Isaake mpe Abimeleke
26
Nsatu mosi kotaka na yinsi. Nsatu yango ni yina ve vwandaka na ntangu ya Abalami. Isaake kwendaka na mbanza Ngelale na sika ya Abimeleke, ntinu ya ba-Filiseti. 2 Yave monikinaka Isaake mpe yandi tubaka: «Kukwenda ve na Ngipiti, kasi zinga na yinsi yina mu ke tuba na nge. 3 Zinga na bunzeza na yinsi yayi, mu ke vwanda na nge mpe mu ke sakumuna nge. Samu ti, ni na nge mpe na bana ya nge, mu ke pesa bayinsi nyonso yayi. Mu ke lungisa ndefi yina mu salaka na tata ya nge Abalami. 4 Mu ke sala ti bana ya nge kukuma mingi mutindu bambwetete ya mazulu. Mu ke pesa bana ya nge bayinsi nyonso yayi. Na bana ya nge, makanda nyonso ya ntoto ke kuzwa lusakumunu, 5 samu ti Abalami kuwaka mambu ya munu. Yandi landaka bantumunu ya munu, misiku ya munu, bansalulu ya misiku, mpe banzengolo ya munu.6 Isaake bandaka na kuzinga na mbanza Ngelale. 7 Ntangu bantu ya bwala yina vwandaka pesa yandi byuvu samu na kento ya yandi, Isaake vwandaka vutula: «Yandi kele kibusi ya munu.» Isaake vwandaka na boma ya kutuba ti yandi kele kento ya munu. Yandi vwandaka kima ti bantu ya yinsi yina kufwa yandi, samu ti Lebeka vwandaka kitoko mingi.
8 Isaake lutisaka bilumbu mingi kuna. Kilumbu mosi, Abimeleke, ntinu ya ba-Filiseti vwandaka tala na nela ya yandi, yandi talaka Isaake yina vwandaka sakana na kento ya yandi Lebeka. 9 Na yina, Abimeleke bokilaka Isaake mpe tubaka: «Ya tsyelika, kento yayi kele kento ya nge. Samu na yinki nge tubaka ti yandi kele kibusi ya nge?» Isaake vutulaka: «Mu vwandaka na boma ti ba kufwa munu samu na yandi.» 10 Abimeleke tubaka: «Yinki nge me sala beto? Nge zolaka natina beto mambu. Samu ti fyoti kaka bikanaka, mpe mosi na kati ya bantu ya yinsi zolaka vukisa mfulu na kento ya nge!»
11 Na yina, Abimeleke pesaka musiku yayi na bantu nyonso: «Muntu yina ke sala yimbi na bakala yayi to na kento ya yandi, yandi fwana kufwa.»
12 Isaake salaka bilanga na yinsi yina. Na mvula yina, yandi yonzikaka bambuma ya kulutila bambala nkama, samu ti Yave sakumunaka yandi. 13 Yandi kumaka mvwama. Bimvwama ya yandi vwandaka tatamana na kubwelama, mpe yandi kumaka mvwama ya nene. 14 Isaake vwandaka na bangombe, mameme, bankombo, mpe bisadi mingi.
Isaake salaka ngwisani na Abimeleke
Ba-Filiseti vwandaka tala Isaake musoki. 15 Bawu zikaka mabulu nyonso ya maza yina bisadi ya Abalami timunaka na ntangu yandi vwandaka ntete moyo. Ba-Filiseti fulusaka mabulu nyonso na ntoto. 16 Abimeleke tubaka na Isaake: «Katuka na yinsi ya beto. Samu ti nge me kuma muntu ya ngolo kulutila beto.»
17 Isaake katukaka kuna. Yandi kwendaka telimisa bayinzo ya yandi ya lele na mudimba ya Ngelale mpe yandi zingaka kuna. 18 Isaake timunaka dyaka mabulu ya maza yina tata ya yandi Abalami bikaka, samu ti ba-Filiseti zikaka yawu na manima ya lufwa ya Abalami. Isaake pesaka dyaka mabulu yango bankumbu yina tata ya yandi pesaka ntete.
19 Bisadi ya Isaake kwendaka timuna dibulu na mudimba, mpe kuna bawu talaka dibulu ya maza ya mbote. 20 Mivungi ya mbanza Ngelale swanaka na mivungi ya Isaake. Mivungi ya Ngelale vwandaka tuba: «Maza yayi kele ya beto!» Na yina, Isaake pesaka dibulu yango nkumbu Esekea, samu ti ba swanaka samu na yawu. 21 Bisadi ya Isaake kwendaka timuna dibulu ya nkaka ya maza. Kasi ba swanisaka dyaka bawu, samu na dibulu yina. Na yina, Isaake pesaka yawu nkumbu Sitenab. 22 Isaake katukaka kuna, mpe yandi tumisaka ti ba timuna dibulu ya nkaka ya maza. Na mbala yayi, ba swanisaka bawu ve. Na yina, Isaake pesaka dibulu yina nkumbu Lewobotec. Samu ti Isaake tubaka: Ntangu yayi, Yave me pesa beto kisika ya kusaadila. Na yina, beto ke butana na ntoto yayi».
23 Na manima, Isaake katukaka kuna mpe yandi kwendaka na bwala Beele-Seba. 24 Na mpimpa yina, Yave monikinaka Isaake mpe yandi tubaka: «Mu kele Nzambi ya tata ya nge Abalami. Kuvwanda na boma ve samu ti, mu kele na nge. Samu na kisyelo ya munu Abalami, mu ke sakumuna nge, mpe mu ke sala ti bana ya nge kubutana mingi.» 25 Na yina, Isaake yidikaka kiyokolo ya minkayulu kuna. Mpe yandi sambilaka Yave na nkumbu ya yandi. Kuna, yandi yidikaka yinzo ya yandi ya lele. Mpe bisadi ya yandi timunaka dibulu ya maza na kisika yina.
26 Abimeleke na ndiku ya yandi Awuzate, mpe Pikole mfumu ya binwani ya Abimeleke, bawu kwendaka na Ngelale samu na kwenda tala Isaake. 27 Isaake tubaka na bawu: «Samu na yinki beno me kwiza tala munu? Beno ke yinaka munu mpe beno bingisaka munu na yinsi ya beno.» 28 Bawu vutulaka: «Beto me tala ti Yave kele na nge. Ni yawu yina, beto me tala ti yawu kele mbote ti nge na beto kudya ndefi samu na kuvutula kizunu mpe beto sala ngwisani. 29 Kudya ndefi ti nge ke sala ve beto yimbi, samu ti beto mpe beto salaka nge yimbi ve. Beto sadilaka nge kaka mambu ya mbote. Beto bikaka nge kwenda na kizunu. Ntangu yayi, nge kele muntu yina Yave me sakumuna.» 30 Isaake salaka mukembo samu na bawu, bawu kudyaka mpe kunwaka. 31 Na suka-suka, bawu vumbukaka. Bawu kudyaka bandefi muntu na muntu na sika ya mpangi ya yandi. Na manima, Isaake pesaka bawu nzila samu ti bawu kwenda, mpe bawu katukaka kuna na kizunu nyonso.
32 Kaka na kilumbu yina, bisadi ya Isaake kwizaka pesa yandi bansangu ya dibulu ya maza yina bawu vwandaka timuna. Bawu tubaka na yandi: «Beto me kuzwa maza.» 33 Isaake pesaka dibulu yina nkumbu Sibeyad. Ni yawu yina, tii na kilumbu ya bubu yayi, nkumbu ya mbanza yina kele Beele-Sebae
Makwela ya Esawu