خاص چيلان را ڪم 25

پولُوس رو رُوم ري راجا وٽ آپرو فيصلو ڪراڻ سارُون دانھ ڏيڻ

‏1 جڏھين راج ڪرڻ واۯي فيستُس نا اِيئي صُوبي ۾ آئي نا ٽِن ڏِينھ ٿيا، تڏھين او قيصريہ شھر سين يرُوشلم شھر ۾ گيو۔ ‏2 اُٿ وڏا پُوجاريان آن يھُودِي قوم ري اَگواڻان اُوئي وٽ پولُوس ري خِلاف واتين ڪرين، آن اُوئي وٽا اِين عرض ڪريانتي تہ، ‏3 ’اَوھِين مھربانِي ڪري پولُوس نا اِٿ يرُوشلم شھر ۾ تيڙائو۔‘ اُوئان اي خراب رِٿ ٺاھي تِي تہ پولُوس نا ڪِٿي واٽ ۾ ماري ڇڏان۔ ‏4 پڻ فيستُس ڪھيو تہ، ’پولُوس قيصريہ ۾ قيدِي اَھي، آن ھُون آپ ٿوڙھان ڏِينھان سين پَڇي اُٿ جاڻ واۯو اَھان۔ ‏5 اِيئي ڪري اَوھان ۾ جڪو اَگواڻ اَھين، او مين ڀيۯا ھلين، آن جي اُوئي ماڙھُو ڪوئِي ڏوھ ڪريو ھوسي، تو ڀلين اُوئي تي ڏوھ ھڻين۔‘

‏6 فيستُس اُٿ مُۯگا اَٺ ڏس ڏِينھ رھيو، آن پَڇي قيصريہ ۾ گيو ھليو۔ ٻِيجي ڏِينھ فيصلي رِي گادِي تي ٻيسي اُوئي حُڪم ڏِنو تہ پولُوس نا ڪورٽ ۾ لي آئو۔ ‏7 جڏھين پولُوس آيو، تو جڪو يھُودِي يرُوشلم سين آيا تا، او اُوئي ري چوڌارِي ڦِري آيا، آن اُوئي تي تمام وڏا ڏوھ ڏيڻ لگا۔ پڻ اُوئان رِي ڪوئِي ثابتِي ڏي ڪو سگھيا۔ ‏8 تڏھين پولُوس آپري باري ۾ ڪھيو تہ، ’مين يھُوديان ري لِکيل حُڪمان ري، وڏي مندر ري، يا رُوم ري راجا ري خِلاف ڪوئِي پڻ ڏوھ ڪو ڪريو اَھي۔‘

‏9 توئي پڻ فيستُس يھُوديان نا خُوش ڪرڻ سارُون پولُوس نا پُڇيو تہ، ’تُون يرُوشلم ھلِيس يا نہ؟ جين اُٿ مانھجي رُوبرُو اِيئان واتيان رو فيصلو ٿي۔‘ ‏10 پڻ پولُوس ڪھيو تہ، ’ھُون ھِيڻا رُوم ري راجا رِي ڪورٽ ۾ ڀِيٽو اَھان، آن مانھجو فيصلو اِٿ ئي ٿيڻ کپي۔ اَوھان نا پُورِي خبر اَھي تہ مين يھُوديان رو ڪوئِي ڏوھ ڪو ڪريو اَھي۔ ‏11 جي ھُون ڏوھارِي اَھان، آن مين موت رِي سزا کاڻ جيھڙو ڪم ڪريو اَھي، تو ھُون مرڻ سارُون تَيار اَھان۔ پڻ جي اي ڏوھ جڪو مين تي ھڻين پيا، سجا ئي ڪُوڙا اَھين، تو ڪيھِي پڻ ماڙھُو رو اي حق ڪو اَھي جو مِنا اِيئان ري حَوالي ڪري۔ اِيئي ڪري ھُون رُوم ري راجا نا دانھ تو ڏيئان۔‘

‏12 تڏھين فيستُس آپري صلاح ڏيڻ واۯان سين صلاح ڪري ڪھيو تہ، ’ٺِيڪ اَھي۔ تين رُوم ري راجا وٽ دانھ ڏِنِي اَھي۔ ھي تُون رُوم ري راجا وٽ جائِيس۔‘

فيستُس رو پولُوس نا نِنڍي راجا اَگرِپا سين مِلاڻ

‏13 ڪينهڪ ڏِينھان سين پَڇي اَگرِپا راجا آن اُوئي رِي ٻيھن بِرنِيڪي قيصريہ شھر ۾ فيستُس سين مِلڻ آيا۔ ‏14 جڏھين او اُٿ ڪينهڪ ڏِينھ رھيا، تڏھين فيستُس پولُوس ري ڪيس ري باري ۾ راجا نا سنڀۯايو، آن ڪھيانتي تہ، ’ھيڪ ماڙھُو اَھي جِڪي نا فيلِڪس قيد ۾ ڇڏي گيو ھليو اَھي۔ ‏15 جڏھين ھُون يرُوشلم ۾ ھتو، تو اِيئي ماڙھُو ري خِلاف وڏا پُوجاريان آن يھُودِي قوم ري اَگواڻان مين سين واتين ڪرين تين، آن مِنٿ ڪرِي تہ ھُون اِيئي نا سزا ڏيڻ رو فيصلو ڪران۔‘ ‏16 پڻ مين اُوئان نا ڪھيو تہ، ’رُوم ري قانُونَ موجب جِتِي تائين ڪيھِي ماڙھُو نا ڏوھ ڏيڻ واۯان ري رُوبرُو آپري باري ۾ سنڀۯاڻ رو موقعو نہ جُڙي، اُتِي تائين اُوئي نا سزا ڏيڻِي ڪو اَھي۔ ‏17 اِيئي ڪري جڏھين او اِٿ آئي ڀيۯا ٿيا، تو مين ڪوئِي دير ڪو ڪرِي، آن ٻِيجي ڏِينھ مين فيصلي رِي گادِي تي ٻيسي حُڪم ڏِنو تہ اُوئي ماڙھُو نا تيڙي آئين۔ ‏18 جڏھين اُوئي ري خِلاف ماڙھُو اُٺي ڀِيٽا، تڏھين اُوئان ايھڙو ڪوئِي خراب ڏوھ ڪو ڏِنو جِڪان رو مِنا شڪ ھتو۔ ‏19 پڻ اُوئان رُگو آپري ڌرم ري ڪينهڪ واتيان ري ڪري آن ھيڪي پرڀُو يسُوع نان ري ماڙھُو ري ڪري اُوئي تي ڏوھ ڏِنو، جڪو مري گيو تو۔ پڻ پولُوس ڪھي تو تہ او جِيتو اَھي۔ ‏20 مِنا اي وات سمجھڻ ۾ ڪو آئِي تہ ڪِين اِيئي وات رِي صحِيح جانچ ڪران۔ اِيئي ڪري مين اُوئي نا پُڇيو تہ، ’تُون يرُوشلم شھر جاڻ ۾ خُوش اَھين يا نہ؟ جين اُٿ اِيئان واتيان رو فيصلو ٿي۔‘ ‏21 پڻ پولُوس اي دانھ ڏِنِي تہ مانھجو فيصلو رُوم ري راجا وٽ ٿي، آن اُتِي دير تائين ھُون ڀلين قيد ۾ رھان۔ تڏھين مين حُڪم ڏِنو تہ جِتِي تائين ھُون اِيئي نا رُوم ري راجا وٽ نہ ميلھان، اُتِي تائين اِيئي نا قيد ۾ رکو۔‘

‏22 تڏھين اَگرِپا راجا فيستُس نا ڪھيو تہ، ’مانھجِي مرضِي اَھي تہ ھُون آپ اُوئي رين واتين سنڀۯان۔‘

تو فيستُس ڪھيو تہ، ’ڀلين، اَوھِين سَواري اُوئي رين واتين سنڀۯيا۔‘

‏23 ٻِيجي ڏِينھ اَگرِپا آن بِرنِيڪي گھڻو مانَ آن شانَ سين آئي پُگا۔ پَڇي او فوج ري وڏا آفِيسران آن شھر ري خاص ماڙھُوئان ڀيۯا درٻار ۾ آيا۔ تڏھين فيستُس ري حُڪم تي فوجِي پولُوس نا اُٿ لي آيا۔ ‏24 پَڇي فيستُس ڪھڻ لگو تہ، ’اَگرِپا راجا آن اِٿ آيَل سجان ماڙھُوئان، اَوھانجي رُوبرُو اي ماڙھُو اَھي، جِڪي ري باري ۾ سجان يھُوديان يرُوشلم ۾ آن اِٿ قيصريہ ۾ پڻ مِنا مِنٿ ڪرِي، آن زور سين ڪھيو تہ، ’اِيئي ماڙھُو نا جِيتو رھڻ نہ کپي۔‘ ‏25 پڻ مين خبر سنڀۯِي اَھي تہ اِيئي ايھڙو ڪوئِي ڏوھ ڪو ڪريو اَھي، جِڪي ري ڪري اِيئي نا موت رِي سزا ڏيئان۔ پڻ اِيئي آپ دانھ ڏِنِي تہ مانھجو فيصلو رُوم ري راجا وٽ ٿي۔ اِيئي ڪري مين اِيئي نا ميلھڻ رو فيصلو ڪريو اَھي۔ ‏26 پڻ اِيئي ري باري ۾ مين وٽ ڪوئِي پڪِي وات ڪو اَھي جو رُوم ري راجا نا لِکي ميلھان۔ اِيئي ڪري مين اِيئي نا اَوھان سجان سمھون آن خاص ڪري، اَگرِپا راجا، اَوھان سمھون لي آيو اَھان، جين اَوھِين اِيئي ڪيس رِي جانچ ڪرو۔ پَڇي ھُون ڪينهڪ لکي سگھِيس۔ ‏27 اي وات مِنا سُٺِي ڪو تِي لگي تہ ھُون ھيڪي قيدِي نا ميلھان، پڻ جڪو ڏوھ اُوئي تي ھڻيَل اَھين، او صاف نہ لِکان۔‘