Esedase 8

Bayina zyetaka kintwadi na Esedase

Bankumbu ya bamfumu ya makanda, yina katukaka na munu, Esedase, na yinsi ya Babilone samu na kuvutuka na Yelusalemi na ntangu yina Atazekezese vwandaka ntinu, ni yayi : 2 na dikanda ya Pinase: Ngelesome, na dikanda ya Itamale : Danyele, na dikanda ya Davidi : Atuse, 3 mosi na bana ya Sekanya, na dikanda ya Palose : Zakaliya na babakala 150 ya dikanda ya yandi, 4 na dikanda ya Payate-Mowabe : Elyeyoyenayi, mwana ya Zelaya mpe babakala 200, 5 na dikanda ya Zatu : Sekanya, mwana ya Yazyele mpe babakala 300, 6 na dikanda ya Adine : Ebede, mwana ya Yonatane mpe babakala 50, 7 na dikanda ya Elame : Yesaya, mwana ya Atalya mpe babakala 70, 8 na dikanda ya Sefatya : Zebadya mwana ya Mikayele mpe babakala 80, 9 na dikanda ya Yowabe : Obadya, mwana ya Yeyele mpe babakala 218, 10 na dikanda ya Bani : Semolite, mwana ya Yosifya mpe babakala 160, 11 na dikanda ya Bebayi : Zakaliya, mwana ya Bebayi mpe babakala 28, 12 na dikanda ya Azegade : Yoyanane, mwana ya Akatane mpe babakala 110, 13 na dikanda ya Adonikame, bantwenya tatu : Elifelete, Yeyele na Semaya, mpe babakala 60, 14 na dikanda ya Bigevayi : Wutayi, Zakule, mpe babakala 70.

Nkubamanu ya Nzyetolo samu na kukwenda na Yelusalemi

15 Mu kutikisaka bantu nyonso, na lweka ya maza yina ke lutilaka na kisika yina ba ke bokilaka Ava mpe beto lutisaka bilumbu tatu kuna. Ntangu mu talaka bantu nyonso, mu talaka banganga-Nzambi kasi ata Levite vwandaka kuna. 16 Na yina, mu bokilaka bamfumu: Elyezele, Alyele, Semaya, Elenatane, Yalibe, Elenatane, Natane, Zekalya, Mesulame, mpe milongisi zole ya misiku Yoyalive mpe Elenatane. 17 Mu tumisaka bawu na kukwenda na sika ya Ido mfumu ya bwala Kasifya. Mu zabisaka bawu mambu yina ba fwanaka tuba na Ido na bampangi ya yandi ya kisalu, bayina ke zingaka na Kasifya, na kunatina beto bantu samu na kisalu na Yinzo ya Nzambi ya beto. 18 Mutindu Nzambi vwandaka lakisa beto bumbote ya yandi, ba natinaka beto Selevya, muntu ya mayela, muntu ya dikanda ya Mali mpe mutekolo ya Levi mwana ya Yakobe, na bana mpe bampangi ya yandi. Bawu vwandaka babakala 18. 19 Bawu nataka mpe Yasavya kitwandi na Yesaya bantu ya dikanda ya Melali, na bana mpe bampangi ya yandi. Bawu vwandaka babakala 20. 20 Ba nataka mpe bantu 220, yina vwandaka sala na Yinzo ya Nzambi na lutumu ya ba-Levite. Bisadi yango vwandaka bana ya bantu yina Davidi na bilandi ya yandi tulaka na kisalu ya Yinzo ya Nzambi. Bankumbu ya bawu nyonso vwandaka ya kusonama.

21 Ntangu beto vwandaka kuna, na lweka ya maza yina ke lutilaka na kisika yina ba ke bokilaka Ava, mu bakaka lukanu ya kutuba ti, beto nyonso manga na kudya samu na Nzambi, samu na kulakisa yandi kukuluka ya beto, samu ti yandi sala ti nzyetolo ya beto, ya makanda mpe ya bima ya beto kuvwanda mbote. 22 Ya tsyelika, mu zolaka tala nsoni kana mu lombaka na ntinu na kupesa beto basoda yina ke tambulaka na makulu mpe basoda yina ke nataka bampunda samu na kukeba beto na nzila, na mantwala ya bambeni ya beto, samu ti beto zabisaka na ntinu ti Nzambi ya beto ke kebaka bantu nyonso yina ke sosaka yandi, kasi nkele ya yandi ke vwandaka ngolo samu na bayina ke mangaka yandi. 23 Ni yawu yina, beto mangaka na kudya samu na Nzambi, beto lombaka yandi na kukeba beto, mpe yandi kuwaka lusambulu ya beto.

24 Na manima, mu soolaka kumi na zole ya bamfumu ya banganga-Nzambi mpe Selevya na Asavya, mpe dyaka kumi ya bampangi ya bawu ba-Levite. 25 Mu tezaka na mantwala ya palata, wolo mpe bima nyonso ya ntalu yina ntinu, bipesi-malongi ya yandi, bilandi ya yandi, mpe bantu ya Isayeli ke zinganka na yinsi ya Babilone, pesaka samu na Yinzo ya Yave. 26 Mu pesaka bawu bakilo 20000 ya palata, bakilo 3000 ya bima ya ntalu mpe ya palata, bakilo 3000 ya wolo. 27 Bandonga makumi zole ya wolo, na ntalu ya 1000 ya mbongo ya Pelese, bandonga zole ya fyoti ya bolonze ya kitoko na ntalu ya mutindu mosi na bandonga ya wolo. 28 Mu zabisaka na bawu: «Mutindu ba byekaka beno samu na kisalu ya Yave, bima yayi mpe kele ya kubyeka. Palata na wolo yayi kele makabu yina bantu pesaka na luzolo ya bawu mosi samu na Yave, Nzambi ya bankooko ya beno. 29 Beno bumba yawu mbote tii ntangu beno ke teza mpe ke pesa yawu na mantwala ya bamfumu ya banganga-Nzambi, ba-Levite mpe bamfumu ya makanda ya bantu ya Isayeli kuna na Yelusameli na kati ya bivinga ya Yinzo ya Yave.»

30 Na yina, banganga-Nzambi mpe ba-Levite bakaka bima nyonso yina ba tezaka na mantwala ya bawu: palata, wolo, mpe bima nyonso ya ntalu samu na kunata yawu na Yelusalemi na Yinzo ya Yave, Nzambi ya beto.

Nzyetolo na Yelusalemi

31 Na kilumbu ya kumi na zole ya ngonda ya ntete, beto bikaka lweka ya maza yina ke lutilaka na kisika yina ba ke bokilaka Ava samu na kukwenda na Yelusalemi. Nzambi vwandaka keba beto na nzyetolo mpe yandi vwandaka tanina beto na mantwala ya bambeni mpe ya miyibi yina vwandaka na nzila ya beto. 32 Ntangu beto kumaka na Yelusalemi, beto pemaka bilumbu tatu. 33 Na kilumbu ya yiya, beto tezaka na kati ya Yinzo ya Yave, Nzambi ya beto, palata, wolo mpe bima nyonso ya ntalu. Beto pesaka yawu na nganga-Nzambi Melemote, mwana ya Uliya, yina vwandaka na Elazale mwana ya Pinase mpe ba-Levite Yozabade, mwana ya Yesuwa mpe Nowadya mwana ya Binuwi. 34 Ba tezaka mpe tangaka bima nyonso mpe ba sonikaka lutangu ya bakilo nyonso.

35 Bantu nyonso yina katukaka na bundongo mpe kwizaka na Yelusalemi, pesaka minkayulu na Nzambi ya Isayeli. Na nkumbu ya bantu nyonso ya Isayeli, bawu pesaka yandi kumi na zole (12) ya bangombe ya bakala, makumi yivwa na sambanu (96) ya mameme ya bakala mpe bana ya mameme makumi sambwadi na sambwadi (77) samu na munkayulu ya bibulu ya kuyoka mpe kumi na zole (12) ya bankombo ya bakala samu na mulemvo ya masumu. Bibulu nyonso yina, ba yokaka yawu mpe nyonso nyengaka samu na Yave. 36 Na manima, bawu pesaka mikanda ya mikanu ya ntinu na sika ya bimonikisi ya ntinu mpe na sika ya bamfumu ya bizunga yina kele na lweka ya wesete ya nzadi ya Efalate. Bantu yayi sadisaka bana ya Isayeli samu na kisalu ya Yinzo ya Nzambi.