Yewoswa 4

Matadi kumi na zole

Ntangu bantu nyonso ya Isayeli manisaka na kusabuka nzadi, Yave tubaka na Yewoswa: 2 «Beno soola babakala kumi na zole na kati ya beno, bakala mosi-mosi na konso kifumba. 3 Beno tumisa bawu na kubaka matadi kumi na zole na kati ya nzadi ya Yolodani, na kisika yina banganga-Nzambi tulaka makulu ya bawu ntangu bawu vwandaka ya kutelama na kati-kati ya nzadi. Ba ke nata matadi yango, mpe ba ke kwenda tula yawu na kisika yina beno ke lutisa mpimpa.» 4 Na yina, Yewoswa bokilaka babakala kumi na zole yina yandi soolaka na kati ya bantu ya Isayeli, bakala mosi-mosi na konso kifumba. 5 Yandi tubaka na bawu: «Beno luta na mantwala ya sanduku ya ngwisani ya Yave, Nzambi ya beno, beno kwenda na kati-kati ya nzadi ya Yolodani. Mpe kuna, konso muntu na beno ke baka ditadi mpe ke tula yawu na digembo, ditadi mosi-mosi samu na konso kifumba ya Isayeli. 6 Matadi yango ke vwanda kidimbu na kati-kati ya beno. Mpe na bantangu yina ke kwiza, ntangu bana ya beno ke yufula beno ti yinki matadi yayi zola kutuba, 7 beno ke zabisa bawu mutindu yayi: “Maza ya Yolodani bikaka na kuluta na ntangu ba vwandaka sabula sanduku ya ngwisani ya Yave. Ntangu sanduku vwandaka sabuka Yolodani, maza ya Yolodani zenganaka. Na yina, matadi yayi kele kidimbu samu na bana ya Isayeli, samu na kubambukaka moyo na dyambu yina bantangu nyonso.''»

8 Bana ya Isayeli salaka mutindu Yewoswa tumisaka bawu na kusala. Bawu bakaka matadi kumi na zole na kati-kati ya nzadi ya Yolodani mutindu Yave tubaka yawu na Yewoswa, ditadi mosi-mosi samu na konso kifumba ya Isayeli. Bawu nataka yawu mpe bawu tulaka yawu na kisika yina bawu lutisaka mpimpa.

9 Yewoswa tungisaka matadi kumi na zole na kati-kati ya nzadi ya Yolodani, na kisika yina banganga-nzambi tulaka makulu ya bawu, na ntangu yina bawu vwandaka ya kutelama na sanduku ya ngwisani. Matadi yango kele kuna tii bubu yayi.

10 Banganga-Nzambi yina vwandaka nata sanduku ya ngwisani vwandaka kaka ya kutelama na kati-kati ya nzadi ya Yolodani, tii na ntangu yina bantu manisaka na kulungisa mambu yina Yave tumisaka Yewoswa na kuzonza na bawu. Yewoswa salaka mambu nyonso mutindu Moyize tumisaka yandi. Bantu ya Isayeli sabukaka nzadi na mbangu nyonso. 11 Ntangu bantu nyonso manisaka na kusabuka, sanduku ya Yave na banganga-nzambi lutaka na mantwala ya bawu. 12 Bana ya Lubene, bana ya Ngade mpe ndambu ya kifumba ya Manase sabukaka nzadi na binwanunu ya bawu na mantwala ya bantu ya Isayeli, mutindu Moyize tubaka na bawu. 13 Bawu vwandaka keba ve makumi yiya ya mafunda (40 000), bayina lutaka na binwanunu ya bawu na mantwala ya Yave samu na kukwenda na mudimba ya Yeliko. 14 Na kilumbu yina, Yave salaka ti Yewoswa kuvwanda muntu ya nene na meso ya bantu nyonso ya Isayeli. Na luzingu ya yandi nyonso, ba vwandaka zitisa yandi mutindu ba vwandaka zitisa Moyize.

15 Yave tubaka na Yewoswa: 16 «Tumisa banganga-Nzambi yina ke na kunataka sanduku ya ngwisani na kubasika na nzadi ya Yolodani.» 17 Na yina, Yewoswa tumisaka banganga-Nzambi mutindu yayi: «Beno basika na nzadi.» 18 Na ntangu banganga-Nzambi yina vwandaka nata sanduku ya ngwisani ya Yave basikaka na nzadi ya Yolodani, kaka na ntangu yina bawu nangunaka makulu ya bawu samu na kutula yawu na kumu ya nzadi, maza ya Yolodani vutukaka na kisika ya yawu mpe yawu bandaka dyaka na kuluta mutindu yawu vwandaka sala ntete na bakumu nyonso. 19 Bantu ya Isayeli sabukaka nzadi ya Yolodani na kilumbu ya kumi ya ngonda ya ntete. Bawu kwendaka sala kivwandu ya bawu kuna na Ngilengale, na lweka ya esete ya mbanza Yeliko.

20 Matadi kumi na zole yina ba bakaka na nzadi ya Yolodani, Yewoswa tungaka yawu kuna na Ngilengale. 21 Mpe yandi tubaka na bana ya Isayeli mutindu yayi: «Na bantangu yina ke kwiza, ntangu bana ya beno ke yufula na batata ya bawu, yinki zola kutuba matadi yayi, 22 beno ke bangudila bawu dyambu yayi. Beno ke tuba: "Ni na ntoto ya kuyuma bantu ya Isayeli sabukaka nzadi yayi ya Yolodani." 23 Samu ti Yave Nzambi ya beno me yumisa nzadi ya Yolodani na mantwala ya beno, tii ntangu beno me manisa na kusabuka. Yandi me sala mutindu yandi salaka na mubu ya batwandu. Kuna mpe, yandi yumisaka mubu na mantwala ya beto tii ntangu beto manisaka na kuluta. 24 Ya ke samu ti bantu nyonso ya ntoto yayi kuzaba ti lulendo ya Yave kele ya nene, mpe samu ti konso ntangu, beno kuzitisa Yave, Nzambi ya beno.»