خاص چيلان را ڪم 27

پولُوس رو قيدِي ٿي رُوم شھر ۾ جاڻ آن اُٿ پرڀُو يسُوع ري باري ۾ سنڀۯاڻ

فيستُس رو پولُوس نا رُوم ري راجا وٽ ميلھڻ

‏1 جڏھين اي فيصلو ٿيو تہ اَسِين ٻيڙي ۾ چڙھي اِٽلِي مُلڪ سمھان جائُون، تڏھين اُوئان پولُوس آن ٻِيجان ڪينهڪ جيليان نا رُومِي فوج ري ھيڪي نِنڍي آفِيسر ري حَوالي ڪريا۔ اُوئي رو نان يُوليُس ھتو، آن او فوج ري اُوئي ٽولي رو ھتو جِڪي نا ’راجا رو ٽولو‘ ڪھين تا۔ ‏2 اَسِين اَدرمُتيُم شھر ري ھيڪي ٻيڙي ۾ چڙھي رَوانا ٿيا، جڪو آسيہ صُوبي ري ڪپ واۯان شھران سمھون جاڻ سارُون تَيار ھتو۔ اَسان ڀيۯو ھيڪ اَرِسترخُس نان رو ماڙھُو ھتو، جڪو مڪِدُنيہ صُوبي ري ٿِسلُنِيڪي شھر رو ھتو۔

‏3 ٻِيجي ڏِينھ اَسِين صيدا شھر ۾ پُگا۔ اُٿ فوج ري آفِيسر يُوليُس پولُوس تي اي مھربانِي ڪري اُوئي نا موڪل ڏِنِي تہ، ’تُون ڀلين آپري دوستان وٽ جا، آن جِڪِين تِنا کپي، او ڀلين تِنا ڏيئين۔‘

‏4 اُوئي سين پَڇي اَسِين اُوھا ٻيڙي ۾ چڙھي رَوانا ٿيا۔ پڻ ھَوا اَسان سمھِين پي لگِي، اِيئي ڪري ڪُپرُس ٻيٽ رو پاسو جھلي اَسِين اُوئي ري اوٺ ۾ ھليا۔ ‏5 پَڇي اَسِين ڪِلِڪيہ آن پمفُوليہ صُوبان ري ڪپ وٽ اَگھا جائي لُوڪيہ صُوبي ري مُورہ شھر ۾ پُگا۔ ‏6 اُٿ فوج ري آفِيسر ھيڪ ٻِيجو ٻيڙو جوئي لڀو، جڪو اِسڪندريہ شھر رو ھتو آن اِٽلِي سمھون جاڻ واۯو ھتو۔ تو اُوئي اَسان نا اُوئي ٻيڙي ۾ چاڙھيا۔ ‏7 ٻيڙو آھستي آھستي پي ھليو، آن مس مس ڪينهڪ ڏِينھان سين پَڇي اَسِين ڪنِدُس شھر نا نيڙا آئي پُگا۔ اُوھا اَسِين گھڻِي ھَوا ري ڪري اَگھا وڌي ڪو سگھيا۔ اِيئي ڪري ڪريتي ٻيٽ ري سلموني نان رِي جگھا نا نيڙا پُجي ٻيٽ ري اوٺ ۾ ھلڻ لگا۔ ‏8 گھڻِي ڏُکيائِي سين اُوئي رو پاسو ڏي اُوئي ھند پُگا جِڪي نا ’ٻيڙو ڀِيچڻ رِي سُٺِي جگھا‘ ڪھين تا، جڪو لسيہ نان ري شھر نا نيڙو اَھي۔

‏9 اَسان نا گھڻا ڏِينھ لگا تا، آن ھي ٻيڙي ۾ اَگھو جاڻ گھڻو خطرو ھتو، ڪِي تہ ورت رو خاص ڏِينھ مٽي گيو تو۔ اِيئي ڪري پولُوس ٻيڙي ري سجان ماڙھُوئان نا اي ڏس ڏِنو تہ، ‏10 ’اي ڀايان، جي آپِين اَگھا ھلسان، تو مانھجِي سمجھ ۾ گھڻو خطرو ٿيسي۔ نہ رُگو واپار ري سامانَ آن ٻيڙي رو نُقصانَ ٿيسي، پڻ آپان مان پڻ ماڙھُو مري جاسين۔‘ ‏11 پڻ فوج ري آفِيسر پولُوس رين واتين ڪو مڃين، آن ٻيڙي نا ھڪلڻ واۯي رين آن ٻيڙي ري مالِڪ رين اَگھو جاڻ رين واتين مڃين۔ ‏12 اُٿ ايھڙِي سُٺِي جگھا ڪو ھتِي جِٿ سِيئاۯو گُذاران۔ اِيئي ڪري گھڻان ماڙھُوئان صلاح ڏِنِي تہ، ’اِيھا ھليا ھلان۔ جي ٿي سگھي، تو فِينِڪس شھر ۾ جائي اُٿ سِيئاۯو گُذاران۔‘ فِينِڪس شھر ۾ ڪريتي ٻيٽ تي ٻيڙو ڀِيچاۯڻ رِي جگھا اَھي، جِڪي رِي گھٽِي ڪاڇيل آنٿوڻِي ڪُنڊ آن اُتر آنٿوڻِي ڪُنڊ سمھِين اَھي۔

سمنڊ ۾ وڏو طُوفانَ

‏13 جڏھين ڪاڇيلي پاسي رِي ھَوا آھستي آھستي لگڻ شرُوع ٿئِي، تڏھين اُوئان سمجھو تہ اَسانجو اَگھو جاڻ رو مقصد ھي پُورو ٿيسي۔ اِيئي ڪري او ٻيڙي نا روڪڻ واۯا ڪُنڊا کڻي ٻيڙي نا ھڪلي ڪريتي ٻيٽ ري ڪپ نا نيڙا ٿي ھليا۔

‏14 پڻ ٿوڙھِي دير سين پَڇي ٻيٽ ري پاسي سين اُتر آن اُونگوڻي رو طُوفانَ گھڻي زور سين آيو۔ ‏15 طُوفانَ ٻيڙي نا ايھڙو زور سين لگو پي جو ٻيڙو ھَوا سمھون ھلي ڪو سگھيو۔ اِيئي ڪري ٻيڙي نا ھڪلڻ ڇڏيو، آن اَسِين ھَوا ۾ ڇِڪجتا گيا پي۔ ‏16 ڌِڪاجتي ڌِڪاجتي ٻيڙو ڪودہ نان ري ھيڪي نِنڍي ٻيٽ ري اوٺ ۾ آئي گيو۔ تڏھين جڪو نِنڍِي ٻيڙِي وڏي ٻيڙي پُٺيا ٻڌل ھتِي، اُوئي نا اَسان گھڻِي ڪوشِش سين قابُو ڪري جھلِي۔ ‏17 پَڇي جڏھين اُوئي ٻيڙِي نا وڏي ٻيڙي ۾ چاڙھي رھيا، تڏھين ٻيڙي واۯان ڊِگھان رنڍُوئان سين وڏي ٻيڙي نا ٻڌي ڏاڍو ڪريو۔ اُوئان نا اي ٻِيھ پڻ ھتو متان ڌِڪاجي ٻيڙو آفرِيڪا مُلڪ ري ڪپ وٽ پاڻِي ھيٺا ڪيھِي دڙي سين نہ لگي۔ اِيئي ڪري ٻيڙي تي ٻڌل ھلاڻ واۯو ڪپڙو اُتاريو، آن پَڇي اَسِين اِين رو اِين ھَوا ۾ ڇِڪاجتا گيا پي۔

‏18 طُوفانَ اِتو گھڻو ھليو پي، جو ٻِيجي ڏِينھ اُوئان ٻيڙي سين واپار رو سامانَ ڦگاڻ شرُوع ڪريو۔ ‏19 ٽِيجي ڏِينھ وۯي اُوئان آپ ٻيڙي رو سامانَ پڻ سمنڊ ۾ ڦگائي ڇڏيو۔ ‏20 گھڻان ڏِينھان تائين اَسان نا ڏِينھ آن تارا ڏيکڻ ۾ ڪو آيا، آن طُوفانَ گھڻو لگتو رھيو۔ نيٺ اَسانجي بچڻ رو آسرو پڻ ختم ٿي گيو۔

‏21 گھڻان ڏِينھان سين ماڙھُوئان ڪِينھ ڪو کاڌو تو۔ نيٺ پولُوس اُوئان ري وِچ ۾ ڀِيچي ڪھيو تہ، ’ڀايان، جي اَوھِين مانھجِي وات مڃي ڪريتي ٻيٽ سين نہ ھليا ھونت، تو اي نُقصانَ آن تڪلِيف آپان نا نہ ٿيا ھونت۔ ‏22 ھي ھُون اَوھان نا ڪھان تو تہ اَوھِين ھِمٿ رکو، ڪِي تہ اَوھِين سجا ئي بچي جاسو۔ رُگو ٻيڙو ختم ٿي جاسي۔ ‏23 اي مِنا خبر اَھي، ڪِي تہ اِيشوَر جِڪي رو ھُون ماڙھُو اَھان، آن جِڪي رِي ھُون شيوا ڪران تو، اُوئي رو فرِشتو رات مين وٽ آئي ڀِيٽو، ‏24 آن ڪھيانتي تہ، ’پولُوس، تُون ٻِيھاج مَ۔ تُون ضرُور رُوم ري راجا وٽ جائي ڀِيچِيس۔ آن جو، اِيشوَر تين تي اي مھربانِي پڻ ڪرِي اَھي، جو جڪو ماڙھُو تين ڀيۯا ٻيڙي ۾ اَھين، او سجا ئي بچي جاسين۔‘ ‏25 اِيئي ڪري، ڀايان، ھِمٿ ڪرو، ڪِي تہ مانھجو اِيشوَر تي پڪو ڀروسو اَھي تہ فرِشتي جين مِنا ڪھيو، اِين رو اِين ٿيسي۔ ‏26 پڻ ٻيڙو ڪيھِي ٻيٽ نا ضرُور لگسي۔‘

‏27 اَسان نا رُوم نان ري سمنڊ ۾ طُوفانَ سين ڌِڪاجتي ٻہ ھفتا ٿي گيا، تو آڌِي رات ري ٽاڻي ٻيڙي واۯان نا شڪ ٿيو تہ اَسِين زمِينَ ري ڪيھِي ڪپ نا نيڙا ٿيتا پيا جائُون۔ ‏28 تڏھين اُوئان ڊِگھي رنڍُو سين پاڻِي رِي ماپ لئِي، تو ھيڪ سو وِيس فُٽ ٿيو۔ پَڇي ٿوڙھو اَگھا جائي ٻِيجي گھوئِي ماپ ليانتي، تو نَوي فُٽ ٿيو۔ ‏29 اِيئي ڪري اُوئان نا ٻِيھ ٿيو متان ڪيھِي پٿر واۯي ڪپ نا نہ لگان۔ تو اُوئان ٻيڙي نا روڪڻ سارُون ٻيڙي ري پُٺلي پاسي سين رنڍُوئان سين ٻڌل چار وڏا ڪُنڊا سمنڊ ۾ ڦگايا، آن دُعا منگِي تہ ڏِينھ ڇيڪو اُگي۔ ‏30 جڪو ٻيڙي واۯا ھتا، اُوئان ٻيڙي سين ڀجڻ چاھيو تي۔ اِيئي ڪري اُوئان نِنڍِي ٻيڙِي نا سمنڊ ۾ اُتاري ڇڏِي، آن اي باھنو ڪريو تہ ٻيڙي ري اَگلي پاسي سين وڏا ڪُنڊا اُتاران۔ ‏31 اِيئي تي پولُوس فوج ري آفِيسر آن فوجيان نا ڪھيو تہ، ’اي ماڙھُو جي ٻيڙي ۾ نہ رھسين، تو اَوھِين بچي ڪِنھِي سگھو۔‘ ‏32 اِيئي ڪري فوجيان جِڪان رنڍُوئان سين نِنڍِي ٻيڙِي نا اُتارِي تِي، اُوئان نا وڍي ڇڏيا، آن ٻيڙِي نا جاڻ ڏِنِي۔

‏33 جڏھين صُبح ٿيڻ واۯو ھتو، تو پولُوس سجان نا ڪينهڪ کاڻ رو عرض ڪري ڪھيو تہ، ’اج ٻہ ھفتا ٿيا اَھين، اَوھِين طُوفانَ بند ٿيڻ رِي واٽ پيا جوئو، آن اِتِي تائين اَوھان ڪِينھ ڪو کاڌو اَھي۔ ‏34 اِيئي ڪري ھُون اَوھان نا عرض تو ڪران تہ مھربانِي ڪري ڪينهڪ کائو، ڪِي تہ اِيئي سين اَوھان نا بچڻ رِي طاقت جُڙسي۔ اَوھان مان ڪيھِي رو وار ئي ونگو ڪِنھِي ٿي۔‘

‏35 جڏھين پولُوس اِين ڪھي رھيو، تڏھين روٽِي لي سجان سمھون اُوئي سارُون اِيشوَر را ٿورا مڃيا۔ پَڇي روٽِي جھوري کاڻ لگو۔ ‏36 اِيئي تي ٻِيجان سجان نا پڻ حونصلو جُڙيل، آن اُوئان پڻ ڪينهڪ کاڌو۔ ‏37 اَسِين سجا ئي ٻيڙي ۾ ٻہ سو ڇاھتر ماڙھُو ھتا۔

‏38 جڏھين او کائي ڍاپيا، تو اُوئان ٻيڙي رو ڀار ھلڪو ڪرڻ سارُون سجِي ڪڻڪ سمنڊ ۾ ڦگائي ڇڏِي۔

ٻيڙي رو جھُري جاڻ

‏39 جڏھين صُبح ٿيو، تڏھين ٻيڙي واۯان نا ڪپ اوۯکڻ ۾ ڪو آيو۔ پڻ اُوئان ڏِٺو تہ اُٿ ھيڪ وڏو گھيڙ اَھي، جِڪي رو ڪپ سرِيکو اَھي۔ اِيئي ڪري اُوئان فيصلو ڪريو تہ ٻيڙي نا اُوئي گھيڙ تي ھڪلي جاڻ رِي ڪوشِش ڪران۔ ‏40 پَڇي وڏا ڪُنڊان را رنڍُو ڇوڙھي اُوئان نا سمنڊ ۾ ڇڏيانتي، آن اُوئي ئيج ٽاڻي ٻيڙي نا ايڻ اوڻ واۯڻ واۯا ٻہ لڪڙ پڻ ڇوڙھي ڇڏيا۔ پَڇي ٻيڙي رو اَگلو ڪپڙو ھَوا نا سمھون ٻڌي ٻيڙي نا گھيڙ سمھون ھڪليو۔ ‏41 پڻ ٻيڙو اَگتي ھلتو سمنڊ ھيٺ دڙي نا آئي لگو، تو اُوئي رو اَگلو پاسو ڦاسجي گيو آن ھلي ڪو سگھيو، آن اُوئي رو پُٺلو پاسو ڇولين لگڻ ري ڪري جھُرڻ لگو۔

‏42 جڪو فوجِي ھتا اُوئان آپت ۾ صلاح ڪرِي تہ جيليان نا ماري ڇڏان، متان اُوئان مان ڪوئِي تري ڀجي نہ جائي۔ ‏43 پڻ فوج ري آفِيسر پولُوس نا بچاڻ چاھيو تي، اِيئي ڪري اُوئي فوجيان نا آپري صلاح ڪرڻ رِي اِنڪار ڪرِي، آن حُڪم ڏِنو تہ جڪو ماڙھُو تري سگھتا ھوئين، او اَگ ۾ سمنڊ ۾ ٽِپو ڏي ڪپ تي پُجي جائي، ‏44 پڻ ٻِيجا پٽيان تي آن ٻيڙي ري ترتيان شئيان تي چڙھي تري جائي۔

ايھڙي نمُوني سجا ئي ماڙھُو سجا سارا زمِينَ تي پُجي بچي گيا۔