ٿِسلُنِيڪي شھر ۾ فساد
17
1 تو پولُوس آن سِيلاس اَمفِپُلِس آن اَپُلونيہ شھران مان ٿي ٿِسلُنِيڪي شھر ۾ آيا، جِٿ يھُوديان رو ھيڪ مندر ھتو۔ 2 پولُوس اَگي ري جين اُوئي مندر ۾ گيو، آن ٽِنھان ھفتان تائين ھر پَوِيتر ڏِينھ تي شاستر مان سِکاتو۔ 3 او شاستر رين واتين کولي ثابتِي ڏيتو تہ اِين ٿيڻ ضرُورِي ھتو تہ اِيشوَر رو چُنڊيَل مسِيح ڏُک سھي مري جائي، آن مُئلان مان جِيتو ٿي اُٺي۔ ٻِيجو اِين ڪھتو تہ پرڀُو يسُوع جِڪي رِي ھُون اَوھان نا خبر ڏيئان پيو، اي او رو او اِيشوَر رو چُنڊيَل مسِيح اَھي۔‘4 يھُوديان مان ڪينهڪ ماڙھُوئان اُوئي رين واتين مڃين، آن او پولُوس آن سِيلاس ڀيۯا ٿي گيا۔ ساگِي نمُوني تمام گھڻا ڌارِين قوم واۯا جڪو اِيشوَر نا مڃتا، آن گھڻين وڏا گھران رين ڏوسين پڻ اُوئان ڀيۯين ٿي گئين۔
5 پڻ يھُودِي پولُوس آن سِيلاس تي ڪڙھي گيا، آن جڪو بيڪار ماڙھُو شھر ۾ ڀِيٽل ھتا، اُوئان مان ڪينهڪ خراب ماڙھُو ڀيۯا ڪري ھيڪ وڏو ٽولو ٺاھيانتي، آن سجي شھر ۾ فساد ڪراڻ لگا۔ اُوئان ياسونَ نان ري ماڙھُو ري گھر تي حملو ڪريو، جين اُوھا پولُوس آن سِيلاس نا ٻاھر ڪڍي ماڙھُوئان وٽ لي آئين۔ 6 جڏھين او اُٿ ڪو جُڙيا، تڏھين ياسونَ آن ڪينهڪ وِشواسِي ڀايان نا جھلي شھر ري اَگواڻان وٽ لي آيا، آن زور سين ڪھيانتي تہ، ’جِڪان ماڙھُوئان سجِي دُنيا ۾ گوڙ ڪريو اَھي، اي اِٿ پڻ آيا اَھين، 7 آن اُوئان نا ياسونَ آپري گھري ٽِڪايا اَھين۔ او سجا ئي رُوم ري راجا ري حُڪمان ري خِلاف ھلين تا، آن اِين ڪھين تا تہ ٻِيجو ڪوئِي راجا اَھي جِڪي رو نان پرڀُو يسُوع اَھي۔‘
8 جڏھين سجان ماڙھُوئان آن شھر ري اَگواڻان اي واتين سنڀۯين، تڏھين او ڏاڍا پريشانَ ٿيا۔ 9 پَڇي اَگواڻان ياسونَ آن ٻِيجان وِشواسيان تي ڏنڊ ناکي پئِيسا لي ڇڏيا پرھا۔
بيريہ شھر ۾ گھڻان يھُوديان رو وِشواسِي ٿيڻ
10 اُوئي ئيج رات وِشواسِي ڀايان پولُوس آن سِيلاس نا جلدِي بيريہ شھر سمھان رَوانا ڪري ڇڏيا۔
جڏھين او اُٿ پُگا، تو يھُوديان ري مندر ۾ گيا۔ 11 اُٿلا يھُودِي ٿِسلُنِيڪي شھر ري يھُوديان سين گھڻا سُٺا ھتا۔ اُوئان گھڻي شونق سين پولُوس آن سِيلاس رين واتين سنڀۯين، آن روز شاستر پڙھي جوتا تہ اي واتين شاستر ري جين اَھين يا نہ؟ 12 اِيئي ڪري اُوئان مان گھڻان ماڙھُوئان وِشواس رکيو، آن ڌاريان قومان مان پڻ وڏِي عِزت واۯين ڏوسين آن مرد وِشواسِي ٿي گيا۔
13 پڻ جڏھين ٿِسلُنِيڪي ري يھُوديان نا خبر پئِي تہ پولُوس بيريہ ۾ پڻ اِيشوَر رو وچن سنڀۯائي پيو، تڏھين اُوئان اُٿ پڻ آئي ماڙھُوئان نا جوش ڏيرائي اُوئان ۾ گوڙ گھتيو۔ 14 پَڇي وِشواسِي ڀايان جلدِي پولُوس نا سمنڊ ري ڪپ سمھون رَوانو ڪريو۔ پڻ سِيلاس آن تِيمُٿِيُس بيريہ شھر ۾ رھيا۔ 15 جڪو ماڙھُو پولُوس نا ڇڏڻ گيا تا، او پولُوس ڀيۯا اَٿيني شھر تائين گيا۔ پَڇي او پولُوس رو اي نياپو لي پَڇا بيريہ شھر سمھان رَوانا ٿيا تہ، ’سِيلاس آن تِيمُٿِيُس جِتو جلدِي ٿي سگھي مين وٽ آئين۔‘
اَٿيني شھر ۾ پولُوس رو اَگواڻان نا وچن سنڀۯاڻ
16 جڏھين پولُوس اَٿيني شھر ۾ سِيلاس آن تِيمُٿِيُس رِي واٽ پي جوئِي، تڏھين اُوئي نا ڏاڍو ڏُک ٿيو، ڪِي تہ اُوئي ڏِٺو تہ سجي شھر ۾ گھڻين مُورتين اَھين۔ 17 اِيئي ڪري او يھُوديان ري مندر ۾ جائي يھُوديان نا آن ڌارِين قوم واۯان نا جڪو اِيشوَر نا مڃتا، اُوئان سجان نا سِکاتو۔ آن شھر ري وِچ ۾ جڪو پڪو ميدانَ ھتو، اُٿ پڻ جائي اُونھِين آيَل ماڙھُوئان نا روز سِکاتو۔
18 اُٿ ڪينهڪ عِلم واۯا ماڙھُو پڻ ھتا، جڪو اِپڪُورِي ٽولي آن ستوئِيڪِي ٽولي را ھتا۔ او پولُوس رو مُقابلو ڪرڻ لگا۔ ڪينهڪ ڪھتا پيا تہ، ’اي جٽ ماڙھُو ڪيھڙين اَجائين واتين پيو ڪري؟‘ آن ٻِيجا ڪھتا پيا تہ، ’اي ڌارِين قوم ري ڏيوَان رِي خبر ڏيڻ واۯو ڏيکجي تو۔‘ او اِين ڪھتا پيا ڪِي تہ پولُوس پرڀُو يسُوع ري باري ۾ آن جِيتو ٿي اُٺڻ ري باري ۾ خُوشخبرِي ڏيتو پيو۔
19 پَڇي او پولُوس نا تيڙي شھر ري پنچائِت وٽ گيا، جِڪي نا اَريوپگُس ڪھين تا۔ اُٿ اُوئي وٽا اِين پُڇيانتي تہ، ’اَسان نا سنڀۯائو تہ اي نَوين واتين جڪو اَوھِين سِکائو پيا، اي ڪيھڙين واتين اَھين؟ 20 ڪِي تہ اَوھِين ڪينهڪ ايھڙين واتين پيا ڪرو جو اَسان نا عجِيب پئين لگين۔ اِيئي ڪري اَسِين خبر ليڻ چاھُون تا تہ اِيئان واتيان رو مطلب ڪِي اَھي؟‘
21 تو اَٿينِي شھر را سجا ئي ماڙھُو آن ٻِيجا پرديسِي ماڙھُو جڪو اُٿ رھين تا، اُوئان نا ٻِيجي ڪيھِي وات رو شونق ڪو اَھي، پڻ او رُگو نَوين نَوين واتين سنڀۯين آن سنڀۯائين تا۔
22 تڏھين پولُوس شھر رِي پنچائِت سمھون اُٺي ڀِيٽو، آن ڪھڻ لگو تہ، ’اي اَٿينِي شھر ران ماڙھُوئان، ھُون ڏيکان پيو تہ اَوھِين گھڻا ڌرمِي اَھو۔ 23 ڪِي تہ مين ھلتي ھلتي اَوھانجي ڏيوَان ري مندران نا جويو پي، تو ھيڪ قُربانِي رِي جگھا ڏيکڻ ۾ آئِي۔ اُٿ پٿر تي لِکيل ھتو تہ، ’اَڻ اوۯکيَل ڏيو سارُون۔‘ اِيئي ڪري او جِڪي رِي اَوھِين بِنا اوۯکاڻ پُوجا ڪرو تا، اُوئي ري باري ۾ ھُون اَوھان نا خبر پيو ڏيئان۔ 24 اِيشوَر او اَھي جِڪي اي دُنيا آن اِيئي ۾ جڪو شئين اَھين او ٺاھين اَھين، آن آڪاس آن ڌرتِي رو مالِڪ اَھي۔ اِيئي ڪري او ماڙھُوئان ري ٺاھيَل مندران ۾ ڪو تو رھي۔ 25 ٻِيجو تہ اُوئي نا ڪيھِي پڻ ايھڙِي شئي رِي ضرُورت ڪو اَھي جڪو ماڙھُو اُوئي نا ڏي اُوئي رِي شيوا ڪرين، ڪِي تہ او آپ سجان ماڙھُوئان نا جِيوَن، ساس آن سڀ ڪُجھ ڏي تو۔ 26 اُوئي ھيڪي ماڙھُو مان سجين قومان پيدا ڪرين، جين او سجِي دُنيا ۾ رھين۔ اُوئان ري رھڻ سارُون اُوئي خاص ٽاڻا آن عِلائِقان را دنگ اَگي سين فيصلو ڪري رکيا اَھين۔ 27 اِيشوَر اِيئي سارُون اِين ڪريو اَھي تہ ماڙھُو اُوئي نا جوئين، آن ٿي سگھي ڦانڦا ڏي اُوئي نا ھٿ ڪرين۔ پڻ سچ پچ اِيشوَر آپان مان ڪيھِي سين اَۯگو ڪو اَھي، 28 ڪِي تہ، ’اُوئي رِي طاقت سين آپِين جِيتا اَھان، آن ھلان تا آن رھان تا۔‘ ساگِي نمُوني اَوھانجي ڪينهڪ شاعِران ڪھيو اَھي تہ، ’آپِين پڻ اِيشوَر رو اولاد اَھان۔‘
29 آپِين تہ اِيشوَر رو اولاد اَھان، اِيئي ڪري آپان نا اِين نہ سمجھڻ کپي تہ اِيشوَر ڪيھِي سونَ، چاندِي يا پٿر رِي مُورتِي ري جين اَھي، جِڪي نا ماڙھُو آپري ھُنر آن سوچ سين ٺاھين تا۔ 30 اَگلي زماني ۾ جڏھين ماڙھُوئان نا اِيشوَر رِي خبر ڪو ھتِي، تڏھين اِيشوَر اُوئان نا اُوئان ري پاپان رِي سزا ڪو ڏِنِي۔ پڻ ھي اِيشوَر پُورِي دُنيا ري سجان ماڙھُوئان نا اِين سنڀۯائي پيو تہ، ’اَوھِين آپري پاپان سين توڀان ڪرو‘، 31 ڪِي تہ اُوئي ھيڪ ڏِينھ ٻڌي رکيو اَھي جِڪي تي او سجِي دُنيا ري ماڙھُوئان رو نيا آپري چُنڊيَل ماڙھُو ري ھٿا اِنصاف سين ڪراسي۔ آن اُوئي ماڙھُو نا اِيشوَر مُئلان مان جِيتو ڪري اُٺاۯي سجان ماڙھُوئان نا اِيئي وات رِي ثابتِي ڏِنِي اَھي۔‘
32 جڏھين ماڙھُوئان مُئلان مان جِيتو ٿي اُٺڻ ري باري ۾ سنڀۯيو، تو ڪينهڪ پولُوس تي ٺٺولين ڪرڻ لگا۔ پڻ ڪينهڪ ماڙھُوئان ڪھيو تہ، ’اِيئي وات ري باري ۾ اَسِين وۯي اَوھان وٽا سنڀۯسان۔‘ 33 پَڇي پولُوس پنچائِت سين گيو ھليو۔
34 پڻ ڪينهڪ ماڙھُوئان اُوئي ڀيۯا ٿي وِشواس رکيو۔ اُوئان مان شھر ري پنچائِت رو ھيڪ ميمبر ھتو، جِڪي رو نان ديُونسيُس ھتو۔ دمرِس نان رِي ھيڪ ڏوسِي پڻ ھتِي، آن ٻِيجا اُوئان ڀيۯا ماڙھُو پڻ ھتا۔