8
Yave tubaka dyaka na Moyize: «Zonza na Aaloni: ''Baka yinti ya nge, lambula na kutalisa yawu na bamaza ya nyonso ya Ngipiti: bamwila, bamaza ya fyoti-fyoti, na bizinga. Basisa bampangu samu ti bawu fuluka na yinsi nyonso ya Ngipiti.''»2 Aaloni lambulaka diboko ya yandi na zulu ya bamaza nyonso ya Ngipiti. Bampangu basikaka mpe yawu fulukaka na yinsi nyonso ya Ngipiti.3 Kasi bantu ya bampandu mpe salaka mutindu mosi na bampandu ya bawu. Bawu basisaka bampangu na yinsi ya Ngipiti.4 Ni na ntangu yina Falawo bokilaka Moyize na Aaloni, mpe yandi zabisaka bawu: «Beno sambila Yave yandi katula bampangu yayi na munu mpe na bantu ya munu. Na manima, mu ke bika bantu ya Isayeli, samu ti ba kwenda pesa Yave minkayulu.»5 Moyize tubaka na Falawo: «Mutindu nge zola, zabisa munu ntangu yina nge zola ti mu sambila Yave samu na nge, samu na bantu yina ke salaka na nge, mpe samu na bantu ya nge nyonso, samu ti yandi katula bampangu na sika ya nge mpe na bayinzo ya nge. Bampangu ke bikana kaka na kati ya nzadi ya Nile.»6 Falawo vutulaka: «Sala yawu mbasi». Moyize tubaka: Bika ti yawu salama mutindu nge me tuba, samu ti nge zaba ti ya kele ve na muntu yina me fwanana na Yave, Nzambi ya beto.7 Bampangu ke bika nge, bawu ke bika bayinzo ya nge. Bawu ke bika bantu yina ke salaka na nge. Bawu ke bika bantu ya nge nyonso. Bampangu ke bikana kaka na kati ya nzadi ya Nile.»8 Moyize na Aaloni basikaka na sika ya Falawo. Moyize zangulaka ndinga na kusambila Yave, samu na bampangu yina Yave fidisaka samu na Falawo.9 Yave salaka mutindu Moyize lombaka. Bampangu kufwaka na bayinzo, na bangaanda mpe na bilanga.10 Ba kutikisaka yawu na bikunku. Yinsi nyonso vwandaka basika nsunga ya yimbi.11 Kasi ntangu Falawo talaka ti mambu vwandaka me yilama, yandi kangaka dyaka ntima ya yandi. Yandi mangaka na kutumama na Moyize mpe na Aaloni. Yawu salamaka mutindu Yave tubaka.
Kitumbu ya tatu: bangungu
12 Yave tubaka na Moyize: «Zonza na Aaloni: ''Lambula yinti ya nge mpe bula fundu-fundu ya ntoto. Fundu-fundu ya ntoto ke kituka bangungu na yinsi nyonso ya Ngipiti''.» 13 Moyize na Aaloni tumamaka. Aaloni lambulaka diboko ya yandi mpe bulaka fundu-fundu ya ntoto na yinti ya yandi. Fundu-fundu ya ntoto kitukaka bangungu. Bangungu yango mwanganaka na zulu ya bantu mpe na zulu ya bibulu. Na yinsi nyonso ya Ngipiti, fundu-fundu nyonso ya ntoto kitukaka bangungu. 14 Bantu ya bampandu mekaka na kubasisa bangungu na bampandu ya bawu, kasi bawu lembanaka. Mutindu bangungu vwandaka na zulu ya bantu mpe na zulu ya bibulu, 15 bantu ya bampandu tubaka na Falawo: «Yayi kele lulendo ya Nzambi!» Kasi Falawo kangaka ntima ya yandi. Yandi tumamaka ve na Moyize na Aaloni. Yawu salamaka mutindu Yave tubaka.
Kitumbu ya yiya: banzinzi yina ke tatikaka
16 Yave tubaka na Moyize: «Mbasi na suka-suka, nge ke telama na kukwenda na sika ya Falawo, na ntangu yina yandi ke basika na kukwenda na nzadi. Nge ke zabisa yandi ti Yave ke na kutuba mutindu yayi: "Bika bantu ya munu samu ti bawu sadila munu. 17 Kana nge bika ve bantu ya munu kwenda, mu ke fidisa nge banzinzi yina ke tatikaka. Mu ke fidisa yawu na bantu ya nge, na bantu yina ke salaka na nge tii na bayinzo ya nge. Bayinzo ya bantu ya Ngipiti ke fuluka na banzinzi yina ke tatikaka, mpe ntoto ya yinsi nyonso ke fuluka na yawu. 18 Kasi na kilumbu yango, mu ke pesa ve kitumbu yina na kizunga ya Ngosene, kisika yina kele bantu ya munu. Ata nzinzi mosi yina ke tatikaka ke vwanda kuna, samu nge ndima ti munu Yave, mu kele na kati ya yinsi. 19 Mu ke kuula bantu ya munu na bampasi yina ke kumina bantu ya nge. Kidimbu yayi ke salama mbasi."» 20 Yave salaka mutindu yina. Mukangu mosi ya banzinzi yina ke tatikaka kwizaka kota na yinzo ya Falawo. Yawu kotaka na yinzo ya bantu yina ke salaka na Falawo mpe na kati ya yinsi nyonso ya Ngipiti. Yinsi nyonso bebaka mingi na banzinzi yina ke tatikaka. 21 Falawo bokilaka Moyize na Aaloni mpe yandi tubaka na bawu: «Beno kwenda pesa Nzambi ya beno minkayulu, kasi beno sala yawu na yinsi yayi.» 22 Moyize vutulaka: «Ve, ya kele mbote ve, samu ti minkayulu yina beto ke pesa na Yave, Nzambi ya beto, kele nganzi samu na bantu ya Ngipiti. Kana beto pesa na meso ya bantu ya Ngipiti minkayulu yina bawu ke talaka ti yawu kele nganzi, bawu ke bula ve beto matadi? 23 Beto ke tambula bilumbu tatu na yinsi ya kuyuma mpe beto ke pesa minkayulu na Yave, Nzambi ya beto na mutindu yina yandi ke zabisa beto yawu.» 24 Falawo tubaka: «Mu ke bika ti beno kwenda na yinsi ya kuyuma, samu na kupesa Yave Nzambi ya beno minkayulu. Kasi beno kwenda ntama mingi ve. Beno sambila samu na munu.» 25 Moyize vutulaka: «Kaka na ntangu yina mu ke basika na yinzo ya nge, mu ke sambila Yave. Mbasi banzinzi yina ke tatikaka ke bika nge. Bawu ke bika bantu yina ke salaka na nge na bantu ya nge. Kasi kuvuna dyaka ve! Kumanga dyaka ve ti bantu ya Isayeli kwenda pesa Yave minkayulu.» 26 Na yina, Moyize basikaka na sika ya Falawo mpe yandi sambilaka Yave. 27 Yave salaka mutindu Moyize lombaka. Banzinzi yina ke tatikaka bikaka Falawo. Bawu bikaka bantu yina ke salaka na yandi. Bawu bikaka bantu ya Falawo. Ata nzinzi mosi bikanaka. 28 Na mbala yayi mpe, Falawo kangaka dyaka ntima. Yandi mangaka na kubika ti bantu ya Isayeli kukwenda.