ڪُرِنٿُس شھر ۾ پولُوس رو گھڻان ڏِينھان تائين سِکاڻ
18
1 اُوئي سين پَڇي پولُوس اَٿيني شھر نا ڇڏي ڪُرِنٿُس شھر ۾ آيو۔ 2 اُٿ اُوئي نا اَڪوِلہ نان رو ھيڪ يھُودِي ڀيۯو ٿيو، جِڪي رو جِنم پُنطُس صُوبي رو ھتو۔ اُوئي رِي ڏوسِي رو نان پرِسڪِلہ ھتو، آن او ٻئِي اِٽلِي مُلڪ سين تازا آيَل ھتا، ڪِي تہ راجا ڪلوديُس حُڪم ڏِنو تو تہ سجا ئي يھُودِي اُوئي مُلڪ ري رُوم شھر سين لڏي جائي۔پولُوس اُوئان ري گھري گيو، 3 آن اُوئان وٽ رھي ڀيۯو ڪم ڪرڻ لگو، ڪِي تہ اُوئان رو ڌنڌو پولُوس ري جين تنبُو ٺاھڻ رو ھتو۔ 4 ھر پَوِيتر ڏِينھ تي پولُوس يھُوديان ري مندر ۾ جائي سِکاتو، آن ڪوشِش ڪرتو تہ يھُودِي آن يُونانِي قوم واۯا پڻ اي واتين مڃين۔
5 جڏھين سِيلاس آن تِيمُٿِيُس مڪِدُنيہ صُوبي سين آيا، تو پولُوس سجو وقت اِيشوَر رو وچن سنڀۯاڻ لگو۔ او يھُوديان نا اِيئي وات رِي ثابتِي ڏي ڪھتو تہ، ’پرڀُو يسُوع اِيشوَر رو چُنڊيَل مسِيح اَھي۔‘ 6 پَڇي جڏھين يھُودِي پولُوس ري خِلاف ٿي گيا، آن گھٽ وڌ ٻولڻ لگا، تڏھين اُوئان سين واسطو ٽوڙڻ سارُون پولُوس آپرا گڀا اُوئان سمھان ڇنڊي ڪھيو تہ، ’ھي جي اَوھِين اِيشوَر رِي سزا سين نہ بچو، تو اَوھانجو آپرو ڏوھ اَھي۔ مانھجو ڏوھ ڪو اَھي۔ اج سين پَڇي ھُون ڌاريان قومان وٽ جائِيس۔‘ 7 تڏھين پولُوس يھُوديان ري مندر نا ڇڏي ھيڪي ماڙھُو ري گھري سِکاڻ گيو۔ اُوئي رو نان طِطُس يُوستُس ھتو، آن او اِيشوَر نا مڃتو۔ اُوئي رو گھر اُوئي مندر ري پاسي ۾ ھتو۔
8 پڻ جڪو اُوئي يھُوديان ري مندر رو اَگواڻ ڪرِسپُس ھتو، اُوئي آن اُوئي رِي سجِي آڪاھ پرڀُو يسُوع تي وِشواس رکيو۔ ٻِيجا پڻ ڪُرِنٿُس شھر را گھڻا ماڙھُو پولُوس رين واتين سنڀۯي وِشواسِي ٿيتا، آن پَوِيتر سِنانَ ليتا۔
9 ھيڪ رات پرڀُو پولُوس نا درشن ڏي ڪھيو تہ، ’ٻِيھاج مَ۔ سنڀۯاتو رھي، آن ماٺ ڪري متان ٻيسي۔ 10 ڪِي تہ ھُون تين ڀيۯو اَھان، آن ڪوئِي پڻ ماڙھُو حملو ڪري تِنا نُقصانَ ڪِنھِي ڏي۔ اِيئي شھر ۾ مانھجا گھڻا ماڙھُو اَھين۔‘ 11 اِيئي ڪري پولُوس ڏيڍ سال اُٿ رھيو، آن ماڙھُوئان نا اِيشوَر رو وچن سِکاتو رھيو۔
12 جڏھين يُونانَ صُوبي تي گليو نان ري ماڙھُو رو راج ھتو، تڏھين يھُوديان آپت ۾ ڀيۯا ٿي پولُوس تي حملو ڪريو، آن اُوئي نا جھلي ڪورٽ ۾ تيڙي گيا۔ 13 اُوئان ڪھيو تہ، ’اي ماڙھُو اِيشوَر رِي ايھڙي نمُوني ڀگتِي ڪرڻ ماڙھُوئان نا سِکائي تو، جڪو قانُونَ ري خِلاف اَھي۔‘
14 جڏھين پولُوس ٻولڻ واۯو ھتو، تڏھين صُوبي تي راج ڪرڻ واۯي يھُوديان نا ڪھيو تہ، ’اي يھُودِي قوم ران ماڙھُوئان، جي اِيئي ڪيھِي قانُونَ ري خِلاف ڪم يا وڏِي بُڇڙائِي ڪرِي ھونت، تو مين اَوھانجِي وات صبر سين سنڀۯِي ھونت۔ 15 پڻ اي واتين رُگو اَکران، نامان آن اَوھانجي ڌرم ري حُڪمان ري باري ۾ اَھين۔ اِيئي ڪري اَوھِين جاڻو آن اَوھانجو ڪم جاڻي۔ ھُون اِيئان واتيان رو فيصلو ڪِنھِي ڪران۔‘ 16 اِين ڪھي اُوئي يھُوديان نا ڪورٽ سين ٻاھر ڪڍيا۔
17 پَڇي سجان ماڙھُوئان يھُوديان ري مندر ري اَگواڻ نا جھلايو، جِڪي رو نان سوسٿِنيس ھتو، آن اُوئي نا ڪورٽ سمھون گھڻو ڪُٽڻ لگا۔ پڻ راج ڪرڻ واۯي گلِيئي اِيئي وات تي ڪوئِي ڌيانَ ڪو ڏِنو۔
پولُوس رو آپري اَنطاڪيہ شھر ۾ پَڇو جاڻ، آن پَڇي اُوئي رو ٽِيجو چڪر شرُوع ڪرڻ
18 اُوئي سين پَڇي پولُوس اُٿ ڪُرِنٿُس شھر ۾ گھڻا ڏِينھ رھيو۔ پَڇي وِشواسِي ڀايان وٽا موڪلايو، آن ڪِنخريہ شھر ۾ آئي اُٿ آپرا مٿوَاۯ ڪترايا، ڪِي تہ اُوئي اِيشوَر ري نان تي اِڇنا ڪرِي تِي۔ پَڇي پرِسڪِلہ نان رِي ڏوسِي آن اُوئي ري ڌڻِي اَڪوِلہ ڀيۯو اُٿ ٻيڙي ۾ چڙھي سُوريہ صُوبي سمھون رَوانو ٿيو۔ 19 پَڇي اُوھا اِفسُس شھر ۾ پُگا۔
اُٿ پولُوس اُوئان نا ڇڏيا، آن آپ يھُوديان ري مندر ۾ جائي اُوئان نا سِکايا۔ 20 يھُوديان پولُوس نا مِنٿ ڪري ڪھيو تہ ڪينهڪ وڌِيڪ ڏِينھ اَسان وٽ ٽِڪو۔ پڻ اُوئي ڪو مڃيو، 21 آن اُوئان وٽا موڪلائي ڪھيو تہ، ’جي اِيشوَر رِي مرضِي ھوئي، تو ھُون وۯي اَوھان وٽ آئِيس۔‘ پَڇي او اِفسُس شھر سين ٻيڙي ۾ چڙھي رَوانو ٿي گيو۔
22 سمنڊ پار ڪري پولُوس قيصريہ شھر ۾ پُگو۔ او يرُوشلم شھر ۾ جائي وِشواسِي منڊلِي ري ماڙھُوئان سين مِليو، پَڇي آپري اَنطاڪيہ شھر ۾ پَڇو آيو۔
23 پولُوس ڪينهڪ ڏِينھ اُٿ رھيو۔ پَڇي اُوھا رَوانو ٿيو، آن گلتيہ آن فرُوگيہ ري عِلائِقان مان ٿيتو شھر ئو شھر سجان وِشواسيان نا ھِمٿ ڏيتو گيو۔
پولُوس رو پرڀُو يسُوع ري باري ۾ سنڀۯاڻ سارُون ٽِيجو چڪر
اَپُلوس نان ري ماڙھُو رو پرڀُو يسُوع ري باري ۾ سِکاڻ
24 اُوئان ڏِينھان ۾ اَپُلوس نان ري يھُودِي قوم رو ھيڪ ماڙھُو اِفسُس شھر ۾ آيو۔ اُوئي رو جِنم اِسڪندريہ شھر رو ھتو۔ او ٻولڻ ۾ ھُوشيار ھتو، آن شاستر رين گھڻين واتين سمجھتو۔ 25 اُوئي نا پرڀُو يسُوع رِي ڏيکاۯيَل واٽ ري باري ۾ سِکايو تو، آن او پرڀُو يسُوع رين واتين صحِيح نمُوني گھڻِي خُوشِي آن شونق سين سنڀۯاتو آن سِکاتو۔ پڻ اُوئي نا رُگو يُوحنا ري ڏِنل پَوِيتر سِنانَ ري باري ۾ خبر ھتِي۔
26 او يھُوديان ري مندر ۾ بِنا ٻِيھ ٻولڻ لگو۔ پَڇي جڏھين پرِسڪِلہ آن اُوئي ري ڌڻِي اَڪوِلہ اُوئي ري واتين سنڀۯين، تڏھين اُوئي نا آپري گھري تيڙي گيا، آن اِيشوَر رِي واٽ ري باري ۾ وڌِيڪ صحِيح نمُوني سمجھايو۔
27 پَڇي اَپُلوس رو يُونانَ صُوبي سمھون جاڻ رو خيال ٿيو۔ تو وِشواسِي ڀايان اُوئي نا ھِمٿ ڏِنِي، آن اُٿلان وِشواسيان نا اُوئي ڀيۯو خط ڏي ميلھيو تہ اَوھِين اَپُلوس سين سُٺي نمُوني مِليا۔ تو اَپُلوس اُٿ گيو، آن اُٿلا وِشواسِي جِڪان اِيشوَر رِي ڪِرپا سين پرڀُو يسُوع تي وِشواس رکيو تو، او اُوئان رو وڏو مددگار ٿيو۔ 28 او سجان ماڙھُوئان ري رُوبرُو شاستر سين اِين ثابت ڪري ڏيکاۯتو تہ پرڀُو يسُوع او رو او اِيشوَر رو چُنڊيَل مسِيح اَھي۔ ايھڙي نمُوني او گھڻي جوش سين يھُوديان رين واتين ڪُوڙين ڪرتو۔