Ba-Zwife yina vutukaka na Yelusalemi
11
Bamfumu ya ba-Zwife kwendaka zinga na Yelusalemi. Bantu ya nkaka bulaka dzeke samu na kuzaba nani na kati ya kumi ya bantu ke kwenda zinga na Yelusalemi, mbanza ya longo. Bantu yivwa ya nkaka ke bikana na bambanza ya nkaka. 2 Bantu sakumunaka bayina nyonso ndimaka, na luzolo ya bawu mosi, na kwenda zinga na Yelusalemi.3 Ya vwandaka na bamfumu ya kizunga yina kwizaka zinga na Yelusalemi. Na bambanza ya Yuda, bantu ya Isayeli, banganga-Nzambi, ba-Levite, bisadi ya Yinzo ya Yave mpe bana ya bisadi ya Salomone, bawu vwandaka zinga na bayinzo ya bawu, mpe na bambanza ya bawu. 4 Ndambu ya bantu ya dikanda ya Yuda na ya Bezame kwendaka zinga na Yelusalemi. Yayi ni bantu ya dikanda ya Yuda: Ataya, mwana ya Uziya, mwana ya Zakali, mwana ya Amalya, mwana ya Sefatya, mwana ya Mayalalele, na kivumu ya Pelese, 5 Maaseya, mwana ya Baluke, mwana ya Kole-Yoze, mwana ya Azaya, mwana ya Adaya, mwana ya Yoyalive, mwana ya Zakali, mwana ya Asiloni. 6 Lutangu ya bantu ya dikanda ya Pelese, bayina kwendaka zinga na Yelusalemi vwandaka 468 ya bantu ya ngolo.
7 Yayi ni bantu ya dikanda ya Bezame: Salu, mwana ya Mesulame, mwana ya Yowede, mwana ya Pedaya, mwana ya Kolaya, mwana ya Maaseya, mwana ya Ityele, mwana ya Yesaya. 8 Na manima ya yandi, Ngabayi, Salayi: 928. 9 Yoweli, mwana ya Zikeli vwandaka mfumu ya bawu, mpe Yewuda, mwana ya Asenuwa, vwanda mfumu ya zole ya mbanza.
10 Yayi ni banganga-Nzambi: Yedaya, mwana ya Yoyalive, Yakine, 11 Selaya, mwana ya Ilekiya, mwana ya Mesulame, mwana ya Sadoke, mwana ya Melayote, mwana ya Ayituve, ntwadisi ya Yinzo ya Nzambi. 12 Bampangi ya bawu, bayina vwandaka sala na Yinzo ya Nzambi: 822. Adaya, mwana ya Yeloyame, mwana ya Pelalya, mwana ya Amesi, mwana ya Zakali, mwana ya Pasewule, mwana ya Malekiya, 13 na bampangi ya yandi bamfumu ya makanda: 242, Amasesayi, mwana ya Azalele, mwana ya Azayi, mwana ya Mesilemote, mawana ya Imele, 14 na bampangi ya bawu, babakala yina ke na ngolo na kibakala: 128. Mfumu ya bawu vwandaka Zavedyele, mwana ya Ngedolime.
15 Na kati ya ba-Levite ya vwandaka: Semaya, mwana ya Asuve, mwana ya Azelikame, mwana ya Asavya, mwana ya Buni, 16 mpe Sabetayi na Yozavade, na lutangu ya bakuluntu ya ba-Levite, bayina vwandaka twadisa kisalu ya ngaanda ya Yinzo ya Nzambi, 17 Matanya, mwana ya Mika, mwana ya Zavedi, mwana ya Asafe, yina vwandaka twadisa mikunga ya nzitusu na ntangu ya lusambulu. Bakebukya, kilandi mpe mosi na bampangi ya yandi, na Aveda, mwana ya Samuwa, mwana ya Ngalale, mwana ya Yedutune. 18 Lutangu ya ba-Levite yina vwandaka na kati ya mbanza ya longo vwandaka 284.
19 Minkebi ya myelo: Akuve, Talemone na bampangi ya bawu yina vwandaka kengidila myelo: 172.
20 Bantu ya nkaka ya Isayeli, banganga-Nzambi na ba-Levite, bawu vwandaka zinga na kati ya bambanza nyonso ya Yuda, konso muntu na kati ya ntoto ya yandi. 21 Bisadi ya Yinzo ya Yave vwandaka zinga na kisika yina ba ke bokilaka Ofele. Siya na Ngisepa vwandaka bamfumu ya bawu.
22 Mfumu ya ba-Levite na Yelusalemi vwandaka Uzi, mwana ya Bani, mwana ya Asavya, mwana ya Matanya, mwana ya Mika na kati ya bana ya Asafe. Bawu vwandaka miyimbidi yina vwandaka yimbila na Yinzo ya Nzambi. 23 Ntinu pesaka lutumu na yina me tadila miyimbidi mpe lukanu na yina me tadila kisalu ya bawu ya konso kilumbu.
24 Petaya, mwana ya Mesezaveele, na kati ya bana ya Zela, mwana ya Yuda. Yandi vwandaka pene-pene ya ntinu, samu na mambu nyonso yina me tadila bantu.
Ba-Zwife yina vwandaka ve na Yelusalemi
25 Na yina me tadila babwala yina kele pene-pene ya bilanga, bana ya nkaka ya dikanda ya Yuda kwendaka zinga na Kilyate-Aleba, mpe na babwala yina kele pene-pene na yawu. Ba ya nkaka, na Divone mpe na babwala yina kele pene-pene na yawu. Ba ya nkaka dyaka, na Yekaveseele mpe na babwala yina kele na yawu. 26 Bantu yango ya nkaka kwendaka na babwala Yesuwa, Molada, Bete-Pelete, 27 Asale-Suwale, Beele-Seva mpe babwala yina kele pene-pene na yawu, 28 Sikelange, Mekona mpe babwala yina kele pene-pene na yawu, 29 Eyine-Limone, Soleya, Yalemute, 30 Zanowa, Adulame mpe babwala yina kele kuna, Lakise na bilanga ya bwala yina, Azeka mpe babwala yina kele pene-pene na yawu. Bawu kwendaka zinga kubanda na Beele-Seva na banda tii na mudimba ya Inome na londe.
31 Bana ya Bezame kwenda zinga na Ngeva, na Mikemase, na Aya, na Betele mpe na babwala yina kele pene-pene na yawu, 32 na Anatote, na Nove, na Ananya, 33 na Asole, na Lama, na Ngitayime, 34 na Adide, na Sevoyime, na Nebalate, 35 na Lode, mpe Ono, na mudimba ya bantu yina ke salaka bisalu ya maboko.
36 Bankonga ya nkaka ya ba-Levite ya Yuda kwendaka zinga na sika ya bantu ya Bezame.