diboko ya bakala, na zulu ya kibaka ya lupangu. Bawu lutilaka ntama ve na mwelo yina ba ke bokilaka Mboloso. 32 Osaya, mpe ndambu ya bamfumu ya Yuda, vwandaka tambula na manima ya bawu, 33 Azalya, Ezela, Mesulame, 34 Yewuda, Bezame, Semaya, na Yilemeya. 35 Na kati ya bana ya banganga-Nzambi bayina vwandaka na bakulumenta: Zakali, mwana ya Yonatane, mwana ya Semaya, mwana ya Matanya, mwana ya Mikaya, mwana ya Zakule, mwana ya Asafe, 36 na bampangi ya yandi Semaya, Azalele, Milalayi, Ngilalayi, Maayi, Netanele, Yewuda, Anani, bawu vwandaka na bisikulu ya Davidi, muntu ya Nzambi. Ezela mulongisi ya misiku vwandaka na mantwala ya bawu. 37 Na kisika yina kele mwelo yina ba bokilaka mwelo ya Mukelo, na mantwala ya bawu, bawu tambulaka na zulu ya bikada ya mbanza ya Davidi, na zulu ya kibaka ya lupangu, na zulu ya yinzo ya Davidi tii na esete, na mwelo yina ba ke bokilaka mwelo ya Maza.

38 Kimvuka ya zole ya miyimbidi vwandaka kwenda na lweka ya diboko ya kento. Munu mosi vwandaka na manima ya bawu, kintwadi na ndambu ya nkonga. Beto vwandaka tambula na zulu ya kibaka ya lupangu, pene-pene ya yinzo ya mutela ya yinda yina ba ke bokilaka Bafule tii na kibaka ya nene, 39 na zulu ya mwelo ya Efalayime, na ya mwelo ya Yesana, na ya mwelo yina ba ke bokilaka Bambisi, na ya yinzo ya mutela ya yinda ya Ananeele, mpe na yinzo ya mutela ya yinda yina ba ke bokilaka Nkama, tii na mwelo yina ba ke bokilaka Mameme. Ba kwizaka suka na mwelo yina ba ke bokilaka Minkebi. 40 Na manima, bimvuka nyonso zole ya miyimbidi kwendaka telamaka na Yinzo ya Nzambi na munu mosi, mpe na ndambu ya bamfumu ya mbanza yina vwandaka na munu. 41 Banganga-Nzambi Elyakime, Maaseya, Minyamine, Mikaya, Elyowenayi, Zakali, na Ananya, vwandaka na bakulumenta. 42 Ya vwandaka mpe na Maaseya, Semaya, Elazale, Uzi, Yewoyanane, Malekiya, Elame, na Ezele. Miyimbidi vwandaka yimbila mikunga na lutwadusu ya Yizelaya.

43 Na kilumbu yina, bantu pesaka minkayulu mingi na nsayi nyonso, samu ti Nzambi salaka ti bawu kuvwanda na nsayi mingi. Bakento na bana mpe vwandaka yangalala. Makelele ya nsayi, yina vwandaka na Yelusalemi, vwandaka wakana ntama.

Bikunku ya banga-Nzambi mpe ya ba-Levite

44 Na kilumbu yina, ba soolaka bantu samu na kukengidila bivinga yina ba kubikaka samu na kubumbaka makabu. Makabu yina ni badime, na bambuma ya ntete mpe Badime. Ba vwandaka tula na kati ya bivinga yina, bima yina vwandaka katuka na bilanga yina kele pene-pene na bambanza, bikunku yina Musiku tumisaka samu na banganga-Nzambi na ba-Levite. Bantu ya Yuda vwandaka yangalala samu na banganga-Nzambi mpe ba-Levite yina vwandaka sala. 45 Bawu vwandaka sala kisalu ya Nzambi ya bawu, na kisalu ya kuvedisa. Miyimbidi na minkebi ya myelo vwandaka sadila mutindu tumisaka Davidi na mwana ya yandi Salomone. 46 Na ntangu ya ntama, yina Davidi na Asafe vwandaka ntete moyo, ya vwandaka na bamfumu ya miyimbidi. Ya vwandaka mpe na mikunga ya nzitusu, na ya kuvutula matondo na Nzambi. 47 Na ntangu ya Zolobabele mpe na ntangu ya Neyemi, konso kilumbu, bantu nyonso ya Isayeli vwandaka pesa bikunku ya miyimbidi na ya minkebi ya myelo. Bawu vwandaka pesa mpe bikunku ya longo ya ba-Levite, mpe ba-Levite vwandaka pesa bikunku ya longo ya bana ya Aaloni.