Yoꞌoꞌ kaꞌán a̱ sa̱a̱ ni̱ xa̱ꞌa̱ Bezaleel xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ yooꞌ, ne̱ vi̱ꞌe̱ Israel, tunꞌ iinꞌ ti̱xi̱n yu̱kunꞌ toto̱
(Ex. 25.10-40; 27.1-8; 30.1-10)
37
Te̱ ni̱ xa̱ꞌa̱ tu̱ Bezaleel i̱i̱n xatu̱nꞌ xiinꞌ mi̱iꞌ ndiꞌiꞌ i̱tunꞌ acacia miiꞌ naá kuento ña̱ ni̱ ndoo̱ Ndiosí xiinꞌ e̱ꞌ.
Te̱ i̱i̱n metro kanuꞌ i̱i̱n to̱o̱ ña̱ nani̱ꞌ nu̱ꞌ,
te̱ uni̱ kuarta kanuꞌ siee ña̱ ndiká nu̱ꞌ,
te̱ uni̱ kuarta kanuꞌ siee tu̱ ña̱ sukun nu̱ꞌ.
2 Te̱ ni̱ xa̱ki̱n ra̱ oro ka̱niiꞌ xata̱ꞌ xatu̱nꞌ ja̱a̱nꞌ xiinꞌ ka̱niiꞌ ti̱xi̱n nu̱ꞌ,
te̱ ni̱ tyi̱ndo̱ndi̱a̱ ra̱ ka̱a̱ ndiki̱ ka̱niiꞌ yu̱ꞌuꞌ nu̱ꞌ.
3 Ni̱ xa̱ꞌa̱ tu̱ ra̱ ku̱miꞌ taꞌan ka̱a̱ tivi̱ xiinꞌ mi̱iꞌ ndiꞌiꞌ oro ña̱ ku̱ndo̱ndi̱a̱ ku̱miꞌ sa̱aꞌ xiki̱ꞌ nu̱ꞌ,
uvi̱ taꞌan uvi̱ taꞌan a̱ ta̱taꞌviꞌ nu̱ꞌ.
4 Ni̱ xa̱ꞌa̱ tu̱ ra̱ ndiaꞌviꞌ ka̱roti xiinꞌ mi̱iꞌ ndiꞌiꞌ i̱tunꞌ acacia,
te̱ ni̱ xa̱ki̱n ra̱ oro ka̱niiꞌ xata̱ꞌ nu̱ꞌ.
5 Te̱ ni̱ sa̱xkaꞌndíá ra̱ ka̱roti ja̱a̱nꞌ ti̱xi̱n ka̱a̱ tivi̱ ña̱ ndondia xi̱i̱nꞌ xatu̱nꞌ ja̱a̱nꞌ te̱ ku̱vi̱ ko̱ni̱ꞌi̱ ra̱ nu̱ꞌ kuꞌu̱n ra̱.
6 Ndi̱ꞌi̱ ja̱a̱nꞌ te̱ ni̱ xa̱ꞌa̱ tu̱ ra̱ i̱i̱n tunꞌ ndasi yu̱ꞌuꞌ xatu̱nꞌ xiinꞌ mi̱iꞌ ndiꞌiꞌ oro miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
Te̱ i̱i̱n metro kanuꞌ i̱i̱n to̱o̱ ña̱ nani̱ꞌ nu̱ꞌ,
te̱ uni̱ kuarta kanuꞌ siee ña̱ ndiká nu̱ꞌ.
7 Ni̱ xa̱ꞌa̱ tu̱ ra̱ uvi̱ taꞌan querubin xiinꞌ mi̱iꞌ ndiꞌiꞌ oro,
te̱ xiinꞌ ka̱a̱ ni̱ tu̱xiꞌ ra̱ ña̱ ja̱a̱nꞌ te̱ ni̱ xa̱ꞌa̱ ra̱ a̱,
te̱ ni̱ xa̱ta̱ ra̱ querubin ja̱a̱nꞌ uvi̱ sa̱aꞌ taꞌviꞌ yu̱ꞌuꞌ tunꞌ ndasi xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
8 I̱i̱n querubin ja̱a̱nꞌ ni̱ tyi̱nduꞌu̱ꞌ ra̱ i̱i̱n taꞌviꞌ yu̱ꞌuꞌ tunꞌ ndasi yu̱ꞌuꞌ xatu̱nꞌ ja̱a̱nꞌ,
te̱ i̱nga̱ a̱ ni̱ tyi̱nduꞌu̱ꞌ ra̱ tu̱ku̱ taꞌviꞌ,
te̱ uvi̱ sa̱aꞌ querubin ja̱a̱nꞌ ndii,
i̱i̱n nda̱a̱ꞌ nduuꞌ a̱ xiinꞌ tunꞌ ndasi yu̱ꞌuꞌ xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
9 Te̱ xitoꞌniꞌ nuu̱ꞌ taꞌanꞌ uvi̱ sa̱aꞌ querubin ja̱a̱nꞌ ndieeꞌ a̱,
xitoꞌ ndo̱so̱ꞌ a̱ xata̱ꞌ tunꞌ ndasi xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
Te̱ ni̱ sa̱na̱kaá a̱ uvi̱ sa̱aꞌ ndi̱xi̱n a̱,
te̱ xiinꞌ ña̱ ja̱a̱nꞌ ndasi a̱ xata̱ꞌ xatu̱nꞌ ja̱a̱nꞌ.
Yoꞌoꞌ kaꞌán a̱ sa̱a̱ ni̱ ku̱a̱ꞌa̱ mesa miiꞌ ku̱ndi̱e̱e̱ xita̱ꞌ va̱ꞌa̱ ña̱ nasoko̱ꞌ sutu̱
10 Ni̱ xa̱ꞌa̱ tu̱ Bezaleel i̱i̱n mesa xiinꞌ mi̱iꞌ ndiꞌiꞌ i̱tunꞌ acacia,
te̱ i̱i̱n metro kanuꞌ i̱i̱n to̱o̱ ña̱ nani̱ꞌ nu̱ꞌ,
te̱ uvi̱ kuarta kanuꞌ uni̱ taꞌanꞌ nuu̱ꞌ nda̱ꞌaꞌ ña̱ ndiká nu̱ꞌ,
te̱ uni kuarta kanuꞌ i̱i̱n to̱o̱ ña̱ sukun nu̱ꞌ.
11 Ni̱ xa̱ki̱n ra̱ oro ka̱niiꞌ mesa ja̱a̱nꞌ,
te̱ sa̱a̱ xinunduu yu̱ꞌuꞌ mesa ja̱a̱nꞌ ni̱ tyi̱ndo̱ndi̱a̱ ra̱ ka̱a̱ ndiki̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro.
12 Te̱ ni̱ tyi̱ndikún tu̱ ra̱ i̱i̱n vitu̱ꞌ siee sa̱a̱ kuaꞌa̱n yu̱ꞌuꞌ mesa ja̱a̱nꞌ,
te̱ i̱i̱n to̱o̱ ña̱ sukun vitu̱ꞌ ja̱a̱nꞌ,
te̱ sa̱a̱ kuaꞌa̱n yu̱ꞌuꞌ vitu̱ꞌ ja̱a̱nꞌ ni̱ tyi̱ndo̱ndi̱a̱ ra̱ ka̱a̱ ndiki̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro.
13 Te̱ ni̱ xa̱ꞌa̱ tu̱ ra̱ ku̱miꞌ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ ni̱ tyi̱ndo̱ndi̱a̱ ra̱ ku̱miꞌ sa̱aꞌ xiki̱ꞌ mesa miiꞌ yoo xaꞌa̱ꞌ nu̱ꞌ.
14 Ka̱a̱ tivi̱ ja̱a̱nꞌ ndii,
ti̱xi̱n a̱ miiꞌ ndondia ka̱a̱ ndiki̱ ña̱ xanda̱tu̱nꞌ mesa ja̱a̱nꞌ ndondia a̱,
sa̱kanꞌ te̱ ti̱xi̱n ka̱a̱ tivi̱ ja̱a̱nꞌ xkaꞌndíá ka̱roti,
tunꞌ ti̱i̱n te̱ yivi̱ꞌ te̱ niꞌiꞌ ra̱ mesa ja̱a̱nꞌ kuaꞌa̱n ra̱.
15 Te̱ ka̱roti ja̱a̱nꞌ ndii,
xiinꞌ mi̱iꞌ ndiꞌiꞌ i̱tunꞌ acacia ni̱ xa̱ꞌa̱ ra̱ nu̱ꞌ,
te̱ ka̱niiꞌ xata̱ꞌ nu̱ꞌ ni̱ tyi̱ndo̱ndi̱a̱ ra̱ oro,
te̱ xiinꞌ tunꞌ ja̱a̱nꞌ niꞌiꞌ te̱ yivi̱ꞌ mesa ja̱a̱nꞌ kuaꞌa̱n ra̱.
16 Te̱ ni̱ xa̱ꞌa̱ tu̱ ra̱ kiꞌinꞌ nda̱tyuunꞌ ña̱ itaꞌ nuu̱ꞌ mesa ja̱a̱nꞌ xiinꞌ mi̱iꞌ ndiꞌiꞌ oro,
naa kuuꞌ koꞌo̱ꞌ,
xiinꞌ ti̱ka̱si̱,
xiinꞌ ya̱xinꞌ,
xiinꞌ yo̱o̱,
te̱ i̱kanꞌ ku̱ꞌu̱n ña̱ nasoko̱ꞌ sutu̱ ña̱ yoo ti̱kui.
17 Ni̱ xa̱ꞌa̱ tu̱ ra̱ i̱i̱n kandelabro tyiee̱ xiinꞌ mi̱iꞌ ndiꞌiꞌ oro,
te̱ xiinꞌ ka̱a̱ vie̱ ni̱ tu̱xiꞌ ra̱ a̱ kii̱ꞌ ni̱ xa̱ꞌa̱ ra̱ a̱,
naa kuuꞌ xaꞌa̱ꞌ a̱,
xiinꞌ to̱koꞌ a̱,
xiinꞌ copa ña̱ itaꞌ nda̱ꞌaꞌ a̱,
xiinꞌ i̱ta̱ ña̱ ndisoꞌ a̱ ndii,
i̱i̱n nda̱a̱ꞌ ku̱i̱ti̱ꞌ nduuꞌ ka̱niiꞌ a̱.
18 Te̱ yoo iñu̱ taꞌan nda̱ꞌaꞌ a̱,
uni̱ taꞌan uni̱ taꞌan a̱ ndondia ta̱taꞌviꞌ xi̱i̱nꞌ a̱.
19 Te̱ i̱ꞌi̱n nda̱ꞌaꞌ kandelabro ña̱ iñu̱ taꞌan ja̱a̱nꞌ ndii,
itaꞌ uni̱ taꞌan copa ña̱ iinꞌ nde̱e̱ naa i̱ta̱ tunꞌ mendra nuu̱ꞌ a̱,
miiꞌ itaꞌ ka̱a̱ tuún,
te̱ iinꞌ a̱ nde̱e̱ naa iinꞌ i̱ta̱ lu̱tuꞌ,
te̱ yoo tu̱ yuku̱ a̱ nde̱e̱ naa yuku̱ i̱ta̱.
20 Te̱ to̱koꞌ xaꞌa̱ꞌ kandelabro ja̱a̱nꞌ ndii,
ni̱ xa̱ꞌa̱ ra̱ ku̱miꞌ taꞌan copa ña̱ iinꞌ nde̱e̱ naa i̱ta̱ tunꞌ mendra itaꞌ nuu̱ꞌ a̱,
te̱ iinꞌ a̱ nde̱e̱ naa iinꞌ i̱ta̱ lu̱tuꞌ,
te̱ yoo tu̱ yuku̱ a̱ nde̱e̱ naa yuku̱ i̱ta̱.
21 Te̱ miiꞌ nduuꞌ iinꞌ nda̱ꞌaꞌ kandelabro ja̱a̱nꞌ xiinꞌ xaꞌa̱ꞌ a̱ ni̱ xa̱ꞌa̱ ra̱ uni̱ taꞌan copa ku̱i̱ta̱ xaꞌa̱ꞌ i̱ꞌi̱n uni̱ sa̱aꞌ na̱ꞌa̱ nda̱ꞌaꞌ kandelabro ja̱a̱nꞌ.
22 Ña̱ nduuꞌ copa ja̱a̱nꞌ xiinꞌ nda̱ꞌaꞌ a̱ ndii,
i̱i̱n nda̱a̱ꞌ nduuꞌ ka̱niiꞌ a̱ xiinꞌ kandelabro ja̱a̱nꞌ,
te̱ xa̱ mi̱iꞌ ndiꞌiꞌ oro nduuꞌ a̱,
te̱ xiinꞌ ka̱a̱ vie̱ ni̱ xa̱ꞌa̱ ra̱ a̱.
23 Ni̱ xa̱ꞌa̱ ra̱ uxa̱ taꞌan ka̱a̱ tuún xiinꞌ mi̱iꞌ ndiꞌiꞌ oro,
ni̱ xa̱ꞌa̱ tu̱ ra̱ xinda̱ꞌ ña̱ tiinꞌ ra̱ ñuꞌu̱ ti̱keí,
te̱ ni̱ xa̱ꞌa̱ tu̱ ra̱ koꞌo̱ꞌ kualiꞌ miiꞌ naá ñuꞌu̱ ti̱keí ja̱a̱nꞌ,
te̱ xiinꞌ mi̱iꞌ ndiꞌiꞌ oro ni̱ xa̱ꞌa̱ tu̱ ra̱ ña̱ ja̱a̱nꞌ.
24 Oko̱ uxi̱ ku̱miꞌ kilo mi̱iꞌ ndiꞌiꞌ oro ni̱ ti̱i̱n ra̱,
te̱ ni̱ xa̱ꞌa̱ ra̱ kandelabro ja̱a̱nꞌ xiinꞌ sa̱kuuꞌ nda̱tyuunꞌ ña̱ kuaꞌa̱n xiinꞌ a̱.
Yoꞌoꞌ kaꞌán a̱ xaꞌa̱ꞌ sa̱a̱ ni̱ xa̱ꞌa̱ Bezaleel altar miiꞌ xaꞌmiꞌ sutu̱ su̱xa̱ tyu̱ꞌma
25 Ni̱ xa̱ꞌa̱ tu̱ Bezaleel i̱i̱n altar xiinꞌ mi̱iꞌ ndiꞌiꞌ tunꞌ acacia miiꞌ xaꞌmiꞌ sutu̱ su̱xa̱ tyu̱ꞌma.
Ni̱ xa̱ꞌa̱ titutunꞌ ra̱ nu̱ꞌ ña̱ nani̱ꞌ nu̱ꞌ ndii,
uvi̱ kuarta kanuꞌ uni̱ taꞌan nuu̱ꞌ nda̱ꞌaꞌ kuuꞌ a̱,
te̱ sa̱kanꞌ tu̱ ña̱ ndiká nu̱ꞌ,
te̱ i̱i̱n metro kanuꞌ i̱i̱n to̱o̱ ña̱ sukun nu̱ꞌ,
te̱ ni̱ xa̱ꞌa̱ tu̱ ra̱ ndi̱kiꞌ nu̱ꞌ i̱ꞌi̱n ku̱miꞌ sa̱aꞌ xiki̱ꞌ nu̱ꞌ,
te̱ i̱i̱n nda̱a̱ꞌ nduuꞌ a̱ xiinꞌ ka̱niiꞌ altar ja̱a̱nꞌ.
26 Ndi̱ꞌi̱ ja̱a̱nꞌ te̱ ni̱ sa̱kutyiꞌ ra̱ mi̱iꞌ ndiꞌiꞌ oro ka̱niiꞌ xata̱ꞌ nu̱ꞌ xiinꞌ ku̱miꞌ sa̱aꞌ ndi̱kiꞌ nu̱ꞌ,
te̱ ni̱ xa̱ꞌa̱ tu̱ ra̱ ka̱a̱ ndiki̱ xiinꞌ mi̱iꞌ ndiꞌiꞌ oro sa̱a̱ xinunduu yu̱ꞌuꞌ nu̱ꞌ.
27 Te̱ ni̱ xa̱ꞌa̱ tu̱ ra̱ uvi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ oro ni̱ tyi̱ndo̱ndi̱a̱ ra̱ ta̱taꞌviꞌ xiinꞌ nu̱ꞌ ti̱xi̱n a̱ miiꞌ ndikún ka̱a̱ ndiki̱ ña̱ kuaꞌa̱n yu̱ꞌuꞌ nu̱ꞌ ja̱a̱nꞌ,
te̱ ti̱xi̱n ka̱a̱ tivi̱ ja̱a̱nꞌ sa̱xkaꞌndíá ra̱ ka̱roti te̱ ku̱vi̱ ko̱ni̱ꞌi̱ ra̱ xatu̱nꞌ ja̱a̱nꞌ kuꞌu̱n ra̱.
28 Te̱ ka̱roti ja̱a̱nꞌ ndii,
xiinꞌ i̱tunꞌ acacia ni̱ xa̱ꞌa̱ ra̱ nu̱ꞌ,
te̱ ni̱ sa̱kutyiꞌ ra̱ oro ka̱niiꞌ xata̱ꞌ nu̱ꞌ.
29 Te̱ ni̱ xa̱ꞌa̱ tu̱ Bezaleel xa̱ꞌa̱n su̱ꞌu̱n ña̱ tiinꞌ sutu̱ te̱ sañuꞌuꞌ ra̱,
xiinꞌ su̱xa̱ tyu̱ꞌma xavixínꞌ xa̱va̱ꞌa̱,
te̱ ni̱ xa̱ꞌa̱ ra̱ a̱ nde̱e̱ naa xaaꞌ te̱ xaꞌa ti̱kui xavixínꞌ.