پرڀُو يسُوع را ٻارھي چيلا
10
1 پرڀُو يسُوع آپري ٻارھان چيلان نا سڏ ڪري منگايا آن اُوئان نا اِختيارِي ڏنانتي تہ ڀُوتان نا ڪڍين آن ھر قِسم رِي بيمارِي سين ماڙھُوئان نا سجا سارا ڪرين۔ 2 اُوئان ٻارھان خاص چيلان را نان اي اَھين:- پيھلڪو شمعون، جِڪي نا پطرس پڻ ڪھين تا، آن اُوئي رو ڀائِي اندرياس، يعقُوب آن اُوئي رو ڀائِي يوحنا جڪو زبدِي را ڏِڪرا اَھين۔ 3 فلپس آن برتلمئي، توما آن متِي ناڪو ليڻ واۯو، حلفِي رو ڏِڪرو يعقُوب آن ٿدياس، 4 شمعون وطن دوست، آن يھُوداہ اسڪريوتِي جِڪي پَڇي دوکو ڪري پرڀُو يسُوع نا جھلايو۔پرڀُو يسُوع رو آپري ٻارھان چيلان نا پرچار ڪرڻ سارُون ميلھڻ
5 پرڀُو يسُوع اِيئان ٻارھان چيلان نا سمجھائي روانا ڪريا تہ، ”ڪيھِي پڻ ڌارين قوم ري علائقي سمھان يا سامريان ري شھران ۾ نہ جايا، 6 پڻ اسرائِيل قوم ري ماڙھُوئان وٽ جايا، جڪو رُليل رِڍان ري جين اَھين۔ 7 جِٿ پڻ جائو، تو اِين سنڀۯايا تہ اِيشوَر رو راج نيڙو آئي گيو اَھي۔ 8 بِيماران نا سجا سارا ڪريا، آن مُئلان نا جيتا ڪريا، ڪوڙھيان نا سجا سارا ڪريا، آن ماڙھُوئان سين ڀُوت ڪڍيا، مين اَوھان نا اِيئي ڪم ڪرڻ رو اختيار مفت ڏنو اَھي، اِيئي ري ڪري اَوھين پڻ مفت ماڙھُوئان نا سجا سارا ڪريا۔ 9 کونجي ۾ آپ ڀيۯا سون، چاندِي يا پئيسا نہ کڻيا، 10 مُسافرِي ۾ آپ ڀيۯي نڪوئي جھوۯي يا پھراڻ يا جُتِي يا گيڏي نہ کڻيا۔ مزُور رو حق اَھي تہ اُوئي ڪم ري بدلجي روٽِي جُڙي۔ 11 جڏھين اَوھين ڪيھِي شھر يا گان ۾ جائو تہ پُڇا ڪريا، تہ اِٿلو پٽيل ڪوڻ اَھي۔ پَڇي اُوئي ري گھري ترسيا آن اُوھا ئي روانا ٿيا۔ 12 جڏھين ڪيھِي گھر ۾ جائو تڏھين نمسڪار ڪريا۔ 13 جي اُوئي گھر را ڀاتِي اَوھان نا عزت ڏيسين تو اَوھانجِي آسِيس اُوئان نا جُڙسي۔ پڻ جي او اَوھان نا عزت ڪنھِي ڏين تو اَوھانجِي آسِيس اُوئان نا ڪنھِي جُڙي۔ 14 آن جي ڪوئِي اَوھان نا آتي اوَڪار نہ ڏي آن اَوھانجِي وات نہ سنڀۯي تو جڏھين اُوئي شھر يا گان سين روانا ٿيو تڏھين آپري پگان رِي ڌُوڙ اُٿ ڇنڊي ڇڏيا۔ 15 ھُون اَوھان نا سچ ڪھان تو، تہ نيا ري ڏِينھ اِيشوَر اُٿلان ماڙھُوئان رِي حالت صُدوم آن عمورہ سين وڌِيڪ ڏُکِي ڪرسي۔
آڻ واۯِي مُصِيبت
16 جوئو ھُون اَوھان نا جاڻي رِڍان ري جين بگھڙان ۾ تو ميلھان۔ اِيئي ري ڪري اَوھين ناگ ري جين ھوشيار آن ڪبوتران ري جين ڀوۯا ٿيا۔ 17 پڻ ماڙھُوئان سين ھوشيار ٿيا، ڪِي تہ او اَوھان نا جھلائي ڪورٽان ۾ لي جاسين آن اَوھان نا آپري مندران ۾ ڦٽڪا ھڻسين۔ 18 اَوھان نا مانھجي ڪري حاڪمان آن بادشاھان وٽ لي جاسين آن اَوھين اُوئان ڌاريان قومان نا خوشخبرِي سنڀۯاسو۔ 19 پڻ جڏھين اَوھان نا جھلائي لي جائي تڏھين اي گڻتِي نہ ڪريا تہ اَوھان نا ڪيھڙِي وۯتِي ڏيڻي اَھي۔ جِڪين اَوھان نا ڪھڻو ھوسي او اِيشوَر ري وسيلي اُوئي ٽاڻي اَوھان نا سنڀۯايو جاسي، 20 ڪِي تہ جڪين اَوھين ٻولسو او اَوھانجي آپري طرف سين ڪِنھِي ھوئي پڻ اَوھانجو آڪاسِي پتا اَوھانجي وسيلي ٻولسي۔ 21 ڀائِي ڀائِي نا ماراڻ سارُون جھلايو جاسي، ٻاپ آپري ڏِڪري نا ماراڻ سارُون جھلايو جاسي آن ڏِڪرا آپري ما ٻاپ سين ڦِري جاسين آن اُوئان نا ماراڻ سارُون گرفتار ڪراسين۔ 22 مانھجي ڪري سجائي اَوھان سين نفرت ڪرسين، پڻ جڪو آخرِي گھڙي تائين مانھجي واتيان تي ھلسي اُوئي نا ڇوٽڪارو جُڙسي۔ 23 جڏھين ماڙھُو اَوھان نا ڪيھِي شھر ۾ ستائين، تو ٻيجي شھر سمھان ھليا جايا۔ ھُون اَوھان نا سچ تو ڪھان تہ اَوھين سجي اسرائيل ۾ آپرو ڪم اڃان ختم ئي ڪِنھِي ڪرو تہ اُوئي سين اگ ۾ منش پُتر آئي جاسي۔
24 ڪوئِي پڻ چيلو آپري گرُو سين مٿي ڪو اَھي، آن نڪوئي نوڪر آپري مالڪ سين۔ 25 چيلي سارُون اي سُٺو اَھي تہ او آپري گرُو جيھڙو ٿي، آن نوڪر آپري مالڪ جيھڙو۔ جي گھر ري مالڪ نا شيطان ڪھيو جائي، تو اُوئي ري گھر واۯان نا تہ اُوئي سين پڻ وڌِيڪ خراب ڪھسين۔
رُگو اِيشوَر سين ٻِيھاجو
26 اِيئي ري ڪري اُوئان سين نہ ٻِيھاجو، ڪِي تہ ڪوئِي پڻ شئي ڍڪيل ڪو اَھي، جڪو پڌرِي ڪنھِي ٿي آن ڪوئِي پڻ لڪيل ڪو اَھي جڪو ظاھر ڪِنھِي ٿي۔ 27 جڪو واتين ھُون اَوھان نا ھيڻا انڌاري ۾ سنڀۯائُون تو او اَوھين روشني ۾ سنڀۯايا، جڪو اَوھين ھيڻا هَۯي هَۯي سنڀۯو تا او وڏي واڪي کُڏان تي چڙھي سنڀۯايا۔ 28 اُوئان سين نہ ٻِيھاجو جڪو بدن نا مارين تا، ڪِي تہ او آتما نا ڪوتا ماري سگھين اِيئي ري ڪري اِيشوَر سين ٻِيھاجو جڪو ٻِيھان نا مطلب بدن آن آتما نا ماري نرگ ۾ اُڇلائي سگھي تو۔ 29 اَوھين ھيڪي پئِيسي ۾ ٻہ جڙڪين تہ لي سگھو تا، پڻ اُوئان سين ھيڪ پڻ اِيشوَر پتا رِي مرضِي سوا ڌرتِي تي ڪوتِي کِري۔ 30 اِيشوَر نا اَوھانجي مٿي را مٿواۯ پڻ ساريل اَھين۔ 31 اَوھان نا ٻيھاجڻ نہ کپي ڪِي تہ اَوھانجِي قيمت چِڙڪيان سين گھڻِي وڌِيڪ اَھي۔“
پرڀُو يسُوع نا قبولڻ آن اِنڪار ڪرڻ رو نتِيجو
32 جي ڪوئِي مِنا ماڙھُوئان ري اگيا ڪھي تو تہ، ”ھُون پرڀُو يسُوع تي وِشواس رکان تو، تو ھُون پڻ اُوئي نا آپري آڪاسِي ٻاپ اگيا مڃيس تہ اِيئي مين تي وِشواس رکيو اَھي 33 پڻ جڪو ماڙھُوئان ري اگيا مانھجو انڪار ڪرسي، اُوئي رو ھُون پڻ مانھجي آڪاسِي پتا ري اگيا انڪار ڪرِيس۔
پرڀُو يسُوع مسيح ري وچن رو اثر
34 اِين نہ سمجھو تہ ھُون اِيئي دُنيا ۾ سنپ ڪراڻ آيو اَھان، سنپ ڪراڻ نہ، پڻ ھُون تو وڙهاڻ آيو اَنهان۔ 35 ڪِي تہ مانھجي آڻ ري ڪري ڏِڪرو، ٻاپ ري برخلاف ٿيسي، ڏِڪرِي ما ري برخلاف ٿيسي آن ووھارِي ساسُو ري برخلاف ٿيسي، 36 آن اُوئي ري گھر را ڀاتِي اُوئي را دشمن ٿيسين۔ 37 جڪو مين سين وڌِيڪ آپري ما ٻاپ سين پريم ڪري تو او مانھجو چيلو ٿيڻ ري لائق ڪو اَھي، آن جڪو آپرِي ڏِڪرِي يا ڏِڪري نا مين سين وڌِيڪ پريم ڪري تو او مانھجو چيلو ٿيڻ ري لائق ڪو اَھي۔ 38 جڪو آپرِي سولِي کڻي مين پُٺيا ڪوتو ھلي او مانھجو چيلو ٿيڻ ري لائق ڪو اَھي۔ 39 جڪو آپري جيوَ بچاڻ ري ڪوشِش ڪرسي او اُوئي نا گونسي، آن جڪو مين سارُون آپرو جيوَ ڏيسي او اُوئي نا بچاسي۔
شيوا رو ڦَل
40 جڪو اَوھان نا قبُول ڪري تو او جاڻي مِنا قبول ڪري تو، آن جڪو مِنا قبول تو ڪري او جاڻي اُوئي نا قبول تو ڪري جِڪي مِنا ميلھيو اَھي۔ 41 جڪو اِيشوَر ري نياپو ڏيڻ واۯان نا اِيشوَر رو نياپو ڏيڻ واۯا سمجھي قبول ڪري تو، اُوئي نا اِيشوَر ري نياپو ڏيڻ واۯي جِتو ڦَل جُڙسي، آن جڪو ڌرمي ماڙھُو نا ڌرمي سمجھي قبول تو ڪري، اُوئي نا ڌرمي ماڙھُو جِتو ڦَل جُڙسي۔ 42 ھُون اَوھان نا سچ تو ڪھان تہ جي ڪوئِي اِيئان ننڍيان سين ڪيھي پڻ ھيڪي نا مانھجو چيلو سمجھي ھيڪ پيالو ٺڍي پاڻِي رو پياڙسي تہ اُوئي نا اُوئي رو ڦَل جُڙسي۔“