Ba-Zwife bingisaka na makwela bakento ya bawu ya nzenza
10
Ntangu Esedase vwandaka sambila ya kufukama na kudila nyonso na mantwala ya Yinzo ya Yave samu na kulomba mulemvo ya masumu, nkonga ya nene ya bantu ya Isayeli, bakento, babakala mpe bana, kwizaka yonzama pene-pene ya yandi mpe vwandaka dila mingi. 2 Na yina, Sekanya mwana ya Elyele yina vwandaka muntu ya dikanda ya Elame tubaka na Esedase: «Beto salaka yimbi na meso ya Nzambi ya beto samu ti beto kwelaka bakento ya bayinsi ya nzenza yina ke na kuzingaka awa. Kasi ntangu yayi, ata ti beto salaka yimbi, kivuvu kele ntete samu na bantu ya Isayeli. 3 Beto bakeno lukanu na mantwala ya Nzambi ya kubingisa bakento nyonso ya bayinsi ya nzenza na bana ya bawu. Na yina, beto ke landa malongi ya nge na ya bayina ke zitisaka misiku ya Nzambi ya beto. Beto saleno mutindu Musiku ya Nzambi ke na kutumisa. 4 Telama samu ti mambu yayi me tadila nge. Beto kele na manima ya nge. Vwanda na kibakala mpe sala kisalu.»5 Na yina, Esedase telamaka. Yandi tumisaka bamfumu ya banganga-Nzambi, bamfumu ya ba-Levite mpe bamfumu ya makanda ya Isayeli na kudya ndefi samu na kusadila mambu yina Sekanya tubaka. Bawu nyonso kudyaka ndefi. 6 Na yina, Esedase katukaka na mantwala ya Yinzo ya Yave, yandi kwendaka na kivinga ya Yowanane mwana ya Elyasive. Yandi vwandaka kuna ata kudya ata kunwa. Yandi vwandaka na kati ya kyadi ya kulutila samu na yimbi ya nene yina salaka bantu yina katukaka na bundongo mpe vutukaka na Yelusalemi.
7 Ba mwangisaka nsangu na Yuda mpe na Yelusalemi ti bayina nyonso katukaka na bundongo mpe vutukaka fwana kuyonzama na Yelusalemi. 8 Kana muntu mosi kwiza talana ve na kati ya bilumbu tatu yina ke na kulanda, bamfumu mpe bakuluntu ya makanda me baka lukanu ya kubaka bimvwama ya yandi nyonso mpe ba ke bingisa yandi na kimvuka ya bawu.
9 Na kati ya bilumbu tatu, bantu nyonso ya Yuda mpe ya Bezame yonzamaka na Yelusalemi. Na kilumbu ya makumi zole ya ngonda ya yivwa, bantu nyonso yonzamaka na ngaanda ya lupangu ya Yinzo ya Yave. Bawu vwandaka tekita mingi samu na dyambu yayi mpe samu na mvula yina vwandaka noka. 10 Nganga-Nzambi Esedase telamaka mpe tubaka: «Beno vwandaka ve ya kukwikama na Nzambi na kukwela bakento ya bayinsi ya nzenza mpe samu na yawu beno me bwela dyaka disumu ya nkaka na zulu ya masumu yina salaka bantu ya Isayeli. 11 Ntangu yayi, beno lomba mulemvo ya masumu ya beno na sika ya Yave, Nzambi ya bankoko ya beno mpe beno sala mutindu yandi zola. Beno kabuka na bantu yina ke na kuzinga na yinsi yayi mpe beno bingisa bakento ya nzenza.»
12 Bantu nyonso vutulaka na ngolo nyonso: «Ya tsyelika, beto ke sala mutindu nge me tuba, 13 kasi bantu kele mingi mpe ya ke ntangu ya bamvula ya ngolo. Beto lenda ve na kutatamana na kuvwanda kaka na ngaanda mpe dyambu yayi kele ve dyambu ya kilumbu mosi to ya bilumbu zole samu ti yawu me tadila beto mingi. 14 Na yina, ya lunga ti bamfumu ya beto kubikana awa na Yelusalemi samu na kuyidika mambu yayi. Bantu nyonso ya Isayeli yina kwelaka bakento ya nzenza, ke kwiza kutalana na mantwala ya bamfumu na bilumbu yina ba ke pesa bawu kintwadi na bakuluntu mpe bazuzi ya bambanza ya bawu. Beto ke sala mutindu yayi tii ntangu Nzambi ke katula nkele ya yandi na beto samu na mambu yayi.»
15 Kasi kaka Zonatane mwana ya Azayele mpe Yazaya mwana ya Tikeva mangaka dibanza yayi. Mesulame mpe Levite mosi na nkumbu Sabetayi kindisaka bawu na kumanga yawu. 16 Kasi bantu ya nkaka ya Isayeli yina katukaka na bundongo ndimaka na kusala mutindu yawu lombamaka. Nganga-Nzambi Esedase solaka na konso dikanda, mfumu ya dikanda bayina yandi bokilaka na bankumbu ya bawu. Bawu bandaka na kuyidika mambu yango na kilumbu ya ntete ya ngonda ya kumi. 17 Mpe na kilumbu ya ntete ya ngonda ya ntete ya mvulu yina landaka, bawu manisaka na kuyidika mambu yina me tadila babakala yina kwelaka bakento ya nzenza.
Bankumbu ya ba-Zwife yina kwelaka bakento ya nzenza
18 Na kati ya bana ya banganga-Nzambi yina kwelaka bakento ya nzenza ya vwandaka :
Na kati ya bana ya Zozuwe mwana ya Yosadake mpe bampangi ya yandi : Maseya, Eliyezele, Yalibe mpe Ngedaliya. 19 Bawu kudyaka ndefi ya kubingisa bakento ya bawu mpe samu na kuzwa mulemvo ya masumu ya bawu, bawu pesaka dimeme ya bakala mutindu munkayulu.
20 Na kati ya bana ya Imele: Ananayi mpe Zevadiya.
21 Na kati ya bana ya Alime: Maseya, Eliya, Semaya, Yeliyele mpe Uziya.
22 Na kati ya bana ya Pasewule: Eliyeyonaye, Maseya, Yisimayele, Netanele, Yozavade mpe Eleyasa.
23 Na kati ya ba-Levite: Yozavade, Simeyi, Kelaya to Kelita, Petaya, Yewuda mpe Eliyezele.
24 Na kati ya Miyimbidi: Eliyasive.
Na kati ya mikengi ya mwelo: Salume, Teleme mpe Uli.
25 Na kati ya bantu ya nkaka ya Isayeli :
Bana ya Palewose: Lamiya, Yiziya, Malekiya, Miyamine, Elazale, Malekiya mpe Benaya,
26 na kati ya bana ya Elame: Mataniya, Zekaliya, Yeliyele, Avedi, Yelemote mpe Eliya,
27 na kati ya bana ya Zatu: Eliyeyonaye, Eliyasive, Mataniya, Yelemote, Zavade mpe Aziza,
28 na kati ya bana ya Bevayi: Yoyanane, Ananiya, Zabayi, Atelayi,
29 na kati ya bana ya Bani: Mesulame, Maluke, Adaya, Yasuve, Seyale, Yelamote,
30 na kati ya bana ya Payate-Mowabe: Adena, Kelale, Benaya, Maseya, Mataniya, Besalele, Binuyi, Manase,
31 bana ya Alime: Eliyezele, Yisiya, Malekiya, Semaya, Simeyone,
32 Bezame, Maluke, Semaliya,
33 na kati ya bana ya Asume: Matenayi, Matata, Zavade, Elifelete, Yelemayi, Manase, Simeyi,
34 na kati ya bana ya Bani: Madayi, Amelame, Uyele,
35 Benaya, Bediya, Keluyi,
36 Waniya, Melemote, Eliyasive,
37 Matanya, Matenayi, Yasayi,
38 Bani, Binwuyi, Simeyi,
39 Selemya, Natane, Adaya,
40 Makenadevayi, Sasayi, Salayi,
41 Azalele, Selemiyawu, Semalya,
42 Salume, Amalya mpe Yosefi.
43 Na kati ya bana ya Nebo: Yeyiyele, Matitya, Zavade, Zevina, Yadayi, Yowele, mpe Benaya.
44 Babakala nyonso yayi kwelaka bakento ya nzenza mpe ba yankaka butaka bana na bakento yango.