7
Kasi Yave tubaka na Moyize: «Tala, mu me kumisa nge Nzambi na mantwala ya Falawo, mpe mpangi ya nge Aaloni ke vwanda mumbikudi ya nge.2 Nge, nge ke zonza na mpangi ya nge Aaloni nyonso yina mu ke tumisa nge, mpe yandi ke zonza yawu na Falawo, samu ti yandi bika bana ya Isayeli kubasika na yinsi ya yandi.3 Kasi munu, mu ke kanga ntima ya Falawo. Mu ke lakisa bidimbu na bimangu ya munu ya mingi na yinsi ya Ngipiti.4 Kasi Falawo ke tumama ve na beno. Mu ke lambula diboko ya munu na yinsi ya Ngipiti, samu na kusemba Ngipiti mutindu me fwanana. Mpe mu ke basisa bantu ya munu na Ngipiti, bantu ya Isayeli na bankonga mutindu binwani.5 Na yina, bantu ya Ngipiti ke zaba ti mu kele Yave, ntangu mu ke lambula diboko ya munu na Ngipiti, mpe mu ke basisa bana ya Isayeli na kati ya bawu.»
6 Moyize na Aaloni salaka mbote-mbote mambu yina Yave tumisaka bawu. Ni mutindu yina bawu salaka. 7 Moyize vwandaka na bamvula makumi nana, mpe Aaloni bamvula makumi nana na tatu ntangu bawu kwendaka zonza na Falawo.
Falawo mangaka na kutumama na Moyize mpe na Aaloni
8 Yave tubaka na Moyize mpe na Aaloni: 9 « Kana Falawo tuba na beno: Beno sala kimangu!, nge Moyize, nge ke tuba na Aaloni: Baka yinti ya nge, losa yawu na mantwala ya Falawo. Yinti ke kituka nyoka.» 10 Na yina, Moyize na Aaloni kwendaka na sika ya Falawo mpe ba salaka mutindu Yave tumisaka bawu. Aaloni losaka yinti ya yandi na mantwala ya Falawo mpe na mantwala ya bantu yina ke salaka na Falawo. Yinti yango kitukaka nyoka. 11 Kasi Falawo mpe bokilaka bantu ya ndwenga na banganga. Bantu ya bampandu ya Ngipiti, bawu mpe, ba salaka mutindu mosi na bampandu ya bawu: 12 mosi na mosi na bawu losaka yinti ya yandi mpe bayinti ya bawu kitukaka banyoka. Kasi yinti ya Aaloni minaka bayinti ya bawu. 13 Kasi, Falawo kangaka ntima ya yandi. Yandi mangaka na tumamaka na Moyize mpe na Aaloni. Yawu salamaka mutindu Yave tubaka.
Kitumbu ya ntete: maza kitukaka menga
14 Yave tubaka na Moyize: «Falawo ke na kusala yintu ngolo mpe yandi ke na kumanga na kubika bantu ya munu na kukwenda. 15 Na suka-suka, nge ke kwenda na sika ya Falawo na ntangu yina yandi ke basikaka samu na kukwenda na nzadi ya Nile. Nge ke vingila yandi na kumu ya maza, na diboko ya nge, nge ke vwanda na yinti yina kitukaka nyoka. Ntangu yandi ke kuma, 16 nge ke tuba na yandi: ''Yave, Nzambi ya ba-Ebeleyo me fidisa munu na kuzabisa nge ti bika bantu ya munu, samu ti ba kwenda sadila munu na yinsi ya kuyuma." Kasi tii ntangu yayi, nge me manga na kuwa. 17 Yave ke na kutuba: ''Kidimbu yayi mu ke na kusala ke lakisa nge ti mu kele Yave''. Munu, mu ke bula maza ya nzadi ya Nile na yinti yayi ke na munu na maboko, mpe maza ke kituka menga. 18 Bambisi ya maza ya Nile ke kufwa. Nzadi ke banda na kubasika nsunga ya yimbi. Bantu ya Ngipiti ke lenda dyaka ve na kunwa maza ya Nile.» 19 Yave tubaka dyaka na Moyize: «Zonza na Aaloni: ''Baka yinti ya nge, lambula yawu na kutalisa yawu na bamaza nyonso ya Ngipiti: Bamwila, bamaza ya fyoti-fyoti, bizinga, bamaza nyonso ya Ngipiti.'' Maza nyonso ke kituka menga. Menga ke vwanda na yinsi nyonso ya Ngipiti, tii na kati ya bitekolo yina ba yidikaka na yinti to na matadi.» 20 Moyize na Aaloni salaka mutindu Yave tumisaka bawu. Yandi lambulaka yinti mpe bulaka maza ya nzadi ya Nile na mantwala ya Falawo mpe ya bantu yina ke salaka na Falawo. Maza nyonso ya nzadi ya Nile kitukaka menga. 21 Bambisi yina vwandaka na nzadi ya Nile kufwaka. Nzadi ya Nile kumaka na nsunga ya yimbi. Bantu ya Ngipiti vwandaka lenda dyaka ve na kunwa maza ya nzadi. Yinsi nyonso ya Ngipiti vwandaka menga na menga. 22 Kasi bantu ya bampandu ya Ngipiti mpe salaka mutindu mosi na bampandu ya bawu. Na yina, Falawo kangaka ntima. Yandi mangaka na kutumama na Moyize mpe na Aaloni. Yawu salamaka mutindu Yave tubaka. 23 Falawo pesaka bawu manima mpe yandi vutukaka na yinzo ya yandi, ata kutula ntima na mambu yina vwandaka me salama. 24 Bantu nyonso ya Ngipiti timunaka mabulu pene-pene ya nzadi ya Nile, samu na kuzwa maza ya kunwa, samu ti bawu vwandaka lenda dyaka ve na kunwa maza ya nzadi ya Nile.
25 Bilumbu nsambwadi ya muvimba lutaka katuka ntangu yina Yave pesaka kitumbu yina na nzadi ya Nile.
Kitumbu ya zole: bampangu
26 bYave tubaka na Moyize: «Kwenda na sika ya Falawo mpe tuba na yandi: "Yave me tuba mutindu yayi: Bika bantu ya munu kukwenda, samu ti bawu sadila munu. 27 Kana nge manga na kubika ba kwenda, munu, mu ke pesa yinsi ya nge nyonso kitumbu. Mu ke nokisa mvula ya bampangu. 28 Nzadi nyonso ya Nile ke fuluka na bampangu. Bampangu ke katuka na Nile na kwiza kota na yinzo ya nge. Bawu ke kota na kivinga yina nge ke lalaka. Bawu ke fuluka na zulu ya mfulu ya nge. Bawu ke kota mpe na bayinzo ya bantu yina ke salaka na nge. Bawu ke kota na bayinzo ya bantu ya nge. Bawu ke kota na kati ya bifuule tii na kati ya banzungu yina ba ke lambilaka. 29 Bampangu ke fuluka na zulu ya nge, na zulu ya bantu yina ke salaka na nge tii na zulu ya bantu ya nge nyonso."»