Lufwa ya Abalami mpe bankumbu ya bana ya yandi ya nkaka
25
Abalami kwelaka dyaka kento ya nkaka, nkumbu ya yandi Ketula. 2 Ketula butaka na Abalami bana yayi: Zimelane, Yokesane, Medane, Madyane, Yisebake mpe Suwa. 3 Yokesane butaka Saba na Dedane. Bana ya Dedane vwandaka ba-Asuli, ba-Letusi mpe ba-Lewumi. 4 Bana ya Madyane vwandaka: Efa, Efele, Enoke, Abida mpe Eleda. Bawu nyonso yina vwandaka bana ya Ketula.5 Abalami pesaka mvwilu ya yandi nyonso na Isaake. 6 Abalami pesaka mpe bima na bana yina yandi butaka na makangu ya yandi. Na ntangu yandi vwandaka ntete moyo, yandi fidisaka bana yina ntama na mwana ya yandi Isaake, na yinsi ya ntama kuna na esete. 7 Abalami zingaka bamvula nkama na makumi sambwadi na tanu, 8 mpe yandi kufwaka. Abalayami lutisaka bamvula mingi ya kyese na buboba ya yandi, na manima yandi kufwaka. Yandi kwendaka vukana na bankooko ya yandi yina kufwaka. 9 Bana ya yandi Isaake mpe Isemayele kundaka yandi na kati ya ntadi ya Makepela. Ntadi yango vwandaka na bilanga ya Efelone, mwana ya Sowale, mu-Ete, na kisika yina ke talasanaka na Mamele. 10 Ba kundaka Abalami na kisika yina yandi kundaka kento ya yandi Saala, na bilanga yina Abalami sumbaka na ba-Ete. 11 Na manima ya lufwa ya Abalami, Nzambi sakumunaka mwana ya yandi Isaake. Isaake vwandaka zinga pene-pene ya dibulu ya maza ya Layayi-Loyia.
12 Yayi ni bana ya Isemayele, mwana yina Abalami butaka na Angale, mu-Ngipiti, kisadi ya Saala. 13 Yayi ni bankumbu ya bana ya Isemayele, mutindu bawu butukilaka: Nebayote mwana ya ntete ya Isemayele, Kedale, Adebeyele, Mibesame, 14 Misema, Duma, Masa, 15 Adade, Tema, Yetule, Nafise mpe Kedema. 16 Yina ni bana ya Isemayele. Konso muntu na bawu vwandaka mfumu ya dikanda. Bawu pesaka bankumbu ya bawu na babwala mpe na bisika yina bawu tungaka bayinzo ya bawu ya lele. 17 Isemayele zingaka bamvula nkama na makumi tatu na sambwadi mpe mwela ya yandi katukaka. Yandi kufwaka mpe kwendaka vukana na bankooko ya yandi. 18 Bana ya Isemayele vwandaka zinga na kizunga yina kele na kati-kati ya mbanza Avila na mbanza Sule. Sule kele pene-pene na Ngipiti na nzila yina ke kwendaka na Asule. Bawu vwandaka zinga ve kisika mosi na bampangi ya bawu, bana ya nkaka ya Abalami.
YAKOBI 25-36
Esawu mpe Yakobi
19 Yayi ni bana ya Isaake, mwana ya Abalami.
Abalami butaka Isaake. 20 Ntangu Isaake lungisaka bamvula makumi yiya, yandi kwelaka Lebeka kibusi ya Labane, mwana ya Betwele, mu-Alame ya Mesopotami. 21 Isaake sambilaka Yave samu na kento ya yandi yina vwandaka kisita. Yave kuwaka lusambulu ya Isaake mpe kento ya yandi Lebeka kuzwaka kivumu. 22 Bana vwandaka tutana na kati ya kivumu ya Lebeka. Mpe Lebeka tubaka: «Samu na yinki dyambu ya mutindu yayi me kumina munu?» Yandi kwendaka yufula luzolo ya Yave. 23 Mpe Yave tubaka na yandi:
«Bayinsi zole ke na kati ya kivumu ya nge.
Makanda zole ke basika na kivumu ya nge.
Mosi na kati ya bawu ke lutila ngolo na mpangi
mpe kuluntu ke sadila leki.»
24 Ntangu ya kubuta lungaka, mpe ba talaka ti Lebeka vwandaka na mapasa na kivumu ya yandi. 25 Mwana ya ntete yina basikaka vwandaka mbwaki. Nzutu ya yandi vwandaka ya kufuluka na mika mutindu mpusu ya kibulu. Ba pesaka yandi nkumbu Esawub. 26 Na manima, mpangi ya yandi mpe basikaka. Yandi vwandaka ya kusimba kinkoso ya Esawu. Ba pesaka yandi nkumbu Yakobic. Isaake vwandaka na bamvula makumi nsambwadi na ntangu Lebeka butaka bana yina.
27 Bana kulaka. Esawu vwandaka kikubudi ya nene, yandi vwandaka na kifu ya kukwendaka na mfinda. Yakobi vwandaka muntu ya kuzuna, yandi vwandaka vwanda mingi na yinzo. 28 Isaake zolaka mingi Esawu, samu ti yandi vwandaka zola kudya mbisi ya musitu. Kasi Lebeka vwandaka zola mingi Yakobi.
29 Kilumbu mosi, Yakobi vwandaka lamba supu. Kaka na ntangu yango, Esawu katukaka na bilanga, mpe yandi vwandaka me lemba. 30 Esawu tubaka na Yakobi: «Mu me lemba mingi. Pesa munu supu yayi ya mbwaki mu kudya. Ni yawu yina, ba pesaka Esawu nkumbu Edomed.» 31 Yakobi vutulaka: «Tekisa ntete munu bukuluntu ya nge.» 32 Esawu tubaka: «Mu ke na kufwa na nsatu, yinki mu ke sala na bukuluntu?» 33 Na yina, Yakobi tubaka: «Kudya ndefi malu-malu yayi.» Esawu kudyaka ndefi, yandi tekisaka bukuluntu ya yandi na Yakobi. 34 Na yina, Yakobi pesaka Esawu dimpa na supu ya madeso. Esawu kudyaka mpe kunwaka. Na manima, yandi telamaka mpe yandi kwendaka. Esawu talaka ti bukuluntu ya yandi vwandaka kima ya mpamba.